¹ Nsima me, Yesu amba yakatisa o mokukulu moyoko nwa ebale enene ya Galileya, ekyebangye na bee Tiberias. ² Moluku nwa bato nwabaka momobengye pho bato bawenekye bilekyesako biabaka yo kakyele oka bato baa malosi. ³ Yango mena Yesu amba ya baa o ikolo sa ngomba akye zala omo yo na baekosi bee. ⁴ Yabaka o boo pha eseleko ya Bayuda eya ilekana. ⁵ Nzuka watomba Yesu miyo o ikolo bobo, amba yawene moluku nwa bato moye oli yo. Amba ya wo na Filipe yokye: Tomoomba mapa pho ya obotshe bato baba baze bi? ⁶ Wawo yo babona, amumekaka. Pho yo aebaka lowo lamokyela yo. ⁷ Filipe amba ya mobuyisa yokye: Nabo toombi mapa ma baphalanga bakokyi na iphuti sa nkolo mikama mibale, etemaakokye obotshe moto na moto azwe nono nwana etee. ⁸ Monomo na baekosi be, okobangye be Andele, nwana nyango na Simo Petelo, amba ya wo ne yokye: ⁹ Munzenga monomo wawa ali na mapa matano na swe ibale. Kasi ina yango mina yamokyela ekpele'ye pho ya boikye pha bato bobo? ¹⁰ Yesu yokye: Obazasa o se. Bobele bamba ya zala. Babaka phenephe bambele nkoto itano. ¹¹ Emba Yesu amba ya kpa mapa, aphe Nwaphongo melesi emba amba ya makabela bato banso baabaka wamo. Abaphekye nde na phowa ya moto na moto. ¹² Waaoka bee ntoma, Yesu amba ya wo na baekosi bee yokye: Anginya bitee binso biikasi, pho ekpele yonoyo sabunga. ¹³ Bamba ya biangyinya, bamba tonza banyanzima iko mbuka babale na bitee ba mapa maazaka be. ¹⁴ Waawene bato elekyesako eyauta yo ikyela, bekye: Oyo ali owaakolo moimosi, oosengyesi iya o mokyisi. ¹⁵ Kasi Yesu waebaka yo obotshe bakokyi iya mokpa na bokusi pho ya imobuya mokonzi, ambakula mana wamo, yo mampenza amba baa o ngomba. ¹⁶ Wakoma nkokolo, baekosi bee bamba yauta nono o ebale enene. ¹⁷ Bamba ya baa o vato bonobo bamba ya kye o Kapalanauma, o mokukulu moyoko. Mena bunya bombo inda, emba Yesu naino bunya sataa babenga. ¹⁸ Ewele enene yeesi ya kyela, ebale ebuto iphukubana. ¹⁹ Balukaka phenephe na bakyilometele batano naa motoba, waa wene bee Yesu katambule o ikolo sa maa, kambe koma phenephe na vato. Emba bee bailaka, ²⁰ kasi Yesu amba wo na bee yokye: Bee saila, eli nde nga! ²¹ Bazingaka imokpesa o vato, kasi sakoko, vato bokye seme o elele eyakyekye be. ²² Bo yana, moluku nwa bato nwa ikalaka o mokukulu moyoko, nwamba ya eba obotshe yabaka wamo nde vato bonobo, Yesu taikaka kye na baekosi bee elele yonoyo, bee bakyekye bee mampenza. ²³ Kasi maato mayoko mautaka o Tiberias makomaka phenephe na elele eya zaka bee mapa nsima ya Nkolo iphe melesi. ²⁴ Waaeba moluku nwa bato obotshe ebe Yesu, ebe baekosi bee tebakuli baa wamo, bato bamba ya kpela o mato emba bamba yakyende o Kapalanauma, ikye miluka Yesu. ²⁵ Emba wamozwa bee o mopha moyoko nwa ebale enene, bamba wo ne bekye: Labi, okomi wawa imbele ye? ²⁶ Yesu amba babuyisa yokye: Naewole nde phele phele ngakye: toondukye pho ya obotshe wawene bilekyesako, kasi pho wazaka mapa wambaka na maoka. ²⁷ Osengyesi imiambya o etoma pho ya ozwe ntoma yiteiunve, ya moephe Nwana wa Moto, kasi pho ya ntoma ikyi otono phe. Pho eli Tata, yo ooli Nwaphongo, owa mophe bokonzi. ²⁸ Bobele bamba ya wo ne bekye: Tosengyesi ikyela boo pho ya ikyela bitoma biizingye Nwaphongo obotshe tobikyelele? ²⁹ Yesu amba babuyisa yokye: Etoma ya Nwaphongo eli nde ianolela owatoma yo. ³⁰ Bamba ya mobuyisa bekye: kasi we, elekyesako iye eyamokyela we pho toewene emba tombe eanolela? Etoma ya we iye? ³¹ O obokye, baango ba banga bazaka mana, nde bowakoma bee obotshe: Abaphekye ya iza, mapa maute o ikolo. ³² Kasi Yesu amba wo na be yokye: Naewole nde phele phele, teli Mose owaephekye mapa ma ikolo, kasi eli nde Tata okoephe maakolo mapa ma ikolo. ³³ Pho mapa ma Nwaphongo, eli nde yo okoute o ikolo na okoambya bomoo omokyisi. ³⁴ Emba bamba ya wo ne bekye: Nkolo