¹ Nkolo moto ba o boo pha eyenga ya Ilekana, Yesu aesi ya koma o Betani, waabaka Lazalo owa kundolaka yo onte ya bawe. ² Omo, bamba ya za ne. Malata abaka kakabe ntoma ne o mesa. ³ Bobele, Maliya amba ya lpa mplangyi nwa malasi nwakyela bee na nale nwa motiya moikye. Aesi ya maololo o makolo ma Yesu, amba makunyola na nsuwe ye, emba ingambi satondaka na solo ya mana malasi. ⁴ Bobele, Yudasi Mokyeliyota, monomo na baekosi bee, eli nde ona yo owamuungya, yokye: ⁵ Pho ya'ye tebaungye malasi mamana na nkama iyato ya ba denale, pho ya ibaphe babola? ⁶ Awoko babona, pho teli obotshe ali na ngongo ya babola, kasi pho abaka mwibi na obotshe, yo mobombi nwa baphalanga, abaka kaibe baphalanga babaka bee bamophisa. ⁷ Emba Yesu amba ya wo yokye: Omele! Abanza lowo lokyesi yo pho ya mokolo nwa munkunda be. ⁸ Babola olio na be nkolo inso, kasi nga, otoobe na nga pho ya bobele. ⁹ Emba moluku moikye nwa Bayuda baokaka obotshe Yesu abaka omo, kasi tebaikaka ya nde pho ya Yesu yo mampenza, kasi nde pho ya ikyeka Lazalo owa kundolaka yo onte ya bawee. ¹⁰ Tata wamo, Banganga banene bamba ya wangya obotshe babome na Lazalo me, ¹¹ pho yabaka pho ye, Bayuda baikye babalotaka babutwaka ianola Yesu. ¹² Bo yana, yana moluku nwa bato nwaakaka o eseleko, nwamba oka obotshe Yesu amo ya o Yelusaleme. ¹³ Bamba kpa kanga ya mabila bamba tokolo ikye vana ne. Babaka baanwane bekye: Ozana! Nkolo apambole okoye na nkemo ye, mokonzi nwa Isalayele. ¹⁴ Waazwa Yesu nwana wa mpunda, amba zala o ikolo sa yango bo wakomama wango obotshe: ¹⁵ Saila nwana nwasi wa Siyona: kyeka mokonzi kaye, abaa ikolo sa nwana mpunda. ¹⁶ O ebandele baekosi bee tebaikaka sosolo maphoo maaye, kasi imbele sazwa Yesu ngambo, bamba umunya obokye maphoo me makomaka pho ye, na obotshe eli nde mango makyela bee pho ye. ¹⁷ Moluku nwa bato nwaabaka ne imbele sabangaka yo Lazalo itokolo onte ya ilita na wa mokondola yo onte ya bawee, baimolaka maphoo mawenekye be. ¹⁸ Yango mena moluku nwa bato bayakaka ya vana ne pho baokaka elekyesako eya kyelaka yo. ¹⁹ Emba Bafalisayi bamba wono onte ya bee bekye: Ka kowene, otokule kyela na ekpele, kyeka bato banso babuto imobenga! ²⁰ Bato bayoko baatebali Bayuda bakyekye o eseleko pho ya ikumbela. ²¹ Bamba ya wo na Filipe owabaka wa Betesayida ya Galileya emba bamba onga ne bekye: Nkolo, toli na phowa ya iwene Yesu. ²² Filipe amba yakye lowole Andele, emba bee banso bamba yakye lowole Yesu. ²³ Yesu amba babuyisa yokye bobo: Imbele sisengyesi Nwana wa moto izwa ngambo sikokyi. ²⁴ Naewole nde phele phele, bo mumbuma nwa ble moka o manyete te mowee, moikale nwango mampenza. Kasi bo mowee, mobote mbuma nzikye. ²⁵ Moto okozingye bomoo phe, aabobungya; kasi