¹ Bobele, Pilata amba ya na Yesu obokye bamobinde phimbo. ² Batuluku, bamba ya tonga eboko, ekyelate bakonzi, na milo. Bamba na molasa yango o moto. Bamba kula na molasa munkoto nwa mangola ³ Bamba ya susinya phenephe ne bambe wo bekye: We mona, mokonzi nwa Bayuda! Bamba butwa na imowanda bingyete. ⁴ Pilata amba kula tokolo o ibanda, amba ya wo na Bayuda yokye: Kyeka, naetokolele yo o ibanda, ombe eba obotshe sikyi zwa nono lowoo lonolo loobe oka ye. ⁵ Yesu amba ya tokolo o ibanda, alati eboko ekyelate bakonzi etongyi bee na milo na munkoto nwa mangola. Pilataa amba ya wo na bee yokye: Kyeka moto me! ⁶ Kasi waamowene banganga banene na bato ba bee bamba butwa iyanwana bekye: omobakye o ekulusu! Omobakye o ekulusu! Pilata amba wo na be yokye: Omokpe, omobakye o ekulusu bee mampenza, pho ya nga, sikyi mozwa nono na lowo loobe. ⁷ Bayuda bamba mobuyisa bekye: Toli na mobeko monomo, emba pho ya mobeko me, asengyesi iwa pho amibuye Nwana wa Nwaphongo! ⁸ Waoka Pilata babona, akulaka ila na boikye. ⁹ Amba kula nyolo o ingambi, amba ya tuna Yesu, yokye: oli wa bi? Kasi Yesu taika mobuyisa nono eyano. ¹⁰ Bobele, Pilata amba ya wo ne yokye: Kole iwole nga! Toebe obotshe nali na bokonzi na pha iekandola na iebaka o ekulusu? ¹¹ Kasi Yesu amba mobuyisa: Tokokakyi iba na bokonzi mi nga bo tephautaka o ikolo, emba yango mena oonzambye oka ya we, ali na isumu sinene. ¹² Waoka Pilata babona, alukaka malondo ma ibikya Yesu. Bayuda baesi ya anwana, bekye: Bo obikye moto mona, toli nwebi na Moangyesi munene, Kaisala. Moto okomibuya mokonzi na ndengye ye mampenza, mena owa ilanga na Kaisala. ¹³ Bobele Pilata aesi ya tokolo Yesu o ibanda. Yo akye zala o elele ekyebangye bee Mokpengba pho ya itena bolombe. O munoko nwa Bayuda, elele me, baebangye Gabata. ¹⁴ Yabaka mokolo monomo o boo pha eyenga ya Ilekana, imbele sikome bunya imoto. Pilata aesi ya wo na Bayuda, yokye: Kyeka , mokonzi nwa bee! ¹⁵ Baesi ya anwana, bekye: Awe! Awe! Omoingya o ekulusu! Pilata, yokye: Naingya mokonzi nwa bee o ekulusu? Bakambi ba bBanganga, bekye: Banga, tololi na mokonzi mosuu, toebe nde Kaisala, suka. ¹⁶ Bobele, Pilata amba ya ambya Yesu obotshe bamoingya o ekulusu. Inwanwa eye, bakuli yaakya Yesu. ¹⁷ Yesu aesi ya nyanya ekulusu yo mampenza, aikyi mokyisi mamuna, nono o elele ekye bangye be: Engyengyele ya moto (o munoko nwa Bayuda bekye: Gologota). ¹⁸ Wamo, baesi ya ingya Yesu o ekulusu. Baingye na bato basuu babale o bikulusu, ona bi boloo, ona bi bowee, Yesu waa nte. ¹⁹ Pilata aesi ya wo obotshe bakome mokanda, bamobakye o ikolo sa ekulusu ya Yesu. Mokanda me mowo bobo: Yesu, moto wa Nazalete, mokonzi nwa Bayuda. ²⁰ Bayuda baikye batangaka mokanda me, pho elele eya ingyaka bee Yesu o ekulusu, yabaka phenephe na mokyisi. Bakomaka mokanda me na noko iyato iye: Munoko nwa Babele, nwa Baloma, nwa Baela. ²¹ Bobele, bakambi ba banganga bakye wo na Pilata, bekye: Manya bokomi we wekye: Mokonzi nwa Bayuda, kasi buya obotshe: Moto me awoo yokye: Nali mokonzi nwa Bayuda. ²² Pilata, yokye: Boumbo nga koma, waikale nde