¹ O etatelo Iloba abaka, mpe Iloba abaka oka Nwaphongo, Iloba abaka Nwaphongo. ² O etatelo abaka oka Nwaphongo. ³ Mbolo inso yakyelamaka nde nè, mpe bo sèe phe ekpele yonoyo nde teyakyelama. ⁴ Inso yaakyelama nè ili na bomoo, emba bomoo pha baka moo' nwa bato. ⁵ Moo' mungyengye onte ya enzombi, mpe enzombi teikyi koka imozimya. ⁶ Yabaka moto monomo owa tomaka Nwaphongo: nkombo ye yabaka Yoane. ⁷ Iyo aési iya ba nzoka, pho obotshé bato banso baanole pho yè. ⁸ Iyo mampenza taikaka ba moo' ⁹ Iloba abka nde nwaakoloo munyele nwaya o mokyisi, nwaangyengyele moto muso. ¹⁰ Abaka o mokyisi, mokyisi nwakyelama nde nè, kasi mokyisi tenwaika moéba. ¹¹ Aési o mokyisi nwe mampenza, kasi bato bèe tebaikyi moyamba. ¹² Kasi oka baamoyambi, baanosi na nkombo yè, abaphe bokonzi pha ibutwa bana ba Nwaphongo, ¹³ bèe tebaika botama na malongo, na ná phowa ya nzoto, na ná phowa ya moto, kasio na Nwaphongo. ¹⁴ Iloba amibuye moto ambi ya zala onte ya banga, emba toweni nkemo yè; nkyemo me eli obotshé, Nwana nde monomo, owatonda na ngolu na ná phele yaüta na Tata. ¹⁵ Yoane aanwanaka, amba imola pho ye yokye: Kyeka owa woko nga obotshé: o sima yanga, kyeye moto monomo ookondekye, pho abaka o boo pha nga. ¹⁶ Pho nde nè owa inso, banga baso tozwa ngolu o ikolo sa ngolu. ¹⁷ Bo mobeko nwambyamaka o maboko ma Mose, ngolu na phele yaya na Yesu Klisto. ¹⁸ Moto monomo taikawene Nwaphongo; kasi Nwana nde yo monomo ooli Nwaphongo, yo oli opnte ya Tata. ¹⁹ Kyeka munoko nwa Yoane imbele saba yo o Yelusaleme, waamotomela Bayuda banganga ba Nwaphongo na balewi pho imotuna motuna obotshé: Wè oli nza? ²⁰ Taika zita, amba wo yokye: Nga sili Klisto. ²¹ Emba bamba motuna bekye: We oli nza? Oli Eliya? Amba buya yokye: Nga sili Eliya. ²² Emba bamba wo nè bekye: Wè ombi baa nza? Pho tokye imola balotomakyi. Kowo bo pho ya we mampenza? ²³ Amba ya wo yokye Nali nwèsi nwa moto okoanwane o bokye' obotshé: Bongya nzela ya Nkolo, bowawo moimosi Isaya. ²⁴ Nzuka bato batomaka bèe babaka Bafalisayi. ²⁵ Bamba kula nde motuna bekye: Botobe Klisto, naa Eliya, naa Moimosi, pho ya ye kobatisa? ²⁶ Yoane amba babuyisa yokye: Nga nabatisa na maa, kasi onte ya bèe moto monomo ali, bèe tomoébe. ²⁷ Kaye onsima yanga, sikokyi na iyingola nsimbi ya bikoto bè. ²⁸ Mapho maso mamana malekanaka o Betani o mokukulu moyoko nwa Yaladene, wabaka Yoane kabatisa. ²⁹ Bo yana aési ya wene Yesu kaye bili yo, amba wo yokye: Kyeka Nwana wa mpate wa Nwaphongo okomanya masumu ma bato. ³⁰ Eli nde pho ye nawoko obotshe: O sima ya nga moto okoye kandekye, pho abaka o boo pha nga. ³¹ Nga mampenza, simoébe, kasi nde phoya iminweninya sèe oka Isalayele, yango mena naési iyabatisa na maa. ³² Yoane amba wo yokye: Nawenekye bolobo boüte o ikolo ndokolo inkotonwenya, boési yakye teme ikolo sèe. ³³ Emba nga siikaka nweba, kasi owantoma ibatisa na maa, eli yo o wa wo na nga obotshé: Owa mowene we bolobo boüte bokye teme o ikolo sè, eli yo o wa mobatis na Bolobo Bosantu. ³⁴ Emba nga, nambo wene, na wo ngakye, iyo ali Nwana wa Nwaphongo. ³⁵ Bo yana, Yoane akulaka ba o elele me, yo na baékosi bè babale. ³⁶ Wawene yo Yesu katambule, amba wo yokye: Kyeka Nwana wa mpate wa Nwaphongo. ³⁷ Wamooka baékosi babale kawo babona, bamba benga Yesu. ³⁸ Yesu amba ya miékpunya, waawene yo obotshé bamobengye, amba wo na bèe yokye: Bèe kolukye ye? Bamba buya bekye: Labi (kyelukye iwo okye Moteye), kobe bi? ³⁹ Amba wo na bèe yokye: Yaka wamowene. Emba bamba yakyende, bamba ya kye wene elele ekye be yo, emba bamba ya zala nè mokolo mè. yabaka phenephe ngonga ya iko. ⁴⁰ Andele, nwana nyango na simo Petelo, abaka monomo na babale baokaka Yoane na babengaka Yesu. ⁴¹ O boo pha bato baso, amba kye zwa nwana nyango Simo, amba wo nè yokye: Toweni Masiya (kyelukye iwo obotshé Klisto). ⁴² Amba ya kye nè oka Yesu. Wamolembetela yo, Yesu yokye: Oli Simo, nwana wa Yoane, bamoébanga Sefasi (kyelukye iwo okye Petelo). ⁴³ Bo yana, Yesu aési kyende o Galileya, Amba yakye zwa Filipe amba wo nè yokye: Imbengye. ⁴⁴ Filipe abaka moto wa Betesaida, mokyisi nwa Andele na Petelo. ⁴⁵ Filipe amba yakye vana na Natanayele, amba wo nè yokye: Toweni owakoma bëe mapho maso o buku pha mibeko ma Mose na baimosi: eli Yesu, nwana wa Yosefi owa Nazalete. ⁴⁶ Natanayele amba wo yokye: o Nazalete wakokyi itokolo lowo lolaa? Filipe amba wo yokye: Yaka ya kyekye. ⁴⁷ Yesu amba ya kyeka Natanayele okoye bili yo, amba wo na bato babaka nè pho ye yokye: Kyeka owakolo moto wa Isalayele ootoli na bole. ⁴⁸ Natanayele amba motuna ypkye: Konzebe bi? Emba Yesu amba ya mobuyisa yokye: Waaba Filipe saboébangakye, waaba we o se ya nwete nwa fige, naéwenekye. ⁴⁹ Natanayele amba buya yokye: Labi, oli Nwana wa Nwaphongo, oli mokonzi nwa Isalayele. ⁵⁰ Yesu amba mobuyisa yokye: Oanosi nde pho nawo na we obokye naéwenekye o se ya nwete nwa fige, Wamowene mapho maikye malekyi bonene ileka lolo. ⁵¹ Emba amba kula wo yokye: Phelephele nawo na bèe, wamowene ikolo siingo, emba banze ba Nwaphongo babaa baüte o ikolo sa Nwana wa Moto.