¹ Nsima ya maphoò mamana, wa imbele sa esèleko ya Bayuda, Yesu amba ya kyende o Yelusaleme. ² Nzuka o Yelusaleme phenephe na mozibo mootangye nwa bampate, wali mbondo yonoyo ekye bangye be na munoko nwa Baébele Betezatezata. Mokanda mono nwa milaku mitano, nwabaka wamo, ³ o milaku mèe, bato ba malosi baikye babaka bamilangya omo, bato bapholo miyo, bakpekusa, banyiba binango. ( Babaka baziya obotshe maa maphukubane, ⁴ Pho anzelu wa Nkolo abaka kaüte o mbondo imbele siiyoko pho ya iphukubinya maa. Moto wa bolosi owakyekye mikumbya o maa me phanza waphukubane mango, abikaka na bolosi phe na bo bolosi me phabaka ndengye'ye. ⁵ Moto monomo owa nyiba enango mambula makoo mato mbuka nwambi abaka omoò. ⁶ Wamowene Yesu alangyi, nawaéba yo obotshe akokyi na elème mena, amba wo ne yokye: Oli na phowa ya ibika? ⁷ Mooka amba ya mobuyisa yokye: Nkolo, sili na moto nwa inkumbya o mbodo imbele sii phukubane maa. Imbele sikusubane nga obotshe nakye mikumbya, moto moauu kaingyele angwa oboo phanga. ⁸ Yesu amba ya wo ne yokye: Langwa, kpa itiko sawe, tambula. ⁹ Mina wamo, moto me abikyi. Aési yakpa itoko se, abuto itambula. Nzuka mokolo me yabaka mokolo nwa sabata. ¹⁰ Pho ya bomoò, Bayuda bamba ya wo na moto obikyi bekye: Eli mokolo nwa sabata, tosengyesi iphila itoko sa we. ¹¹ Kasi amba babuyisa yokye: Moto ombikye, eli nde yo moto owo na nga obotshe: Kpa itoko sawe otambule. ¹² Bamba motuna bekye: Moto mè nzaa owo nawe obotshe: Kpa itoko sawe otambule: ¹³ Kasi moto owabikyaka be taikaka eba nza oo mobikye, pho Yesu amanaka wali moluku nwa bato babaka wamo. ¹⁴ Nsima, Yesu amba kula kye mozwa o Tempelo, amba wo ne yokye: We mona obikyi, sakula kyela masumu pho lowo losuu lolodi bobe saeyelela ¹⁵ Bobele, moto me amba kyende imola Bayuda obotshe ebakyi Yesu moto oomobikye. ¹⁶ Tata wamo, Bayuda bamba yaokyela Yesu yoo, pho akyelaka babona mokolo nwa sabata. ¹⁷ Kasi Yesu amba ya babuyisa yokye: Tata, nono imwanwa eye ali o ikyela etoma. ¹⁸ Tata wamo, Bayuda bakulaka luka na boikye malondo ma imoboma, teli nde pho taikaka kumola mokolo nwa sabata, kasi na pho abaka kabangye Nwaphongo obotshe ali Ango, kambe na kula mimekyinya na Nwaphongo. ¹⁹ Yesu amba kula ya kpa maloba amba bawole yokye: Nawo nabe nde phele phele. Nwana takokyi ikyela lowo na ndengye'ye yo mampenza, kasi nde ikye wene yo Ango kakyele: pho iikyi kyele Tata, Nwana kaikyele nde bomo. ²⁰ Eli obotshe Tata kazingye Nwana emba kamoteya inso iikyikyele yo. Amoteya bitoma bikuli leka bonene, na obotshe bee obe kokamwe nde bokamo. ²¹ Pho booko akole Tata bawe kakule babuya na bomoo, Nwana ne kabikya nzaa ozingyi yo. Tata taasambisa moto, ambya isambisa sinso oka Nwana, ²³ obotshe bato banso bakumole Nwana bookokumole bee Tata. Moto ootokumole Nwana, taakumole na Ango owa motoma. ²⁴ Nawo na bee nde phele phele, moto okookye maloba manga, kambe na anolela owantoma, ali na bomoo pha bobele. Yo etasambe, kasi yo amokundwa onte ya bawe, amozwa bomoo. ²⁵ Nawo nabe phele phele, imbele siiye, emba inwanwa eye imbele me sili wawa, bawe bamooka nwesi nwa Nwana wa Nwaphongo emba bato bamooka nwesi me, bamoba na bomoo. ²⁶ Phoo, boli Tata na bomoo yo mampenza, nde bomoo aphe Nwana obotshe abe na bomoo me yo mampenza. ²⁷ Amophe bokonzi pha isambisa pho ali Nwana wa Moto. ²⁸ Mapho manso mama mango saekamwusa! Imbele siiye, banso bakyimele o malita bamooka nwesi nwe, ²⁹ emba banso baakyelaka bolaa bamokundwa phoya izwa bomoo. Baakyelaka bobe, bamokundwa pho ya isambisama. ³⁰ Nga sikokyi ikyela lowo na ndengye yanga mampenza: natene bolombe nde na noko yookyi nga, emba bolombe phanga boli pha bosembo pho siilukye ikyela boozingyi nga, kasi boozingyi owantoma. ³¹ Bo namiwole pho ya nga mampenza, bowokye pha nga nde tebo pha phele. ³² Eli nde mosuu okowo pho ya nga, emba naebe iwo siiwo yo pho ya nga sili sa phele. ³³ Bee, watomaka bato oka Yoane Mobatise. Aewole maphoo ma phele. ³⁴ Ka nga, sisengyesi na moto obotshe awo pho ya nga. Nawo babona pho ya bee, obokye obikye. ³⁵ Yoane abaka tala ekyelosa bee emba kyelole: kasi bee wazingaka ikumba nde pho ya nwana imbele na saa ya tala me. ³⁶ Kasi nga, nali na maphoo ma iewole malekyi maaka Yoane na bonene: eli bitoma Tata obotshe nabikyele. Nabikyele, emba eli bee biiwole pho ya nga obotshe Tata antoma. ³⁷ Tata owantoma awo na yo mampenza pho ya nga. Kasi toika oka nwesi nwe na mbala, naa iwene boo phe. ³⁸ Emba iloba se tesili onte ya bee, pho bee tooanolele owatoma yo. ³⁹ Bee koekole Buku pha Nwaphongo pho koumunya obotshe wamozwa omo bomoo pha bobele. Kasi eli nde phango boowo pho yanga. ⁴⁰ Emba toozingye iya oka nga pho ya iya zwa bomoo pha bobele. ⁴¹ Nkemo, siika izwa na bato. ⁴² Kasi naeyebe, bee toli na lozingo la Nwaphongo onte ya bee. ⁴³ Inga, naesi o nkombo ya Tata, emba bee toikyi benela inzamba. Ka bo moto mosuu aesi na nkombo ye mampenza, yo moona bee wamoyamba! ⁴⁴ Bee nde ombi anola ndengye'ye, bee bazwa nkemo ya bee onte ya bee na bee. Bee bate balukye nkemo ikyiute na Nwaphongo yo mampenza? ⁴⁵ Saumunya obotshe yamoba nga owamokye esongyela oka Tata. Mosongyesi wa bee, eli Mose okolemele bee. ⁴⁶ Pho bokoanolele Mose, nde onzanolelakyi me, pho akomaka nde pho ya nga. ⁴⁷ Bo tooanole yaakoma yo, wamba anola iikyi wo nga ndengye'ye?