¹ Bataali, enu aleko litisakai balome bino, loka yomba mbo amoi ailitisi baoi akoanya baoi la bakuwa baya boali inde. ² Bakafoena bongaeli bo liuwi lilo. ³ Bafeko bino baimbaka kee bo mbela lousa kee belowa be sowe, kee baina baliesa mbela la tulu ye ibataka bo. ⁴ Ongoma bofeko wino babeke ta betema befeko bo baito babe la bolimo bo eyai, we boloketi lofi felo iya Mungu . ⁵ Kola ongoma mala emoi bataali balendoloko Mungu, balitisake balome bibo. ⁶ Kee Sala, ono alitisaka Abalayama la akata ye mbo ngene inde, la keka bolo, la ndoena bowa ango bomoi. ⁷ Botolome, enisaka ta fangi aoo liluwi ta libekani liya baali bino, kee baito ba belembu, ilakabo likolo, kee felo, omba ta etalala, lino ta ngbengbele e liwawi. Imbeke ongoma loka mbo leka ango lomoi loimbaka likulia ta basomboli bino. ⁸ Ongoma mbakai batotina la liomali limoi la lienyeli limoi, la losamo loya Ngene, la ngandi, la lisuluwi. ⁹ Oinoisakai bobe ta bobe, kee limoli ta limoli, utchakai la efinde,loka ongoma ende ekatomo'enu lioi, mbo oanyei liutchomu. ¹⁰ yomba mbo amoi asami liwawi, la loeno lisiyo lilo akomanyeke lolame linde la bebo. La bekpekpebu binde la lolanga. ¹¹ La ambeke esika la bobe la akele bolo. La aluke eyai la lotuto; ¹² Loka baiso baya Ngene bambe ambe be balo. La batoi batolaila basomboli bibo. La bombo boya Ngene, baiyani la bee batokela bobe. ¹³ La ato okisa bo wale, beke bato iyana la bolo? ¹⁴ Kola ongoma yomba mbo akafoanya bemusi oka lobola, owe komba la liomali. Aimbaka libo la bowa, la baenyeli ta botchwe. ¹⁵ Ongoma athomoko ta betema ambe yesu Kilisito. Mbakai kila lisio la bamutoli, la bolembu la lilitesi, felo buto la buto ono atolengila. ¹⁶ La mbakai la liluwi, oka mbo, oka owe ange akabeka lolanga kee ombaka bowei bo bobe beke basonaka bakuwa bao ambe Kilisito balikomo la limwaali. ¹⁷ Iengani la bomusi, la liengani liya Mungu la okela bolo kee lokelo bobe. ¹⁸ Kilisito aleko aokisomo wale mala emoi loka lo bobe, ye ambe bolo aiteni iibalo, loka mbo aese'su ambe Mungu. Aitomoko ta lokomba, ongoma akamba la liwawi ta Bolimo. ¹⁹ Ta yeke aleko akaka akanangola ta belimo be bonyololo. ²⁰ Mbile esiya ambaka la booko, yomba mbo ilili kee botema bosa boya Mungu bakaomba bosa, ta basiyo baya Nowa, mbile eswaka ye lisuwa, ta le loketi lo baito lombaka loke, ango baito libwa, bauwaka la fela. ²¹ Bo baye bo bambaka bolendela bo lilufi, baitofoya bobe ta bindo, ongoma liokani li liluwi lilo ambe Mungu, la kanikani ofouwai enu aleko, ta lifufuki liya Yesu Kilisito, ²² ye imbe ta boo bolome boya Mungu, ko ekaka ye ta lobola, la mbo bekitomo, la bekota, bekota be befoka, ba litisaka ye.