¹ Naewosi maphoo manso mamana pho ya obotshe obe sakaa o bimekyi. ² Bamoewiinya o mangambi ma makyita ma Bayuda. Nzuka imbele siye, moto owa moeboma, amoumunya obotshe kambya ikabo oka Nwaphongo. ³ Bamokyela babona pho tebaika eba ebee Tata, ebee nga. ⁴ Kasi naewole babona pho ya obotshe, wamokoka imbele sa be, bee oebe obotshe naewolekye lango. Sika ewole lango uta oetatele pho nabaka na bee. ⁵ Kasi inwanwa eye nakyende oka owantoma, emba na monomo onte ya bee santuna obotshe: Kokye bi? ⁶ Kasi pho naewosi lango, mandondo ma bee mabuto na ngongo. ⁷ Nzuka, naewosi nde phele obotshe: eli bolaa obotshe nga nakyende, pho bo nga sikye, moto ookokyi iya eyambelela etaye. Kasi bo nakye, namoetomela yo. ⁸ Emba waamoya yo, amoya phe bato ba mokyisi soo pho ya maphoo maakyekyi masumu, bosembo, na isambisa sa Nwaphongo. ⁹ Pho ya masumu, tebaanzanole. ¹⁰ Pho ya bosembo, nakyende oka Tata, otokule nvene. ¹¹ Pho ya isambisa, mokonzi wa mokyisi mumu bamosambisaka. ¹² Nakuli baa na maphoo maikye ma iewole, kasi bo naewosi mango inwanwa eye, mamoeleka na bokusi. ¹³ Waamoya Bolobo bowo maphoo ma phele, amoeteya maphoo manso ma phele. Etawo maphoo maute ne mampenza. Amowoko maphoo maokye yo, amo eimolaka na maphoo mamoya. ¹⁴ Amoweninya nkyemo ya nga oka bato pho amokpaka maphoo maaute na nga, emba amoeimolaka mango. ¹⁵ Maphoo manso mali na Tata, mali na nga. Yango mena nawo ngakye: Bolobo amokpa maphoo maaute na nga emba amoeimolaka mango. ¹⁶ Nwana bokyi bobo, bee otokule nvene, emba nde nwana bokyi bobo wamokula nvene. ¹⁷ Bobele baekosi bee baayoko bamitunaka, bekye: Maphoo mama malukye iwo bo? Nwana bokyi bobo, bee otokule nvene, emba nde nwana bokyi bobo wamokula nvene. Ebe na obotshe: Nakyende oka Tata? ¹⁸ Maphoo mawo yo, yokye: Nwana bokyi bobo, malukye iwo bo? Banga tolomaebe. ¹⁹ Yesu aebaka obotshe balukye imotuna, amba ya ba tuna, yokye: Bee komitune pho ya maphoo maewosi nga obotshe: Nwana bokyi bobo, bee otokule nvene, emba nde nwana bokyi bobo, wamokula nvene? ²⁰ Naewole nde phele: Bee wamolela, wamba na miima, kasi bato ba mokyisi bamoba na nkyisa. ²¹ Yamoba ndokolo nwanwasi kalukye ibota. Waasweya yo, kabe na ngongo pho kaebe obokye akomi imbele sa bolosi. Kasi bo aboti, taakule eba bolosi bonso baabona pho abuto na nkyisa obokye atokosi moto o mokyisi. ²² Nde bomo, inwanwa eye na bee, obuto na ngongo. Kasi namokula yawenene na bee, emba mandondo ma bee mamobutwa na nkyisa. Moto nono monomo etakokye imanya nkyisa ya bee. ²³ Muna mokolo me, otokule ntuna maphoo. Naewole nde phele: Tata, amoephe inso yamoonga bee na nkombo ya nga. ²⁴ Nono inwanwa eye, naino toongyi ekpele yonoyo na nkombo ya nga. Oonga, wamozwa, emba nkyisa ya bee yaamba lobo. ²⁵ Naewosi maphoo mamana na bite. Imbele siiye, esikule ewole na bite, kasi namoewole saasa maphoo makyekyi Tata. ²⁶ Muna mokolo me, wamoonga Tata maphoo masengyesi na bee na nkombo ya nga, teli obotshe namonga ne pho ya bee. Wamoonga ne bee mampenza na noko ya bee, ²⁷ pho Tata, yo mampenza kaezingye pho bee kozingye, koanole na obotshe nauta na Nwaphongo. ²⁸ Nauta na Tata, naya o mokyisi. Inwanwa eye, naikye mokyisi, nabutwe oka Tata. ²⁹ Baekosi bee, bekye: Oweni, inwanwa eye, kowo saasa, tokuli wo na bite. ³⁰ Nde inwanwa eye, banga toebe obotshe koebe maphoo manso. Tosengyesi obotshe bato bakule etuna mituna. Yango mena, toanole obotshe wauta na Nwaphongo. ³¹ Yesu amba babuyisa yokye: Inwanwa eye, bee kombe yaanola? ³² Kyeka, imbele me siye, simbo koka, bee banso wamunyangwa, moto na moto amobutwa oka ye, wamoika nzika nga mampenza. Kasi sili nga mampenza pho Tata ali na nga elele yonoyo. ³³ Naewosi maphoo mamana pho bee bali na naga elele yonoyo obe na motema mpiyo. Wamunyokomo o mokyisi. Kasi oititalaka, pho inga natokolo kamba owanyete bobe pha mokyisi!