¹ Waéba Yesu obotshé Bafalisayi baoka obotshé yo kazwe baékosi baikye kambe na batisa bato baikye koleka Yoane. ² O bosembo Yesu yomampenza taikaka baa kabatisa, kasi ya batisaka nde baékosi bèe. ³ Amba ya mana o Yuda, aési ya butwa o Galileya. ⁴ Pho ya ibutwa omo asengyelaka ikatisa Samaliya, ⁵ amba ya koma o mokyisi monomo nwa Samaliya mobangye bè Sukala, phenephe na manyete maphekye Yakobo nwana we Yosefi. ⁶ Elele mè eyabaka iziba sa Yakobo. Nabophembekye pha itambula, Yesu aési yakye zala imbale ya mungombe nwa iziba. Yabaka phenephe na bunya imoto. ⁷ Ikyeka bobo nwanwasi monomo wa Samaliya aési ya toka maa. Yesu amba yawo nè yokye: Impe maa ma inywa. ⁸ Baékosi bèe bakyekye o mokyisi munene pho ya ikye omba ntoma ya izaa. ⁹ Kasi nwanwasi mè Mosamaliya mona amba ya wo na Yesu yokye: Lotati bo, iwe Moyuda, konzongye nga nwanwasi mosamaliya maa ma inywa, pho Bayuda tebaa benele iyangana ekpele yonoyo na Basamaliya. ¹⁰ Yesu amba ya mobuyisa yokye: Booébakyi ikabo sa Nwaphongo na okoéwole obotshé: Impe maa ma inywa! Ebakyi nde we moto wa imoonga, emba yo nde aéphekyi maa ma bomoo. ¹¹ Nwanwasi amba wo ne yokye, Nkolo, toli na ná tubu, na iziba sili sizindo; mana maa ma bomoo mè wamazwa bi? ¹² Iwe olekyi ango wa banga Yakobo owa loikyela iziba sisi, saaikaka nywayo maa, ebe na bana bèe ebe na bibuwa bèe? ¹³ Yesu amba ya mobuyisa yokye: Moto munso okonywe maa mama amokula oka phowa ya maa; ¹⁴ kasi moto owa munywa maa maamophe nga etakule oka phowa ya maa, pho maa mamophe nga mamubutwa ndokolo elele ekye tokolo maa onte yè nono o bomoo pha bobele. ¹⁵ Nwanwasi amba ya wo ne yokye: Nkolo impe maa me pho nga sakula oka phowa ya maa ma inywa, nga sambaka kula naya wawa pho ya iyatoka maa. ¹⁶ Yesu amba ya wo nè yokye, kye banga molonyawe emba be baso oye wawa. ¹⁷ Nwawasi amba ya mobuyisa yokye: Nga sili na moloo. Yesu amba ya mobuyisa: Kowo na bolaa obotshé sili na moloo. ¹⁸ Pho waünva zala na baloo batano, emba lele oli nawe unwanwa eye tali molo wawe. Na bomo owo phele. ¹⁹ Emba nwanwasi amba wo ne yokye, Nkolo, nawène obotshé oli moimosi. ²⁰ Baango ba banga basambelaka Nwaphongo o ngomba eye; emba bèe kowo obotshé elele ya isambela Nwaphongo eli nde o Yelusaleme. ²¹ Yesu amba ya wo ne yokye, Mama inzanole, imbele sa moya ete bakule sambela Tata na o ngomba eye, na o Yelusaleme. ²² Kosambele itiyebe bèe; kasi banga tosambele ikyiebe banga, pho lobiko loüte na Bayuda. ²³ Kasi imbele sa moya sango sisi, saa mosambela baakolo basambesi ba Tata, na bolobo na ná phele; pho mena eli basambesi baalukye Tata. ²⁴ Nwaphongo ali molimo, yango mena bato baamosambelele basengyesi imosambela na molimo na ná phele. ²⁵ Nwanwasi amba ya wo nè yokye: Naébe obotshe Masiya monomo asengyesi iyaa (okobangye bè Klisto); wamoya ya yo aloimola mapho manso. ²⁶ Yesu amba ya wo ne yokye: Masiya mè eli nga, okoéwole oyo. ²⁷ Imbele mè baékosi baési yakoma, bakamwaka na iwene obotshé Yesu kasolole na nwanwasi. Kasi na na moto taika motuna obotshé: Kolukye ye? na