¹ Yabaka onte ya Bafalisayi, moto monomo na nkombo Nikodème, monomo na bankumu ba Bayuda, ² Waa mokolo amba ya kyende oka Yesu, amba ya wo nè yokye: Labi, banga ttoébe obotshé oli moteye o wa toma Nwaphongo; pho na moto takokyi ikyela bilekyesako bikyele we bo Nwaphongo tali nè. ³ Yesu amba mobuyisa yokye: Naéwole nde phele, phele, ngakye bo moto takuli botama mbala eya ibale, takokyi iwene bokonzi pha Nwaphongo. ⁴ Nikodème amba ya wo nè yokye: Bo moto aünva koma phomba amokula botama ndengye ye? Akokyi ikula nyolo o ibu sa nyango emba ambe botama? ⁵ Yesu amba ya mobuyisa yokye: Nawo na we nde phele, phele ngakye, bo moto tabotami na maa na ná Bolobo, takokyi inyolo o bokonzi pha Nwaphongo. ⁶ Oo botami na bomoto ali moto, oo botami na Bolobo ali bolobo. ⁷ Sakamwa bo na wokyi nawe obotshé: Osengyesi ibotama o ikolo. ⁸ Ewèele kyekyènde mbale ezingyi yango, emba koéyokye, kasi toébe biüte yango na bikye yango. Eli nde bomo pho ya moto obotami na Bolobo. ⁹ Bobele Nikodème amba ya wo nè yokye: Lowo mè lamba kyelama ndengye ye? ¹⁰ Yesu amba ya mobuyisa yokye: Iwe oli moteye o Isalayele, emba toombe eba mapho mama! ¹¹ Naéwole nde phele, phele, towo mapho maébe banga, toimole mapho maawene banga; emba bè toanole ikyiimole banga. ¹² Bo toanole wa ewole nga mapho ma mokyisi, wamba anola ndengye ye bo naéwosi mapho ma ikolo? ¹³ Pho moto nono monomo taika ba o ikolo bo teébe nde Nwana wa Moto o waüta o ikolo. ¹⁴ Nde bowa tombaka Mose nzo o bokyé, esengyesi obotshé Nwana wa Moto atombame, ¹⁵ pho moto munso okoanole azwe na nzela ya bomoo pha bobele. ¹⁶ Pho Nwaphongo azinga mokyisi na boikye, yango mena ambya Nwana we nde yo monomo, pho ya obotshé moto munso okoanole Nwana mè yosa wa kasi azwe bomoo pha bobele. ¹⁷ Pho Nwaphongo taikaka toma nwana we o mokyisi pho ya iya sambisa mokyisi, kasi pho ya obotshé mokyisi mobitkye pho ye. ¹⁸ Moto okomoanole , taikyi sambisama; kasi moto oto anole ambosambisama, pho taikyi anola nkombo ya Nwana nde yo monomo wa Nwaphongo. ¹⁹ Emba isambisa mè sango sisi, moo' moési o mokyisi, kasi bato bazingyi enzombi o elele ya moo' pho bitoma babè babaka bibe. ²⁰ Pho moto munso okokyele mapho mabe kaine moo', emba tatokolo o moo' pho bitoma bè sawenene; ²¹ kasi moto pokokyele mapho malaa katokolo o moo' pho bitoma bèe biwènene, bitoma mè bakyelama onte ya Nwaphongo. ²² Sima mè, Yesu na baékosi bèe, baési ya kyende o Yuda; akyelaka na bè banaa nkolo omoo; mpe abaka kabatisa. ²³ Yoane nè abaka kabatisa o Ainona, phenephe na Salima, ooli maa maikye; bato babaka baya batisama. ²⁴ Pho Yoane naino tebataaka munyose o boloko. ²⁵ Baékosi ba Yoane bamba ya ika ziko bèe na Moyuda monomo pho ya lowo laa imikunyola bo wo mibeko ma bèè. ²⁶ Bamba ya kyende oka Yoane, bamba ya kye wo nè bèekye: Labi, moto owabaka na we o mokukulu moyoko nwa Yaladène, owa woko we pho ye, kyeka nè abuto ibatisa, emba bato banso babuto bakyènde nde oka ye. ²⁷ Yoane amba babuyisa yokye: Moto takokyi imiphe ekpele koleka eya mo phe bèe o ikolo. ²⁸ Bèe mampenza oli manzoka manga obotshé nawoko ngakye: Nga sili Masiya, kasi moto owa toma bè o boo phè. ²⁹ Moto oli na nwanwasi, ali moloo; kasi ekamba ya moloo otemi wamo, kamokye emba nwesi nwa moloo mumophe nkyisa nde boli nkyisa yanga nzikye. ³⁰ Esengyesi obotshé ngambo ye ebáa, emba eyaka nga eüte. ³¹ Okoüte o ikolo ali o ikolo sa inso; ooüti o mokyisi ali wa mokyisi, emba kawo ya mokyisi. Okoüte o ikolo ali o ikolo sa inso, ³² kaimole ya wene yo na yaa oka yo, emba na moto taanole ikyiimole yo. ³³ Moto okoanole ikyiimole yo kaanole obotshé Nwaphongo ali phele; ³⁴ pho owa toma Nwaphongo kawo maloba ma Nwaphongo, ooko mophe Bolobo bo teboli na ndelo. ³⁵ Tata kazingye Nwana emba inso aiyambya o maboko mèe. ³⁶ Moto okoanole Nwana ali na bomoo pha bobele; moto otokumole Nwana etawene bomoo, kasi yoo ya Nwaphongo eli mi yo.