¹ Emba Yesu amba ya kye o ngomba ya Olive. ² Waakoma wa mumbengu, ambakula ya o Tempelo. Emba bowabaka bato banso baye oka ye, amba ya zala abuto ibateya. ³ Bobele, bateye ba mibeko na Bafalisayi bamba moyelela na nwanwasi monomo owazwaka be na lele mosuu, emba bamba ya moteya onte ya bato banso. ⁴ Bamba ya wo ne bekye: Moteye, nwanwasi oyo, tomozwe na lele mosuu. ⁵ O buku pha mobeko, Mose awo na banga obotshe tobome babasi ba ndengye mena na mabaka. Emba we, kowo bo? ⁶ Bawoko babona na maumunya ma imobekyisa izengye, pho bazwe eleko ya imophunda. Kasi Yesu, amba ya miinya, abuto iwala nzenze na munsee o manyete. ⁷ Waaba bee, balendendale nde na imotuna mituna, Yesu amba ya miinola, amba ya wo na bee yokye: Onte ya bee, otowaikakyela isumu, abe moto owa o boo wa imuma ibanga. ⁸ Emba kula yo miinya, akuli butwa iwala nzenze o manyete. ⁹ Waaoka be maphoo mamana, monomo na monomo atati imigbolo, tata na baphomba. Emba Yesu amba ya ikala yo mampenza na ona nwanwasi owa temekye onte ya iboko. ¹⁰ Yesu amba ya miinola, amba ya wo ne yokye: Nwanwasi, bee bawa? Na moto monomo taikyi emaa ibanga? ¹¹ Amba ya buya yokye: Nkolo, moto phe. Emba Yesu amba ya wo ne yokye: Na nga me, siiema ibanga. Kyende, kasi tata lolo sakula kyela isumu. ¹² Yesu akulaka wo na be yokye: Nali moo nwa mokyisi. Moto okombengye, etatambule o enzombi, amozwa moo mokambe o bomoo. ¹³ Emba Bafalisayi bamba ya wo ne bekye: Komiwole we mampenza! munoko nwawe tolokokyi imoanola. ¹⁴ Yesu amba babuyisa yokye: Eli phele obotshe namiwole nga mampenza, kasi munoko nwa nga moli nwa ianola, pho naebe mbale euti nga na mbale ekekye nga; kasi bee, toebe biuti nga na bi kye nga. ¹⁵ Bee kosambisa na ndengye ya bomoto. Inga siisambisa moto. ¹⁶ Emba bo eniba obotshe na sambisa, isambisa sa nga sili nde phele pho sili nga mampenza. ¹⁷ O mobeko nwa bee mampenza nga bakoma obotshe bo noko ya bato babale ikokaa bakokyi iianola. ¹⁸ Namiwole nga mampenza, emba Tata owantoma pho ya nga me. ¹⁹ Emba bamba wo ne bekye: Ongo ali bi? Yesu amba buya kokye: Toonzebe, tooebe na Tata. Bowanzebaka, okokyi ieba na Tata. ²⁰ Awoko maphoo mamana o elele ekye ambya bee makabo, waba yo kateya o Tempelo. Moto na monomo taika moakya, pho ngonga ye teyaikaka koka. ²¹ Yesu amba kula wo na bee yokye: Nakyende, wamunduka, kasi wamowa na masumu ma be. Elele ekekye nga, tokokyi ikyende omo. ²² Emba Bayuda bamba wo bekye: Ali na maumunya ma imiboma pho kawo yokye: Elele eya mokyende nga, tokokyi ikyende omo? ²³ Yesu amba babuyisa yokye: Bee oli bato ba o nse, nga nauti o ikolo. Bee oli bato ba mokyisi mumu, nga sili wa mokyisi mumu. ²⁴ Yango mena, nawokyi na be obotshe wamowa na masumu ma bee. Pho na bo toanosi obotshe Nali, wamowa na masumu ma bee. ²⁵ Emba bamba ya wo bekye: Iwe oli nza? Yesu amba babuyisa yokye: Ikyiiewole nga uta o etatele. ²⁶ Pho ya bee, nali na maphoo maikye ma iwo na ma isambisa, kasi owantoma kawo phele. Na yaoka nga ne, ili yango ikyi wo nga o mokyisi. ²⁷ Tebaikaka sosolo obotshe abawolekye pho ya Ango. ²⁸ Bobele, Yesu amba ya bawole yokye: Waamotomba bee Nwana wa Moto, wamoeba obotshe Nali, simbe nakyela maphoo na ndengye yanga mampenza, pho nakyele nkolo inso mphoo maamosepelisa. ³⁰ Waaba yo kawo babona, bato baikye bamoanolelaka. ³¹ Bobele Yesu amba ya wo