obotshé: phoya ye kosolole nè ? ²⁸ Bobele nwanwasi mona aikyi ika uuku yè, aési ya kye imola bato o lombo obotshé: ²⁹ Yaka yakye kyeka moto monomo onvosi mapho manso makyela nga; etebe nde yo Klisto? ³⁰ Bato baési ya tokolo o mokyisi, bamba ya kye oli yo. ³¹ Imbèle mè, baékosi babaka bamokandindisa bekye: Labi, taa za. ³² Kasi yo amba ya wo na bèe yokye: Nali na ntoma ya iza ite iebe bèe. ³³ Baékosi bamba butwa iwono onte ya bèe bekye: Bobo moto monomo animophe ntoma ya iza nde iye? ³⁴ Yesu amba ya wo na bè yokye: Ntoma yanga eli ikyela bokozingye owantoma na ikokya etoma ye. ³⁵ Bèe mampenza towo obotshé: Iikasi makombe mané emba imbele sa inoko mbuma sikokye. Kasi nga nawo na bèe ngakye: tomba miyo okyekye, mbuma ili o manzambi iosi ikokyi pho ya inoko. ³⁶ Munokyi ambozwa ifuti sè, kambe na bokya mbuma pho ya bo moo pha bobele. Na bomo, moto otophikye na okonoko bakumbe elele yonoyo. ³⁷ Pho ilowo lolo etee eye eli nde phele: Monomo kaphikye, omoyoko kanoko. ³⁸ Naetomaka ikye noko yaate yaikaka kumela be. Bayoko bakuma, emba be oesi be yazwa bolaa mi yakumelaka bebi na boikye. ³⁹ Basamaliya baikye ba mokyisi munene baanolaka Yesu pho ya maloba ma Nwanwasi mawoko yo obotshe: Anvosi maphoo manso makyelaka nga. ⁴⁰ Na wakoma be phenephe ne, Basamaliya baongaka ne obotshe ata baa na be. Emba amba kyela na be nkolo ibale. ⁴¹ Bato basu baikye bakulaka anola Yesu pho ya maphoo mawoko yo. ⁴² Emba bamba ya wo na nwanwasi mona, bekye: Teli obotshe tomoanosi nde pho ya maphoo maalumolakyi we, kasi na banga mampenza tomookyi, emba toebi obotshe ali phele mobikye wa mokyisi. ⁴³ Nsima ya nkolo ibale, Yesu amba ya mana o bilele me, amba ya butwa o Galilaya; ⁴⁴ pho yo mampenza anolaka obotshe moimosi tazwe ngambo o mokyisi nwe mampenza. ⁴⁵ Kasi wakoma yo o Galileya, bato ba Galileya bamoyambaka na bolaa. Bakyendekye o Yelusaleme pho ya eseleko, na be me, bawenekye inso yakyelaka Yesu. ⁴⁶ Yesu amba ya butwa o Kanaa o manyete ma Galileya, owabongolaka yo maa maleku. Mokonzi monomo wa baloo abaka na nwana we wa lele na bolosi o Kapalanauma. ⁴⁷ Waoka yo obotshe Yesu aüti o Yuda akomi o Galileya, amba ya kyende zwana ne, amba ya onga ne obotshe bakyende pho akyebikya nwana we wa lele oli nde mowe. ⁴⁸ Yesu amba ya wo ne yokye: Bo be toweni mayaa na bilekyesako be otoaonole! ⁴⁹ Mokonzi wa baloo amba ya wo ne yokye: Nkolo, yakye naino nwana wanga sa bowakye! ⁵⁰ Yesu amba ya wo ne yokye: Kyende, nwana wawe ali na bomoò. Moto mona amba yaanola maloba mamowosi Yesu, nono wabutwa yo. ⁵¹ Waba yo kabutwe, bato be batoma bamba ya mobenga o botshe: Nwana wawe wa lele ali na bomoò. ⁵² Amba ya batuna imbele ye sibutwakyi nwana na bolaa emba bamba mobuyisa bekye: Yabaka yana, o ngonga ya sambo wa mana mowewe o nzoto ye. ⁵³ Ango wa nwana awenekye obotshe yabaka ndo'osina imbele sawoko Yesu ne obotshe: Nwana wawe wa lele ali na bomoò. Mina wamo, yo na bonkpe phe bonso baési yaanola. ⁵⁴ Mena yabaka elekyesako eya ibale eyakyelaka Yesu o Galileya, waüta yo o Yuda.