¹ Mokolo nwa iyato, eseloko ya bolonga yabaka o Kana o manyete ma Galileya. Emba nyango wa Yesu abaka wamo, ² Yesu na baékosi bè ba babangaka na bè o eseleko mè. ³ Waünva maleku, nyango wa Yesu amba ya wo nè yokye: Teba kuli ba na maleku. ⁴ Yesu amba ya mobuyisa yokye: Mama, nga na we lowo ye? Imbele sanga nino tesi kokyi. ⁵ Nyango amba ya wo na bato ba etoma yokye: Kyela inso ya moéwole yo. ⁶ Nzuka, mambèkyi motoba maakyela bè na mabanga, maabaka bayuda bakyelele pho ya imikunyola boo, okowo mibeko ma bè; mbeki yonoyo yonoyo kyenyolo ba litele nwambi na iko. ⁷ Yesu amba ya wo na bato baétoma yokye: Tonza mambekyi mamana na maa. Emba bamba matonza nono o munoko. ⁸ Yesu amba ya wo na bè yokye unwanwa eye yoka ndambo ya maa mè, okye maphe mokolo wa eseleko. Bamba ya kye mophe mango. ⁹ Emba waamameka yo, maa mabuto maleku. Taikaka eba biüte mango, yaebaka nde baatokaka mana maa. bobele mokolo eseleko amba ya wo na molongyi, ¹⁰ yokye: Moto munso kataakaba maleku swaswa phanza, bo bato babangyi bè balangyi, baambe ya ambya maleku ma mpiko. ¹¹ Mena eli etatele sa bilekyesako ba Yesu o Kana o manyete ma Galileya. Ateyaka nkyemo yè, emba baékosi bèe bamba moanolela. ¹² Sima ya yango, amba ya kyende o Kapalanauma, yo na nyango, na banaa nyango nana baékosi bè. Kasi bakyela omo nde banaa nkolo. ¹³ Eyenga ya Ilekana ya Bayuda yakomaka phenephe, emba Yesu amba ya kyende o Yelusaleme. ¹⁴ Amba yakye zwa o Tempelo Baüngye ba mangombe, ba mampate na mankoto nwinya na baéndinye ba baphalanga bazasi omo. ¹⁵ Ndokolo, kambe ya kyela phimbo ya nsimbi amba baünwinya bèe banso o Tempelo, ebee mampate na mangombe, amba nyangola baphalanga ba baéndinye, amba bungutinya ba mesa ba bè; ¹⁶ amba ya wo na bè baüngye ba mankoto nwenya yokye: Manya inso mina wawa emba sabuya ingambi sa Tata ingambi sa mumbongu. ¹⁷ Baékosi bè bamba umunya obotshé bakoma obotshé: Phowa ya ingambi sa we yamumboma. ¹⁸ Bayuda bamba ya wo nè bèkye: Iyaa ye saaloteya we, bokokyele we babona? ¹⁹ Yesu amba ya babuyisa yokye: Uwola Tempelo eye emba nga namoétonga na nkolo iyato. ²⁰ Bayuda bamba wo nè bekye: Tempelo eye ekyesi mambula mako mané mbuka motoba ma iétonga, emba iwe wamokoka ikula etonga na nkolo iyato! ²¹ Kasi yo awoko nde na nzoto ye ili tempelo. ²² Yango mena wakundwa Yesu onte ya bawé, Baékosi bamba ya umunya obotshé awoko babona, emba bamba anolela buku pha Nwaphongo na mapho mawoko yo. ²³ Waataa baa Yesu o Yelusaleme, imbele sa eseleko ya Ilekana, bato baikye baanola nkombo yè wawene bè bilekyesako ba ba yo kakyele. ²⁴ Kasi Yesu taikaka baanolela pho abaébaka bè banso, ²⁵ emba taikaka sengyela obotshé bamo imole mapho makyekyi moto; pho yo mampenza aébaka iili o ndondo ya moto.