¹ Waaba Yesu kalekane, amba ya wene moto monomo owa botama na miyo mapholo. ² Baekosi bee bamba ya motuna motuna mumu: Labi, moto oyo apholo miyo pho ya masumu me ndee pho ya masumu ma baboti bee? ³ Yesu amba buya yokye: Teli yo na baboti bee. Kasi eli nde pho ya obotshe bitoma ba Nwaphongo biwenene onte ye! ⁴ Waata baa moo, tosengyesi ikyela bitoma ba owantoma. Waakome mokolo, moto takokyi ikula kyela etoma. ⁵ Naino ootaba nga o mokyisi, nali moo nwa mokyisi. ⁶ Waawo yo babona, Yesu amba ya towa matee o manyete, aesi ya maphuta na manyete amba ya mainga moto owa pholoko miyo me o miyo. ⁷ Amba ya wo ne yokye: Kye mikunyola o mbondo ya Silowe (kyelukye iwo obotshe: Toma). Moto owa pholo miyo amba ya kyende, akye mikunyola, waaya butwa yo, abuto iwene. ⁸ Babubaa ne na babaka bamowene soo soo - pho abaka moongyi - Teli yo owa baka azasi kaongye? ⁹ Bana bekye: Eli nde yo! Bayoko bekye: Iyo phe, eli nde moula ne. Kasi moto owa pholo miyo amba anola yokye: Eli nde nga. ¹⁰ Emba bamba wo ne bekye: Ka miyo mawe mambi zibwa ndengye'ye? ¹¹ Amba buya yokye: Moto okobangye bee Yesu, aphuti manyete , amanzingyi o miyo, amba wo na na nga yokye: Kyemikunyola o Silowe. Bobele nga, namba ya kyende, namba ya mikunyola emba namba ya butwa iwene. ¹² Bamba ya wo ne bekye: Moto me ali bi? Amba buya yokye: Nga siebe. ¹³ Bobele, baesi yakye na moto owa pholoko miyo oka Bfalisayi. ¹⁴ Nzuka mokolo nwa phutaka Yesu manyete na nwaa mozibolaka yo miyo, yabaka mokolo nwa Sabata. ¹⁵ Bafalisayi bamba motuna na bee ndengye'ye eya butwa yo iwene. Amba ya babuyisa yokye: Anzinga mungyinda o miyo, na mikunyosi, nabuto iwene. ¹⁶ Onte ya Bafalisayi bana bawoko bekye: Moto oyo taakumole Sabata, tali moto wa Nwaphongo. Kasi bayoko bawoko bekye: Moto wa masumu akokyi ikyela bilekyesako bibi ndengye'ye? Emba bokabanakye bonyosi onte ya be. ¹⁷ Bobele bamba kula tuna moto owa pholo miyo bekye: Ka we, kowo bo pho ya oezibosi miyo? Ali moimosi. ¹⁸ Kasi waaba bee naino sata banga baboti be, Bayuda tebaikaka eba obotshe apholoko miyo amba butwa iwene. ¹⁹ Bamba ya tuna baboti ba nwana me motuna mumu: Moto oyo ali phele nwana wa bee okowo bee obotshe abotama na miyo mapholo? Emba inwanwa eye kawene ndengye'ye? ²⁰ Baboti bamba buya bekye: Toebe obotshe eli nde phele nwana wa banga, abotama na miyo mapholo. ²¹ Kasi bobuto yo iwene inwanwa eye, banga toloebe. Oomozibosi miyo nza? Tolomoebe. Omotune, ali phomba, aimole yo mampenza! ²² Baboti bee bawoko babona pho bailaka Bayuda. Bee baokanaka itokolo moto munso okowo obotshe Yesu ali Klisto o ingambi sa makyita. ²³ Yango mena, baboti bawoko bekye: Yo nga ali phomba omotune yo mampenza. ²⁴ Mbala eya ibale. Bafalisayi bamba kula banga moto owa pholoko miyo, bamba wo ne bekye: Phe Nwaphongo ngambo! Banga toebe obotshe moto oyo ali moto wa masumu. ²⁵ Amba babuyisa yokye: Naebe nde ekpele yonoyo obotshe: napholoko miyo emba inwanwa eye nabuto iwene. ²⁶ Bamba wo ne bekye akyesi ye? Aezibosi miyo ndengye'ye? ²⁷ Amba babuyisa yokye: Nambo eyumola, kasi bee tookye! Pho ya'ye kozingye obotshe nakule eyumola mbala esuu? Emba na bee toli nde na phowa ya ibutwa baekosi bee? ²⁸ Bobele, Bafalisayi babuto imotola, bamba wo bekye: MOekosi nwe eli nde we! Banga toli baekosi ba Mose. ²⁹ Banga toebe obotshe Nwaphongo awoko na Mose, kasi moto mona, toloebe mbale euti yo! ³⁰ Moto me amba babuyisa: Eye eli lowo la ikamwa, obotshe bee toebe mbale euti moto oyo, kasi yo anzibosi miyo! ³¹ Banga toebe obotshe Nwaphongo taaokye bato ba masumu. Kasi bo moto ali mosam,besi wa phele, kambe kyela na phowa ya Nwaphongo, Nwaphongo kamookye. ³² Naino telookyi bawo obotshe moto azibosi miyo ma moto owa botama na miyo mapholo. ³³ Bo moto me tabakyi moto wa Nwaphongo, takokakyi ikyela na ekpele. ³⁴ Bamba ya buya bekye: Iwe wabotama onte ya masumu, emba kombe ya loteya? Bamba movaka o nze. ³⁵ Yesu aesi ya oka obotshe bamowiinye. Amba yakye vana ne, amba ya wo ne yokye: Iwe, koanole Nwana wa Moto? ³⁶ Amba ya buya yokye: Yo nza, Nkolo, obokye namoanole? ³⁷ Yesu amba wo ne yokye: Ombo mowene. Eli moto okowo nawe. ³⁸ Moto me yokye: Naanosi, Nkolo. Emba amba kusama o boo phe. ³⁹ Emba Yesu amba wo ne yokye: Naya o mokyisi pho ya iya sambisa, pho ya obokye baatebaika wene bawene, emba baabaka bawene bee sakula wene. ⁴⁰ Bafalisayi baabaka ne baokaka maphoo me, bambawo ne bekye: Bobo na banga topholo miyo me? ⁴¹ Yesu amba babuyisa yokye: Bo wabaka bato baapholo miyo, nde tobakyi na masumu. Kasi inwanwa eye kowo obotshe: Towene, oli ndebato ba masumu bobele.