¹ Bwáná údjibha táa bha Farisayo bhú-óká taa úbhikia ká ni djinisia bhatendé bhagii iyetá Yoani. ² Nge Yesu sabhi djenisiakiese, nge ibhá bhatende bhésé. ³ Na-eto atiká Yudeya ká á kpudha á Galilaya. ⁴ Tokú ibhia ekpié ta á-éti á Samalia, ⁵ akianá á ndei ya dhéné ya Samalia, ébhisiané taa Sukali, tshekédhé na bholé bhúó Yakobho úmuwá mona wésé Yozefu. ⁶ Dyaa ibhia étukó yá Yakobho. Yesu, n'dhogé na lokéndó, ibhia ni yekáná na sáá tiifú n'ikingia n'dala. ⁷ Mwali tomoi wa Samalia iidjá iko túká malivfa. Yesu ansowa: indhuá mi inyuwa. ⁸ Ngo bhatende bhésé bhukena ándei ya dhéné iko kula bhi idhia. ⁹ Mwali musamalia an'sówa: tuku indje owé undjo O'múyúda wi ivfemie ma inyua, emi undjo e mwali musamalia? bha Yúda, na eto bhandje okanakia abhó na bha Samalia. ¹⁰ Yesu an' kpetania: áni úbha djibha liwá lá Mbali ká i undjo ane sowa: induá ma inyuwa! amba owé mukulu aao obhá mune owé malivfa ma ibhika. ¹¹ Bwáná, mwali an'sowa, undjo na émá ya ituka ká étukó i dhooú, údha kotio malivfa máá ma ibhiká? ¹² O'kotio dhéné inémita idje wasú Yakobho, undjo ú túowá étuko éno, ká undjo u'nyua idjé mukulu aao na bhana bhésé ká na ékumbú yésé ya mekoko? ¹³ Yesu an'kpetania: n'topa undjo únyue malivfa mánó adjioki bhié káámó yáma. ¹⁴ Nge undjo u'nyue máá émi é mùuwe andje okii ta bhiésé yaama ká malivfa maa é muúwe ma gwali angésé un'tuwe wa silangá úwo ukpalalie á ibhika lá masi matopá. ¹⁵ Mwali ansowa, Bwana indua malivfa mao, ambusa n'ata enoke tabhiami yama, ta n'átá ene kuidje bhi kaamo ikotuka malivfa ano. ¹⁶ keena, Yesu ansowa, kom' bhisia mulumai, ka uka dyano. ¹⁷ Mwali am'kpetania: indjami na mulume. Yesu an'sowa: wa avfia angili nata indjami na mulume. ¹⁸ Ngo wuudha bhalume tiifu, ka undjo nunana keteetino andeese mulumai. neeto wavfia angili. ¹⁹ bwána, an'sowa mwali, yee n'ata owe n'kaanga. ²⁰ Bhiibje bhasu bhubhi koma kula a n'tala wo kuuno; ká navfia, nue, bhanu eegula ya ekpie yiikomula a Yelusalema. ²¹ Yesu, an'sua mwali, idjelia,evfumbu ya kiana iyo indi gwaliese a n'tala uno ao a Yelusalema dya nu n'komulu bhi Tita. ²² Nukomulue iyo nundi djibhianu; djue,tukomulu undjo tu djibhie, ngo ibhika liidjie anga bha Yuda. ²³ Nge evfumbu yoowa, ka yowa mono kungbe, dya bha komula bha menemene bha n'komulu bhi Tita a mpumantima ka n'angili, ngo ibhobhaa bha bha komulu bha Tita abha vfema. ²⁴ Mbali u M'pumantima, ka Eekpie bha bha n'komulue bha n'komula a mpumantima ka n'angili. ²⁵ Mwali ansowa: édjibhi n'atá Masiya meekie undjo bha m'bhisi n'àtá Klisto; dya wiidji bhio, utu kpolisi bhio bhiima bhitòpá. ²⁶ Yesu ine n'sua: Emiidjono, evfi nai. ²⁷ Dyáa ikulu bhatende bhukiáná, bhubhia bhá sangale na éyo úbha vfia na mwali tomoi. Ka amó tóomoi sa vfie: O'mü