¹ Nge ibhia na mushe tomoi á semele na bha Falisayo, mu bhishiané Nikodema, n'kota wa Bhayuda, ² Úndjo éeka, idje, anga Yesu, bhotio, ka ansowa: Labhi, tu djibhi taa, owe ndumanga wabha minganga undjo éeka á nga Mbali; ngo mushe toomoyi andje kiése bhikakó miyo úküe, ani Mbali á ndjése nai. ³ Yesu an'kpetama: angili, angili, yanesowa, ani mushe tomoi sabhutale kaamo, andje eniese bhukota bhwa Mbali. ⁴ Nikodema ansowa: namna yania mushe o'pasi ibhutala nidje souwa ngagulu, opasi kaamo iiganaka á lila la nyingèse ka á bhutala? ⁵ Yesu á manyula: angili, angili, yanesowa, ani mushe undjai mubhutale na malivfa ka na mpumatima, andje lumiese á bhukota bha Mbali. ⁶ Iyo ibhutala na mobhi i mobhi, ka iyo ibhutala na mpumatima i mpumatima. ⁷ Mbése igbita na eyo yanesowa: üyondane taa obhutala kaamo. ⁸ Movfuvfu o'vfumbakue dyaa woonduwe, ka wookie idyoma láao; nge undje djibhiai owa wi idjie ao nia úkenie. Itoku mushe úndjo á bhutala am'pumatima. ⁹ Nikodema ansowa: iyo ekiani titani? ¹⁰ Yesu a'manyula: owe ndumanga waminganga wa Isalaeli, ka undje djibhiai bhima bhio. ¹¹ Angili, angili yanesowa: tuvfie iyo tu djibhie, ka tu sambolie na eyo tu ena; ka nundje odhuanu bhusamboli bhwasu. ¹² Ani nu djelianu dyaa ya nene sowa nuwe bhima bhi itshi, igwali titani dyaa inesou nyuwe bhima bhi ikulu ya nguvfa? ¹³ Indjése na mushe indjo úkpata iikulu la nguvfa, ani indese kú undjo údhulua mónó ikulu la nguvfa, mona wa mushe undjo wu ikulu la nguvfa. ¹⁴ Ka toku Musa útubhula nyili á mpena wa iseké, ye ékpie namuna kwemoyi taa móna mushe agwali n'tubhulané, ¹⁵ Ambusa taa n'topa undjo un'djelie á odhu ibhika lá masi matopa. ¹⁶ Ngo Mbali wa onda kisi egi woowa monese wa bhukalesi, ambusa taa n'topa undjo un'djelie andje oguèse, nge kia á odhu ibhika la masi matopa. ¹⁷ Mbali, na eto, san'tumèse mona wèse á kisi nata a'sambisia kisi, nge á bhikisia kisi. ¹⁸ Úndjo an'djelia andje sambiése; nge undjo a'ndje djeliése úsambisiana, mungusa sa djelièse linya la mona wa bhukalese wa Mbali. ¹⁹ Ka bhutumba bhuo bhu taa, m'pena uwo wi idja á kisi, bhushe bhaonda livfue ieta mpena, mungusa mekambo mabho mibhia mibhibhi. ²⁰ Ngo ntopa undjo úkia bhubhi a'bhilia m'pena, ka andje onduèse mine eni kiane; ²¹ Nge úndjo úkiie niye kana na angili uonduwe m'pena, ambusa taa mukambo mèse migwali mienikiane mikiana mono na Mbali. ²² Ambusa na dyaaa, Yesu, mulongo na bhatende bhèsè, á kena á Yudeya; ka dyaa, á djumana nabho, ka á djinisia. ²³ Yoani dyokuto úbhi djinisia á Ainoni, tshekedhe na Salimu, mungusa ibhia dyaa na malivfa ta magi; ka bhubhi idja ikodji djinisia. ²⁴ Ngo Yoane sa bha mbèse mukingiané á mudyalolo. ²⁵ Ngo, bhatendebha Yoani bha kiana nkakanyi na Bhayuda nisowa laminguso nu kengulana. ²⁶ Bheéká ikongboka Yoani, ka ninesowa: Labhi, undjo ubhia nai dyaa á Yuludhani, ka úndjo owe wan'sambula, éna, á djinisia ka bhatopa bha kena angèse. ²⁷ Yoani a'kpetania: mushe úpasi iudha iyo uowànà ikulu la nguvfá. ²⁸ Núwe bhakulu bha aó nú bhasamboli bhámi na eyo yavfia: indjámi Kilisito, nge étumana a'pele nànà. ²⁹ Úndjo mwali ú wésè, ú mulume; nge mbeni wa mulume, undjo u'ntemé dyaa ka undjo ú mokie, ú niséa ta ligi nisowa la dyoi la mulume: kaamo iseà lio, lilami, lákiànà. ³⁰ Ee kpie ta áondi, ka emi èkubhu. ³¹ Úndjo wu idja ikulu, ú ikula la bhitopa; úndjo ú wa kisi. Undjo ú idjá ikulu la nguvfa uikulu la etopa, ³² Ú sambolia étopa eyo úéná ka na io úoka, ka mushe sa djelièse bhusamboli bhèsè. ³³ Undjo ú udha bhusamboli bèsè udjelia ta Mbali ún'kima; ³⁴ Ngo undjo Mbali ún'tuma úvfie mavfia ma Mbali, mungusa Mbali samuwe èse mpumatima na kepimo. ³⁵ Tita ónda móna ka aowá bhima bhitopa a'mabho mèsè. ³⁶ Undjo un'djelie móna ú nibhika la masi kumatopa; undjo andje djelièse móna andje enièse ibhika, nge bhusungu bha Mbali bhu gwalie ikúlú lésè.