bookomi nga. ²³ Waingya batuluku Yesu o ekulusu, batuluku me baesi ya kpa bitobu be, babikabi na maalo mane, tuluku na tuluku na se iyalo. Bakpe na munkoto nwe, nwabaka sa bobambele, bamotonga botongyi tata o ikolo nono onse. ²⁴ Bekye: Banga sa mokakola. Tomaa zekye, moto owa moza, kamokpe. Eli nde bomo pho lowo, laakoma bee o buku pha Nwaphongo lolo, lokoye: Bakabi bitobu banga onte ya be, bamaalesi munkoto nwa nga zekye. Batuluku me bakyelaka nde bomo. ²⁵ Maliya, nyango wa Yesu, yo na nwana nyango wa nwanwasi, na Maliya nwanwasi wa Keleopasi, na Maliya owa Magadala, batemekye bee banso phenphe na ekulusu eyaka Yesu. ²⁶ Waawene Yesu nyango, na moekosi owaloboko yo zinga, atemi phenephe na nyango, aesi ya wo na nyango, yokye: Mama, mena eli nwana wa we. ²⁷ Awo na moekosi me, yokye: Mena eli nyongo. Nde sina imbele me, moekosi me aesi ya kpa nyango o ingambi se. ²⁸ Nsima ya maphoo mamana, bo waebaka Yesu obotshe etoma ye yuumbo, aesi ya wa, pho ya ikokya maphoo maakoma bee o buku, yokye: Naokyi phowa ya maa. ²⁹ Kpala yonoyo yabaka wamo, yatondaka na maleku ma ngaa. Baesi ya kpa inyuka, basinyinye o maleku me, basiphakye i nwana nwete, basiongyise Yesu o munoko. ³⁰ Waanyunya yo maleku me, yokye: Etoma yanga yumbo. Amba ya nyokya moto, asengo. ³¹ Yabaka nkolo ya mosala itano, bakambi ba Bayuda tebaikaka zinga obotshe bato baikale o ekulusu nono mokolo moeme be. Mokolo me nwabaka na ntina enene pho nwalongobanaka na eyenga ya Ilekana. Bobele, baesi yaakye wo na Pilata obotshe batene bato me mpee ya makolo, bambe bamanya. ³² Pilata aesi ya toma batuluku, bakye tena mpee ya makolo ma bato babale, baaingyaka bee na Yesu molongo o bikulusu. ³³ Wakoma bee oka Yesu, bawenekye obotshe ambo wa. Yango mena, tebaika motena mpee yaa makolo. ³⁴ Monomo na batuluku aesi ya mumaa ikongo o mobanzi. Bobele, na malongo na maa maesi ya tokolo. ³⁵ Moto okoeimole maphoo mamana, amawenekye, maphoo me mali phele. Amaimolaka na obotshe na be, oanole me. Kaebe obotshe kawo phele. ³⁶ Lowo lalona lalekana pho lowoo laakoma bee o Buku pha Nwaphongo lolo, lokokye: Ete baamotene nono mumpee monomo. ³⁷ Lowo loyoko laakoma bee lokule wo obotshe: bamokyeka yo uumbo bee maa. ³⁸ Inwanwa eye , moto monomo na nkombo Yosefi, aesi ya onga Pilata, obotshe akpe ndemba ya Yesu. Yosefi, mokyisi nwe Alimataya, abaka moekosi nwa Yesu. Taikaka miebinya pho abaka kaile Bayuda. Pilata aesi ya anola. Bobele, Yosefi aesi ya kye kpa ndemba ya Yesu. ³⁹ Nikodeme, owakyekye phanza oka Yesu waamokolo mamuna, abaka ne, yo na Yosefi. Bobele, aesi na ne yaakyela bee na phoo na makyikyi ma nwete. Yabaka na bozito pha bakilo mako maato. ⁴⁰ Baesi ya kpa ndemba ya Yesu, bee banso babale. Baezingyi na bitato, bakyesi na mee me o motema. Mena eli bo wamelekye Bayuda ikunda bato. ⁴¹ O elele eyaingyaka bee Yesu, ibala sonoso sa ndemo sabaka wamo. O motema nwa ibala me, mooto monomo monyakune nwabaka omo, naino tebamokundi moto. ⁴² Yabaka mokolo monomo obo pha mokolo moeme Bayuda. Yango mena, bamba ya kunda Yesu, pho ilita me sabaka phenephe.