neni? ao: nuvfi náná andje? ²⁸ Dyaa mwali, átiká ndiko yèsè, ákéná á ndei ya dhéné, ká á bha a'vfia na bhushe: ²⁹ Úkái komenai mushé tomoi úndjo wisowá bhitopa bhio ekakie; indjésé Kilisito undjo? ³⁰ Bhéésá á ndeyi ya dhéne, ká bhá kéna á'ngésé. ³¹ Á évfumbu yokwiyo, bhatende bhá súsúlia ta manga á dhü, bhavfia: Labi, dhia. ³² Nge a'bhásowa: éna bhi idhia bhio nundje djibhianu. ³³ Bhatende bhansosa na ibhó nabhó: mushé tomoi andhisia lili bhima bhi idhia? ³⁴ Yesu a'bhásowa: bhimabhami bhüdhia bhiése kú ikia bhoondusia wa undjo witúmá, ká niakisia mokambo wése. ³⁵ Núvfie ánú táa yatikálá meli taminai tukiana na evfumbu yi kólá? Éna, yanesowa nuwe, tubhulai madjo, ká bhonai ma bhúlú maa mooluwá ni kóla. ³⁶ Undjou'koliè upatie musalala, ká úbhásie pumá djübhi ka lá masi ku matopa nisowa taa undjo aamá ka undjo a'kólá bha bhaséea bhatopá. ³⁷ Ngo na iyono iyo bhavfie angili woomó ú undjó oona, ká woomó undjo kolie. ³⁸ Inétuma nuwe iko kólà iyo nu'kambeanu; bhaamó bhá kambá, ká núe ná tángáná a'mokambho wabhó. ³⁹ Bhá Samalia bhagi bhá ndei ya dhéné iyó bhá ndjelia Yesu nisowa lá livfia lá bhusumbá ya mwali: mitopa miyo i-kiá. ⁴⁰ Dyokútò, dyaa bha Samalia bhééká ikon'gboká, bhámvfemá táa ágwali angá bhó. Ka úgwalá dyaa masi tamavfili. ⁴¹ A'bhugi bhaamó bhú djelia nisowá lá livfiá lésé; ⁴² Ká bhán'sowa mwali: indjésé nisowa lá iyò wavfia ta ta'djelia; ngo ta mókà djue kubhanéné, ká ta djibha taa úm'bikisia angili wa kisi. ⁴³ Ambusá ma masi ta'mávfili, Yesu éésá dyáa, nikéná a'Galilea; ⁴⁴ Ngó úvfia idjé ku bhanene táa nkanga andjé bibianiése a'ndei yésé ku bhanene. ⁴⁵ Dyáa manga ukiana á Galilea bhú bhuga ta ékima, bháa bhúéná mitopá miyo úkia mono a'Yelusalela á évfumbu ya evfaya; ngo ibhó dyokútó bhúkéna á évfaya. ⁴⁶ A'kpudhá kotio á Kana na Galilea, dyoowá úbasia malivfa éngoka. ibhia mono á Kapelenaumi n'dumangá tomoi wa bhasudhá bhá nkota, undjo mona wese úbhia na ndutu. ⁴⁷ Ooká tá Yesu éeká á Yudea ká ákianá a' Galelia, an'kenila, ká ánkomulá natá bhákeni ká anbhikisia móna wésé, undjo úbhia kalibho ni-ugwa. ⁴⁸ Yesu ánsowa: ani nuéneanú bhékakó ká bhivfanyiko, núndje djelianu tá bhuwa. ⁴⁹ N'dumanga wa bhasudhá bhá nkota ansowa: Bhwáná, dúlúa á péle na monami i ugwa. ⁵⁰ Kená, Yesu ansowa, monai a'bhika. Ká mushe undjo a'djelia livfia eyo Yesu u'nsowa, ká á kéna. ⁵¹ Tókù manga ubhia su dhulúwé, bhushé bhésé bhámokambo bháko kumáná náná, bhásowa livfia lio: mónai a'bhika. ⁵² A'bhéiyà, na saa yania oká ekima; ká bha'nsowa: ikòló, a'sáá ya sábhá, hómà liibhá. ⁵³ Idjidjé a'djelia nata ibhàà a'saa yókwiyó Yesu unsowa: monai a'bhikà. Ka a'djelie, idjé na bhwandja bhésé bhutopa. ⁵⁴ Yesu a'kia ekakó yésé ya mavfili dyaa weeká a'Yudeya nikéná a'Galilea.