¹ Wawo Yesu babona, amba ya kyende yo na baekosi bee o mokukulu moyoko nwa moluka nwa Sedro. Aesi ya nyolo na bee o ibala sonoso sa ndemo. ² Yudasi, owaamoungya, aebaka ne elele me, pho Yesu na baekosi babaka baya angana wamo. ³ Yudasi aesi ya kpa batuluku ba Baloma na baatomaka bakambi ba banganga na Bafalisayi. Akye na bee o elele me. Baphilaka mphata, na bayanzi, na bakolukolu. ⁴ Ka Yesu aebaka inso yaamoyelela. Aesi yasusinya oli be, abatuni yokye: Bee kolukye nzaa? ⁵ Bekye: Banga tolukye Yesu, moto wa Nazalete.Yesu yokye: Nga oyo. Yudasi owamungya atemekye na be wamo. ⁶ Waawo Yesu na be, yokye: Nga oyo, babuto na minsima, bakaa o nse. ⁷ Yesu akuli batuna, yokye: Bee kolukye nza? Bekye: Tolukye Yesu, moto wa Nazalete. ⁸ Yesu, yokye: Nambo ewole obotshe nga oyo. ka bo eli nga okolukye bee, ole bato bayoko baba, bakyende bose. ⁹ Yesu awo babona pho lowo, loowokyi yo na Ango lolo lokokye: Sibungye nono moto monomo mibampe we. ¹⁰ Simo Petelo abaka na mumphata. Aesi ya mokaa, aengyi moombo wa nganga o munene itoo saa boloo. Nkombo ya moombo me, Markus. ¹¹ Kasi Yesu amba wo na Petelo, yokye: Buya mumphata nwa we o kokolo. Iwe, kobuya obotshe esiwene bolosi bompe Tata bobo? ¹² Bobele, batuluku na mokonzi wa be, na bakyengyesi ba Bayuda baesi yaakya Yesu, bamobakyi maphanga. ¹³ Bakye ne phanza oka Ana. Ana alongyaka nwana we wa nwanwasi na Kayafa. Kayafa abaka nganga munene mi mbula mena. ¹⁴ Nzuka eli Kayafa owawoko na Bayuda lowoo lolo: Eli bola obotshe moto monomo awe pho ya banga bato. ¹⁵ Simo Petelo na moekosi mosuu bakyekye mibenga Yesu. Moekosi omosuu mona, aebanaka na nganga munene. Yango mena, amba ya nyolo molongo monomo na baanyoloko na Yesu, o ibala oka nganga munene. ¹⁶ Petelo aikalaka o ibanda, phenephe na mozibo. Moekosi owa ebanaka na nganga munene, aesi ya tokolo, awoo na nwanwasi owabaka kakyengyele mozibo. Bobele, moekosi me aesi ya nyosa Petelo. ¹⁷ Nwanwasi me amba ya wo na Petelo, yokye: Na we toli moekosi wa moto mona? Petelo, yokye: Phe, sili moekosi nwe. ¹⁸ Baombo na bakyengyesi bakyelaka nwenya obotshe baoto pho mpiyo ya kyelaka. Petelo ne ayakaka ya teme na be, kaoto nwenya. ¹⁹ Bobele, nganga munene aesi ya tuna Yesu pho ya baekosi bee na pho ya mateya maateyaka yo. ²⁰ Yesu, yokye: Nawoko o pha, pho ya moto munso. Nateyaka o mangambi ma makyita, na o Tempelo, elele ekyeangane Bayuda banso. Sikaka wo mi ibombo. ²¹ Pho ya'ye kontune? Tuna baanzokaka, baeimole maphoo maabawolekye nga. Baebe yaawoko nga nabolaa. ²² Wabuya Yesu babona, monomo na bakyengyesi, owabaka phenephe ne, aesi ya mowanda engyete, yokye: Mena bokobuyisa we nganga o munene? ²³ Yesu, yokye: Bo nawo na bobe, onzimole, ka bo nawo na bola, iwe konvande pho ya'ye? ²⁴ Bobele, Ana amba ya motoma, nde na mana maphanga oka Kayafa, nganga munene. ²⁵ Simo Petelo ataka ba atemi, kaoto nwenya. Baesi ya motuna, bekye: toli moekosi wa moto me? Petelo aanga, yokye: Phe, sili moekosi we. ²⁶ Monomo na baoombo ba nganga o munene, owabaka nwana nyango na moto owaengyekye Petelo itoo, amba wo ne, yokye: Siikaka ewene na we na nee o ibala? ²⁷ Petelo akuli angana. Sakoko, soo yamba ya tongo. ²⁸ Na munkukutu, baesi ya mana na Yesu oka Kayafa. Bakye ne oka Pilata. Kasi bakambi ba Bayuda tebaikaka nyolo o ingambi se, obotshe bee saoto ekyila ya bee pho baze eyenga ya Ilekana. ²⁹ Yango mena, Pilata akyekye batuna o ibanda, yokye: Lowo ye loosongyele bee moto oyo? ³⁰ Bekye: Bo tabakyi moto mobe, nde toloyakyi ya eyikyela yo. ³¹ Pilata, yokye: Kasi beee omokpe, omotenele bolombe, bookowo mobeko nwa bee.Bayuda bamba ya mobuyisa bekye: Banga mampenza tolokokyi iphe moto etumbu ya iwa. ³² Lowo lolo lokokyee ewole ya Yesu, eyawoko yo pho ya iteya ndengye ya iwa sa mowa yo. ³³ Bobele, Pilata amba ya nyolo o ingambi. Abangyi Yesu, amba wo ne yokye: Iwe, oli mokonzi nwa Bayuda? ³⁴ Yesu amba ya mobuyisa yokye: Kowo babona pho oumunye we mampenza, nde basuu baeyimosi ya nga? ³⁵ Pilata, yokye: Ombuye Moyuda nde bo? Bato ba mokyisi nwawe mampenza, banganga banene baeyambye oka nga! Okyesi lowo ye? ³⁶ Yesu amba ya buya yokye: Bokonzi pha nga teboli pha mokyisi mumu. Bo bokonzi phanga bo bobakyi pha mokyisis mumu, baakanga nde banwanesi ebasi pho nga sa kaa o maboko ma Bayuda. Kasi bokonzi pha nga, inwanwa eye, teboli pha wawa. ³⁷ Pilata amba wo ne yokye: Oli nde mokonzi? Yesu amba mobuyisa yokye: Ewo nde we obokye nali mokonzi. Nabotama emba naya o mokyisi pho ya iya imola maphoo maa phelele. Moto munso oli na maphoo ma phele kaokye nwesi nwanga. ³⁸ Pilata amba ya wo ne yokye: Maphoo ma phele eli ye? Waatuna Pilata babona, amba kula kyende benga Bayuda o nze, amba wo na bee yokye: Pho yanga, sikyi mozwa na lowoo lonolo loobe. ³⁹ Kasi bo wamele bee obotshe mbula na mbula naekandolele moto wa boloko monomo pho abutwe oka ye, imbele size bee eyenga ya Ilekana, kozinge obotshe naekandolele mokonzi wa Bayuda? ⁴⁰ Bamba ya butwa iyanwana bekye: Mona phe, nde Balaba! Nzuka Balaba me abaka mobomi na moibi.