¹ Nsima me, Yesu aba nde ikyemikyende o manyete ma Galileya. Taikaka benela ikyemikyende o manyete ma Yuda waabaka Bayuda balukye imoboma. ² Nzuka eseleko ya Bayuda eya ndalaku yabutwaka phenephe. ³ Bobele, bana nyango bamba ya wo ne bekye: Mana wawa okyende o Yuda pho baekosi ba we, na bee me, bawene bitoma biyele we. ⁴ Moto okozingye obokye bato bamoebe, takyele maphoo me mi ibombo. Pho kokyele bitoma ndengye eye, omiweninya o mokyisi! ⁵ Pho bana nyango mampenza tebaikaka moanola. ⁶ Emba Yesu amba wo na bee yokye: Imbele sa nga naino tesikokyi. Imbele saaka bee sakoka. ⁷ Mokyisi temokokyi iyeina. Kasi nga, mokyisi munzine pho nawo ngakye bitoma ba bee bili bibe. ⁸ Kyende o eseleko mena. Pho ya nga, esikye omo, pho imbele sanga naino tesikokyi. ⁹ Nsima ya iwo babona, amba ikala o Galileya. ¹⁰ Kasi waakye banaa nyango o eseleko, ne amba yakye omo, samiweninya, akyekye nde mi ibombo. ¹¹ Onte ya eseleko, Bayuda bamolukaka emba bamba wo bekye: Ani baa bi? ¹² Onte ya moluku nwa bato, baikaka ziko pho ye. Bana bawoko bekye: Ali moto wa maphoo mala, bayoko bekye: Phe, kakosa bato. ¹³ Nabo babona, moto na monomo tamekaka iwo polele pho ye, pho ya iila Bayuda. ¹⁴ Waakoma bee onte ya eseleko, Yesu amba ya kye o Tempelo abuto iteya. ¹⁵ Bayuda bakamwaka na mateya me emba bamba wo bekye: Ndengye'ye iyo taika ekola kambe eba maphoo makoma be? ¹⁶ Yesu amba babuyisa yokye: Mateya manga temaute na nga, kasi na owantoma. ¹⁷ Bo moto kazingye ikyela phowa ya Nwaphongo, amoeba bo mateya mamana maute na Nwaphongo naa bo namiwole nga mampenza. ¹⁸ Moto oko wo pho ye, kalukye nkemo ye mampenza. Kasi ookolukye nkemo ya owantoma, ali na maphoo maa phele. Emba bole teboli onte ye. ¹⁹ Teli Mose owa ephe mibeko? Kasi nono moto monomo onte ya bee takyele bokowo mibeko: Pho yaye kolukye imboma? ²⁰ Moluku nwa bato bamba mobuyisa bekye: Oli na molemba o nzoto ya we! Okolukye iyeboma nza? ²¹ Yesu amba kula yakpa maloba amba wo na bee yokye: Nakyesi nde etoma yonoyo, bee banso okamo! ²² Mose awoko na bee obotshe obelekye bana ba bampele, - lauta na bankoko kasi na Mose phe - emba bee kolokyele na mokolo nwa Sabata. ²³ Ka bo bee kobele moto mokolo nwa Sabata na nka eya obotshe Mobeko nwa Mose mooto, ka phoyaye kontombele pho nabikye moto mokolo nwa sabata? ²⁴ Sakyeka maboo ma bato bo kotene bolombe, kasi tena bolombe na bosembo. ²⁵ Bato ba Yelusaleme bawoko bekye: Mena teli ookolikye bee obotshe bamobome? ²⁶ Kyeka kawo mi pha emba teba mowole na lowoo! Bakonzi ba banga baebaka phele obotshe eli nde yo Klisto? ²⁷ Kasi moto oyo banga toebe biuti yo, nzuka imbele samoya Klisto, na moto etaebe biuti yo. ²⁸ Bobele Yesu owateyaka o Tempelo, aimolaka yokye: Konzebe! Koebe biuti nga? Kasi sikyi ya na ndengye yanga mampenza. Owantoma kawo ya phele, yo otoebe bee. ²⁹ Nga namoebe pho naute oka ye, eli yo owantoma. ³⁰ Emba bambaka luka nde imoakya. Kasi na moto taika na moakya pho ngonga ye teyataaka koka. ³¹ Onte ya moluku nwa bato, baikye bamoanolaka, bambaka wo bekye: Waamoya Klisto, amokyela bilekyesako biikye koleka bikyele moto oyo? ³² Yaabaka bee bakyemikolo onte ya moluku nwa bato pho ye, yakomaka o matoo ma Bafalisayi. Emba banganga banene na Bafalisayi bamba ya toma bapulusi pho ya imoakya. ³³ Yesu amba wo yokye: Nata kuta kula ba na bee nwana imbele, emba namokyende oka owantoma. ³⁴ Bee wamunduka kasi ontonzwe. Pho elele eya moba nga, bee otokome omo. ³⁵ Tata wamo, Bayuda babutwaka iwono onte ya bee bekye: Amuna kyende mi elele iye eyamobaa banga sakye mozwa? Amokye benga bakyeminyangwa onte ya Baela? Amokye teya Baela? ³⁶ Maphoo maawo yo mamana malukye iwo bo: Bee wamunduka kasi otonzwe, na obokye: Elele eyamoba nga, bee otokome omo? ³⁷ Mokolo nwa suka ya eseleko, muna molekye nkolo iso, Yesu aesi ya teme, abuto iimola yokye: Bo moto ali na phowa ya maa, aye oka nga, ambe ya nywa. ³⁸ Moto ookonzanole; bowawo buku pha Nwaphongo: Uta o ndondo ye, bibale ba maa ma bomoo biamolukwa. ³⁹ Awoko babona na Bolobo pha sengyelaka izwa bato baamoanolela. Na bosembo Bolobo tephataka ba pho Yesu tataka zwa naino nkemo. ⁴⁰ v 40 Onte ya moluku, bato baokaka mapho me, bakyi bekye: Nde phele, kyeka Moimosi! ⁴¹ Bana bekye: Klisto akokyi itokolo o Galileya? ⁴² Buku pha Nwaphongo tebowo obotshe amoba wa bosoo Davide, emba amouta o Beteleme, mokyisi mokyi nwaauta Davidi? ⁴³ Yango bamba kabwana phoye. ⁴⁴ Bato bayoko onte ya be, balukaka imoakya, kasi na moto monommo taika mokuma. ⁴⁵ Bobe babulusi bamba yabutwa oli banganga banene na Bafalisayi. Bamba yawo na babulusi obotshe: Phoya'ye bee toikyi ya ne? ⁴⁶ Babulusi bamba yabuya bekye: Moto tawo bokowo moto mona! ⁴⁷ Bafalisayi bamba wo na bee bekye: Olukakyi na bee imoanolela me? ⁴⁸ Onte ya bamkumu na Bafalisayi, wali monomo o moanolesi? ⁴⁹ Eli nde moluku nwa bato bate baebe mobeko, bato baaza be! ⁵⁰ Kasi monomo onte ya Bafalisayi, Nikodeme owa kyekye oka Yesu phanza, yokye: ⁵¹ Mobeko nwa banga munyete moto bo naino tomokyi naa ieba maphoo makyele yo? ⁵² Bamba mobuyisa bekye: Nawe toli moto wa Galileya? Luka na bola emba wamowene obotshe o Galileya, tewakokyi itokolo moimosi. ⁵³ Bamba ya butwa moto na moto o ingambi se.