¹ Tewali ntina pho ya obotshe nakule ekomela pho ya lowo lokyekyi isungyi sa baanosi ba Nwaphongo bali o Yelusaleme. ²  Pho naebe obotshe, bèe oli na phowa ya ibasunga, namba na ekumisa o miyo ma bato ba Makedoniya, ngakye: Bebi ba Akaye baünva mibongya iambya banda mbula elekaa. Yango mena bato baikye ba Makedoniya babuto imiambya pho ya ndakisa ya bée ³ Inwaŋwa eye na etomele Tito na bebi ne pho itata saa etata banga mi lowo me, sango saba saa phaa; na zingye obotshe o mibongya bowawoko nga. ⁴  Bo phe, bo nga na bato ba Makedoniya toesi omo, toloombi ya ezwa o mibongye, tomobaa na nsoo, pho toetataka obotshe bèe waünva mibongya, kasi nsoo eyaka bèe ya moleka. ⁵  Yango mena, nawene obotshe esengyesi obotshe nawo na bebi babana bayee phanza pho ya ilengyele makabo ma bèe bo wakanaka bèe. Emba bo umbo imilengyele, yamoweninya obotshe bèe koambya na ndondo yonoyo kasi na mandondo mabale phe. ⁶ Imunya naino, obotshe moto okophikye na bokyikyi, kanoko na bokyikyi. Okophikye na boikye kanoko na boikye. ⁷  Ebongyi obotshe moto na moto akabe bokani yo. Yango saba na imiima, na na ietomisa na bokusi. Pho Nwaphongo kazingye moto okokabe na nkyisa. Nwaphongo ali na makokyi ma iephe mbolo ndengye na ndengye pho obakye nkolo inso na mbolo isengyesi na we pho isunga bitoma binso bilaa. ⁹  Eli bo wakoma bée o buku pha Nwaphongo obotshe: Moto omolaa kakabele babola na boikye, bolaa phe pha mokoko pho ya bobele na bobele. ¹⁰ Eli Nwaphongo okophe bato mumboto nwa iphika na ntoma ya izaa. Amoephe na bèe mumboto, aamobuya nwikye pho ophekye bato baayoko me. ¹¹  Amoebuya bato ba ezwele, pho obakye imbele sinso kokabele bato; yango mena bato baikye bamophe Nwaphongo melesi pho ya makabo maabaphe banga na nkombo ya be. ¹² Pho etoma eya ikabela bato baakaya, teli nde pho ya isunga baanosi ba Nwaphongo kasi kyesepelisa na Nwaphongo pho bato baikye bamophe melesi. ¹³  Waamokamwa bée na ngambo ya etoma ya bèe, bato baikye bamokumisa Nwaphongo pho ya otosi oweninya bosembo pha bèe o Nsimo Elaa ya Klisto, baamokumisa me pho ya ngolu ekyebakabele bèe, na bato basuu mbolo ya bèe. ¹⁴  Wamowene bée ngolu eyaephe Nwaphongo, bamobondele pho ya bée na lozingo loso. ¹⁵  Tophe Nwaphongo melesi pho ya ikabo sa lophe yo, silekyi makabo manso.