¹ Moilaka banangoli beke lotobeisa ta batoolo bee bambe aiteeni ino, eyai batoolo kee bo, lilendelu li bemusi ambe Kilisito, la ono ambaka la tala ono amboenisaka: ² Aama esongamelo loya Mungu loemaeli, yeiti ango loka lo falanga, loka okelei ibule, engene la weli boya Mungu, ingango la botema bobe, la litefoli; ³ ingango olongela bee nu oanakai, la otchungei esondjamelo loya Mungu. ⁴ Mbile bokuki atoota ombo'anyakai bosombo we boitoseisama la talaa. ⁵ Kolaongoma enu bana batolome, mbakai la lilitesi ta batoolo. La enu atotina, oibtakai liwawi lilofolo, loka Mungu atonana la bee ba folo, kola ongoma atofa ngbengbele ta bee bambe la lilitisi. ⁶ Suluwakai sekala ii bofoka boya Mungu, kola ongoma ye atoilenu likolo ta mbile ene asami. ⁷ Kusakai baenyeli batotina la biale, loka engene atothungenu. ⁸ Mbaka la bofiyo, oumbakela baiyani, bolimo bobe, otonguluma kee nama ee simba ato luka ola. ⁹ Mbakai la bofoka aiteni ii liimeli likandomu, luwakai mbo banduku bino ba wenda batooka wale bofono bomoi. ¹⁰ Mungu a ngbengbele etotina, akateke'enu ambe Yesu Kilisito, ye atoenganise'enu, atoomalise'enu likama, atofe'enu bofoka, atote'enu likolo li bakolo. ¹¹ Bofoka bombe ambe ye loka lo layalaya! Ko'Ongoma! ¹² Loosonele'enu lokasa louwe leke ta ndole la Silivano, ye lotomoila kee nduku a wewe, lolangi ofe'enu bofilili la obeise'enu mbo imbe ngbengbele la Mungu kandamanakai la ngbengbele amo. ¹³ Mbele Mungu ee litchakolomu embe ta Babilone eofenu kilibo, la Malako aleko, wana ange. ¹⁴ Fanakai kalibo bamoi ta basiya la losamo lolo. Tikakai mbo eyai lombe ambe'nu batotina bee bambe ambe Kilisito!