moto owamoina bomoo phe onte ya mokyisi mumu, aabobanza nono o bomoo pha bobele. ²⁶ Bo moto kazingye inkyelela, ambengye, emba elele eli nga, na moto wa nga wa etoma amoba omo. Bo moto kankyelele, Tata amokumola. ²⁷ Inwanwa eye, ndondo yanga teli bose. Emba namba wo bobo? Tata, ombikya o imbele sisi? ²⁸ Tata, phe nkombo ya we ngambo. Emba nwesi monomo mouti o ikolo mowo obotshe: Naephe ngambo, emba namokula eephe ngambo. ²⁹ Moluku nwa bato nwabaka wamo na baokaka bekye eli engyinzi, baayoko bawoko bekye eli anzelu moto omowosi. ³⁰ Yesu amba ya buya yokye: Nwesi mamuna temoikyi okana pho ya nga, kasi nde pho ya bee. ³¹ Inwanwa eye eli isambisa sa mokyisi o ibanda. ³² Pho ya nga, imbele sa mobaa nga o ikolo, namobenda bato banso oka nga. ³³ Na maloba mamana, aimolaka ndengye eya mowa yo. ³⁴ Moluku nwa bato nwamba mobuyisa obotshe: Banga Mobeko nwaloimola obotshe Klisto amobaa bobele. Ndengye'ye we okokyi iwo obotshe Nwana wa moto amobaa o ikolo? Yo nza, ona Nwana wa moto? ³⁵ Emba Yesu amba wo na be yokye: Moo motaa baa onte ya bee pho ya nwana imbele. Tambula imbele sili bee na moo, pho ya obokye enzombi yango saeziba. Pho ookotambule o enzombi, taebe mbale ekyekye yo. ³⁶ Wata ba bee na moo, omoanole pho ya ibutwa bana ba moo. Waaunva yo ibawole babona, Yesu amba ya mana wali bee, akye mibomba. ³⁷ Nabo wakyela yo bilekyesako biikye o miyo ma be, tebaika moanola. ³⁸ Pho maphoo mawoko moimosi Isaya obokye: Nkolo, owanosi yaoka banga nza? Na eboko ya Nkolo yamiteya oka nza? Makokyisame. ³⁹ Nde ona Isaya akuli imola ntina ye eteyakoka bee anola: ⁴⁰ Aphose miyo ma be; ambi na buya ntema ya bee nkusi, pho bee sawene na miyo ma bee, obotshe ntema ya bee sa sosolo, obotshe bee sa bongola ntema, emba nde na ba bikye! ⁴¹ Isaya kawo babona pho awene nkemo ye na obotshe awo pho ye. ⁴² Na bo babona, baikye onte ya bakambi, banwanolaka. Kasi pho ya bBafalisayi tebamekaka na iwo, pho ya iila obotshe nde ba batokosi o ingambi sa makyita: ⁴³ Pho bazingaka nkemo ekyeute na bato o elele ya nkemo ekyeute na Nwaphongo. ⁴⁴ Yesu amba ya anwana yokye: Okonzanole, taanole nga, kasi kaanole owantoma; ⁴⁵ ebe moto oko nvene, kawene na owantoma me. ⁴⁶ Inga, moo, naesi o mokyisi pho moto munso okonzanole abe sabaa oenzombi. ⁴⁷ Bo moto aokyi maphoo ma nga, tambe mabanza, teli nga oko mosambisa; pho sikyi ya sambisa mokyisi, kasi naesi nde iya bikya mokyisi. ⁴⁸ Moto okonde na otoanole maloba manga ali na mosambise: iloba siwo nga, samosambisa o mokolo nwa nsuka. ⁴⁹ Sikyi wo pho ya nga mampenza, kasi Tata owantoma anteya isengyesi nga iwo na iimola. ⁵⁰ Emba naebe obotshe motindo nwe eli bomoo pha bobele: Ikyiwo nga, naiwo nde bowanvole Tata.