olopekye nkolo inso mapa me. ³⁵ Yesu amba ya wo na bee yokye: Eli nde nga oli ipa sa bomoo, moto okoye oka nga etakule oka nzala. Moto okonzanole etaokye phowa ya maa. ³⁶ Kasi naambo wo ngakye: bee oweni kasi toanole. ³⁷ Bato banso bampe Tata, bamoya oka nga, emba okoye oka nga, esi movakye; ³⁸ pho nauta o ikolo pho ya iyakyela bokozingye owantoma, kasi bokozingye nga phe. ³⁹ Nzuka phowa ya owantoma eli obotshe nga sabunga nono moto monomo mi baampe yo, kasi obotshe nabakundole o mokolo nwa suka. ⁴⁰ Phowa ya Tata yango eye: moto munso oweniNwana ambi na moanola, azwe bomoo pha bobele. Emba nga, naamokundola o mokolo nwa suka. ⁴¹ Tata wamo, Bayuda babuto ingungubana ne pho awoko obotshe: Nali ipa siute o ikolo. ⁴² Emba bambaka kula wo bekye: Teli yo Yesu, nwana wa Yosefi? Teloebe nyango na ango? Ndengye'ye akokyi iwo inwanwa eye obotshe: Nauta o ikolo? ⁴³ Yesu amba kula ya babuyisa yokye: Le ingungubana onte ya bee! ⁴⁴ Moto takokyi iya oka nga bo Tata owantoma tamokambi, emba nga naamokundola o mokolo nwa suka. ⁴⁵ Baimosi bakoma bekye: Bato banso bamoteyama na Nwaphongo. Moto munso owaoka yauta na Tata na ambi na anola mateya me, kaye oka nga. ⁴⁶ Eli obotshe na moto taika wene Tata, bo teebe nde owauta na Nwaphongo. Iyo, awenw Tata. ⁴⁷ Naewole phele phele, moto okoanole ali na bomoo pha bobele. ⁴⁸ Nali ipa sa bomoo. ⁴⁹ O obokye, baango ba bee bazaka mana, emba bawa. ⁵⁰ Mapa maute o ikolo mali obotshe moto owa mazaa, etaawe. ⁵¹ Nali ipa sa bomoo siuti o ikolo. Moto owamoza ipa me amoba na bomoo pho ya bobele. Emba ipa samoambya nga, eli nzoto yanga, yambyami pho ya obotshe mokyisi mozwe bomoo. ⁵² Yango mena, Bayuda bamba butwa iika ziiko na bokusi onte ya be, bekye: ndengye'ye moto mona akokyi ilophe nzoto ye obokye toize? ⁵³ Yesu amba yawo na be yokye: Naewole nde phele phele, bo toze nzoto ya Nwana wa Moto, bo tombi na nywa malongo me, otoozwe bomoo. ⁵⁴ Moto okoze nzoto ya nga, na okonywe malongo ma nga, ali na bomoo pha bobele. Emba nga, naamokundola o mokolo nwa suka. ⁵⁵ Pho nzoto yanga ili yaakolo ntoma, na malongo manga eli maakolo maleku. ⁵⁶ Moto okoze nzoto yanga, na okonywe malongo ma nga, na naga nali onte ye. ⁵⁷ Emba bo wantoma Tata ooli na bomoo na obotshe nali na bomoo pho ye, yango mena moto owamoza nzoto yanga, amoba na bomoo pho ya nga. ⁵⁸ Ipa sauta o ikolo sili bobo: sikyese na saazaka baango ba bee. Bee bawa, kasi moto owamoza ipa siwene bee sisi, amobaa na bomoo pho ya bobele. ⁵⁹ Mena yabaka mateya ma Yesu o mangambi ma makyita ma Bayuda o Kapalanauma. ⁶⁰ Nsima ya imooka, baekosi bee baikye bamba butwa iwo bekye: Iloba sisi sili sikusi! Okokyi imooka nza? ⁶¹ Kasi waeba yo mampenza obotshe baekosi bee bangungubane pho ya iloba me, Yesu amba wo na bee yokye: Iloba me siephe yo? ⁶² Emba bombi wene Nwana wa Moto kabaa o elele eyabaka yo phanza...? ⁶³ Eli nde Bolobo okoambya bomoo, nzoto tikyele ekpele. Maphoo maewosi nga, mali Molimo n bomoo. ⁶⁴ Kasi wali baayoko onte ya bee, bate baanole. Pho Yesu aebaka tata o etatele baabaka bawa bate baika anola na nza owamuungya. ⁶⁵ Amba kula wo yokye: Yango mena, nawokyi na be obotshe: Moto takokyi iya oka nga bo Tata tamoanolesi. ⁶⁶ Tata mokolo mamuna, baekosi bee baikye bamanaka emba tebakulaka mobenga. ⁶⁷ Emba Yesu amba ya wowoo na Iko mbuka babale yokye: Na bee, tozingye na bee ikyende? ⁶⁸ Simo Petelo amba ya mobuyisa yokye: Nkolo, tomokula kyende oka nza? Iwe oli na maphoo ma bomoo pho ya bobele. ⁶⁹ Na banga, toanosi emba toebi obothse oli Mosantu wa Nwaphongo. ⁷⁰ Yesu amba babuyisa yokye: teli nga moto owa eolo, bee Iko mbuka babale? Emba monomo na bee ali zabubulu! ⁷¹ Awoko babona na Yudasi, nwana wa Simo Mosikaliyoka. Pho yabaka yo owamuungya, iyo mampenza na Iko mbuka babale.