na Bayuda baamoanolaka yokye: Bo oikasi ibanza maphoo ma nga, oli phele baekosi banga, ³² wamoeba maphoo ma phele emba maphoo me mamoeyikola. ³³ Bamba mobuyisa bekye: Banga toli bana ba Abalayama, teloli baombo ba moto: pho ya'ye kowo obotshe tomoikolama? ³⁴ Yesu amba ya babuyisa yoke: Nawo na be nde phele phele, ngakye, moto okokyele masumu ali moombo wa masumu. ³⁵ Moombo taikale nkolo inso o ingambi, kasi nwana, yo kaikale o ingambi pho ya bobele. ³⁶ Bo Nwana aesikosi, wamoba baakolo bato baaikola be. ³⁷ Naebe obotshe bee oli bana ba Abalayama, kasi pho maphoo ma nga temanyolo onte ya bee, kolukye imboma. ³⁸ Nga, nawo maphoo maawene nga oka Tata, kasi bee, kokyele maphoo maoka bee oka ango wa bee! ³⁹ Bamba mobuyisa bekye: Ango wa banga, eli Abalayama. Yesu amba ya wo na bee yokye: Bo oli bana ba Abalayama, kyela bitoma ba Abalayama. ⁴⁰ Kasi inwanwa eye, bee kolukye imboma, nga, oewosi maphoo maphele maoka nga oka Nwaphongo. Abalayama taika kyela babona. ⁴¹ Kasi bee, kokyele bitoma ba ango wa bee. Bamba mobuyisa bekye: Banga teloli bana baabota bee mi ebembi! Toli nde ango monomo, Nwaphongo! ⁴² Yesu amba ya wo na bee yokye: Bo Nwaphongo abakyi ongo wa be, nde wanzingaka, pho natokolo oka Nwaphongo namba kula uta nde oka ye. Siika ya na ndengye ya nga mampenza, eli Yo owantoma. ⁴³ Pho ya'ye bee toosolo ewosi yanga? Pho tookokye iyoka maphoo ma nga. ⁴⁴ Ango wa bee eli Zabulu, emba oli na phowa maphowa ma ango wa bee. Uta o etatele abaka nde mobomi wa bato, taika miambya i maphoo ma phele pho maphoo ma phele te mali onte ye. Waakate yo bole, loute o ndondo ye, pho ali moto wa boole na ango wa boole. ⁴⁵ Kasi pho yanga, pho na wo maphoo ma phele yango mena tonzanole. ⁴⁶ Moto nza, onte ya bee owa munteya isumu sakyela nga? Bo na wo maphoo ma phele, pho ya'ye bee tonzanolele? ⁴⁷ Moto wa Nwaphongo, kaokye maphoo ma Nwaphongo. Ka ootolio bee bato ba Nwaphongo, yango mena, bee toonzokye. ⁴⁸ Bayuda bamba mobuyisa bekye: Toloikaka longa waawoko banga obotshe oli Mosamaliya na na bolobo bobe? ⁴⁹ Yesu amba babuyisa yokye: Phe, sili na bolobo bobe; kasi nakumbele Tata, kasi bee, toonkumbele! ⁵⁰ Siika na luka nkyemo nga mampenza, moto mosuu ali okoiyambya na ookosambisa. ⁵¹ Naewole nde phele phele, bo moto abanze maphoo ma nga, etawe. ⁵² Emba Bayuda bamba ya wo ne bekye: Inwanwa eye tombi ya eba obotshe oli na bolobo bobe! Abalayama awa, na baimosi me, kasi we koya wo wekye: Bo moto kabanza maphoo manga etaa we. ⁵³ Iwe olekyi ango wa banga Abalayama owa wa? Na baimosi bawa me! Iwe kombe mikpa nza? ⁵⁴ Yesu amba babuyisa yokye: Bo namitatakyi nga mampenza, nkemo ya nga teibe na ntina. Eli nde Tata oko ntate, iyo okoanole bee obotshe ali Nwaphongo wa bee. ⁵⁵ Bee toika moeba, kasi nga namoebe. Bo nawoko ngakye simoebe, nde na ba nde ya bee: moto wa bole. Kasi namoebe emba nabanza maphoo me. ⁵⁶ Ango wa bee Abalayama, abaka na nkyisa ya iumunya obotshe amowene mokolo nwa nga. Awene mokolo me, emba atondaka na nkyisa. ⁵⁷ Waawo yo babona, Bayuda bamba wo ne bekye: Naino tokokye na mambula mako matano, emba wamba wene Abalayama! ⁵⁸ Yesu amba ya babuyisa yokye: Naewole nde phele phele, naino Abalayama sata botama, Nga Nali. ⁵⁹ Bobele bamba ya ongo mabanga pho ya imumaa, kasi Yesu amba mibomba, nono watokolo yo o Tempelo.