¹ Mandondo ma bee satungyisama, anola Nwaphongo, onzanole na nga. ² O ingambi sa Tata, bilele ba ibaa bili biikye, bote bakyi bomo, nde naewolekyi obotshe nakyende ebongyisela elele eya mobaa bee? ³ Emba wamokyende ebongyisela nga elele, namokula ya ekpa, pho elele eli nga na bee obe omo me. ⁴ Na bikye nga, bee koebe nzela. ⁵ Toma amba ya wo ne yokye: Nkolo, teloebe bikye we, tomba eba ena nzela ndengye'ye? ⁶ Yesu amba ya wo ne yokye: Nga nali nzela, na phele, na bomoo. Moto takokyi ikyende oka Tata, bo taleka oka nga. ⁷ Bo onzebakyi, na Tata nde omoebi. Tata inwanwa eye omoebi, emba omoweni. ⁸ Filipe amba ya wo ne yokye: Nkolo, oloteya Tata, mena oka banga wakokyi. ⁹ Yesu amba ya wo ne yokye: Nali na bee wawa elinga, emba we Filipe toonzebe! Moto oonveni aweni Tata. Pho ya ye kowo wekye: Oloteya Tata? ¹⁰ Toanole obokye nga nali onte ya Tata, emba Tata ali onte ya nga? Maphoo maewole nga, simawo na ndengye yanga mampenza! Kasi eli nde Tata ooli onte ya nga, okokyele bitoma be. ¹¹ Onzanole, nga nali onte ya Tata, emba Tata ali onte ya nga. Bo toone anola maphoo ma nga, anola nono pho ya bitoma bibi. ¹² Naewole nde phele phele, moto okonzanole amokyela ne bitoma bikyele nga, amokyela na bitoma biilekyi bonene, pho nga nakyende oka Tata. ¹³ Inso ya moonga be na nkombo ya nga, namoikyela, pho obokye Tata azwe ngambo onte ya Nwana. ¹⁴ Bonzongyi ekpele na nkombo ya nga, namoekyelela. ¹⁵ Bo konzigye, wamokumola mibeko ma nga. ¹⁶ Nga namoonga na Tata, amoetomela moambelesi mosuu owa moba na bee pho ya bobele. ¹⁷ Eli yo Bolobo owa phele, iyo ootokokyi mokyisi iwene na iyeba. Bee, bee komoebe, pho ali phenephe na bee na onte ya bee. ¹⁸ Esi eyikye biika, namokula ebutolela. ¹⁹ Ikasi nde nwana bokyi bobo, mokyisi ete mokule nvene. Kasi bee, konvene pho nali na bomoo emba bee wamo baa na bomoo. ²⁰ Mokolo me, wamoeba obotshe nga nali onte ya Tata, bee onte yanga na nga onte ya bee. ²¹ Moto oli na bimeko ma nga emba kamikumole, yo mona kanzingye. Kasi okonzingye Tata amozinga, na nga namozinga namba namiweninya ne. ²² Yudasi, kasi Yudasi Mokyeliyota phe, amba wo ne yokye: Nkolo, ndengye'ye wamiweninya na banga, kasi na mokyisi phe? ²³ Yesu amba mobuyisa yokye: Bo moto kanzingye, amokumola maphoo ma nga, emba Tata amozinga. Tomokye, tomobuya elele ya banga ya izala oka ye. ²⁴ Moto ootonzingye, taakumole maphoo ma nga, nzuka maphoo maokye bee, temali ma nga kasi ma Tata owantomaka. ²⁵ Naewolekye maphoo mamana wataaka ba nga na bee. ²⁶ Moambelesi, Bolobo pha moetomela Tata na nkombo ya nga, amoteya maphoo manso, amoekundolela inso yaa ewolekye nga. ²⁷ Naeyikyele bose, naephe bose phanga. Siephe phango bokoephe bato ba mokyisi. Ma ndondo ma bee mabe sa tungyisama na ibaa na boilakye. ²⁸ Waoka obotshe nawoko na bee ngakye: Nakyende, namokula ebutolela. Bokonzingye wamosepela na obotshe nakye oka Tata, pho Tata andekyi. ²⁹ Emba inwanwa eye, nawo na bee o boo pha maphoo mamana ikyelama pho wamokyelama mango, bee waanole. ³⁰ Tata inwanwa eye, esikole woono na bee, pho mokonzi nwa mokyisi mumu kaye. Nde phele tali na bokonzi ikolo sa nga. ³¹ Kasi pho ya obotshe mokyisi moebe obokye nazingye Tata na obotshe nakyele inso bokozingye. Teme, tomane wawa!