¹ Naéwole nde phele phele obotshe, moto owa moba sanyolo yaa mozibo o lophango la mampate, kasi kabaa mopha mosüu, yo mona ali nwiibi na mobomi. ² Kasi okonyolo yaa mozibo, ali moòkosi wa mampate. ³ Siinzili amozibolela mozibo, na mampate maokye nwesi nwe. Mampate me, kamabangye, yonoyo na yonoyo na nkombo ya yango, emba kamatokolo o nze. ⁴ Waamatokolo yo manso, katambule o boo pha mango, emba mamobengye pho maokye pho maébe nwesi nwe. ⁵ Ete mabengye mobutu, kasi mamolota pho etemaébe nwesi nwa babutu. ⁶ Yesu amba bakpela ete mena, kasi tebaika sosolo ntina ya maphoo maawoko yo. ⁷ Yesu amba kula wo yokye: Naewole nde phele phele ngakye, nali mozibo nwa mampate. ⁸ Banso baaya o boo pha nga bali baibi na babomi, kasi mampate temaika baoka. ⁹ Inga nali mozibo. Bo moto anyosi o nzela yanga, amobika. Amokyende, amoya amba zwa na ya izaa. ¹⁰ Mwiibi yo kaye nde phoya iiba, pho ya iboma na ioto. Nga naya pho ya obotshe bato bazwe bomoo, bambe bozwa na boikye. ¹¹ Nga nali mookosi molaa wa mampate: mookosi molaa kambya bomoo phe pho ya mampate me. ¹² Ka moto okokyele etoma nde pho ya iphuti, tali owakolo mookosi wa mampate, tali na mokolo wa mampate. Waawene yo ngoo kyeye, kaikye ika mampate emba yo kalote. Emba ngoo kaya mabuta kambe na manyangola. ¹³ Pho ali moto okokyele etoma nde pho ya iphuti emba mampate temali na ntina pho ye. ¹⁴ Nga, nali mookosi molaa wa mampate, naebe mampate manga na mampate manga manzebe. ¹⁵ Boo konzebe Tata, na nga naebe Tata. Emba nambya bomoo phanga pho yamampate. ¹⁶ Nali na mampate masuu maatemali ma lophango lolo. Emba na mango mamana, nasengyesi imakamba. Ma mooka nwesi nwa nga emba ya moba nde bokanda bonobo na mookosi monomo. ¹⁷ Tata kazingye pho naambya bomoo pha nga pho ya ikula bozwa sima. ¹⁸ Moto taika bololo bomoo phanga, kasi naboambya nga mampenza. Nali na bokonzi pha iboambya na na bokonzi pha ikula bokpa: mena eli mobeko nwa zwa nga na Tata. ¹⁹ Maphoo me mamba kula ambya nde ikabana onte ya Bayuda. ²⁰ Baikye onte ya bee bamba wo bekye: Ali na bolobo bobe! ayeyee! pho ya'ye bee komookye? ²¹ Kasi baayoko bawoko bekye: Mena teli maphoo ma moto oli na bolobo bobe, bolobo bobe akokyi izibola miyo ma moto owa pholo miyo? ²² Yabaka imbele sa sekye. Bakyelaka eseleko ya iumunya mokolo nwa ingolaka bee Tempelo o Yelusaleme. ²³ O Tempelo, Yesu abaka kakye kaye o mozibo nwa Salomo. ²⁴ Bayuda baesi ya molungya, bamba wo ne bekye: Waa lolee ntema o ikolo nono mokolo ye? Bo oli Klisto, oloimole polele! ²⁵ Yesu amba ya babuyisa yokye: Nambo eyimola kasi bee toanole. Bitoma biikyele nga na nkombo ya Tata biwo pho ya nga, ²⁶ kasi bee tonzanole pho toli mampate ma nga. ²⁷ Mampate ma nga maokye nwesi nwanga, emba nga namaebe, mambe na mbenga. ²⁸ Emba nga, namaphe bomoo pha bobele. Ete mawe na mbala, na moto takokyi imabololo o maboko ma nga. ²⁹ Tata owa mampe alekyi na mwiya, emba na moto tali na makokyi ma ibololo ekpele o maboko ma Tata. ³⁰ Nga na Tata toli moto monomo. ³¹ Bobele, Bayuda bamba kula ya ongo mabanga pho ya imumaa. ³² Kasi Yesu amba ya babuyisa yokye: Naeteye bitoma biikye bilaa bauta oka Tata. Pho ya etoma iye ekyembe bee maa mabanga? ³³ Bayuda bamba mobuyisa bekye: Banga telolukye iemaa mabanga pho ya etoma elaa ekyesi we, kasi pho kotole Nwaphongo, na pho iwe oli nde moto, kobibuya we mampenza Nwaphongo. ³⁴ Yesu amba ya babuyisa yokye: O buku pha mobeko nwa bee, tebaika koma obotshe: Nga nawo ngakye: bee oli ba nwaphongo? ³⁵ Mobeko nwabangaka ba nwaphongo bato baawolekye Nwaphongo. Nzuka maphoo maakomama o buku pha Nwaphongo temakokyi imana. ³⁶ Ka owa kaba na owa toma Nwaphongo o mokyisi, bee kowo obotshe: Kotole Nwaphongo, pho nawo ngakye nali Nwana wa Nwaphomgo. ³⁷ Bo sikyele bitoma ba tata, bee sanzanola! ³⁸ Kasi bo nabikyele, na bo tonzanole, anola nono bitoma, pho oebe, ombe na eba na bolaa obotshe Tata ali onte ya nga nde booli nga onte ya Tata. ³⁹ Emba, bamba kula luka mbala esuu ya imoakya, kasi amba ya bembetene o maboko mabe. ⁴⁰ Yesu amba kula ya butwa o mopha moyoko nwa Yaladene, o elele eyabaka Yoane kabatisa phanza, emba amba ikala omo. ⁴¹ Bato baikye bamba ya ooli yo, bamba wo bekye: Phele, Yoane taika kyela na elekyesako yonoyo, kasi inso ya wo yo pho ya moto oyo ili phele. ⁴² Emba omo, bato baikye bamba moanola.