¹ Bande na nga, tozingye obotshe oebe bolaa pha kyela Nwaphongo pho ya baanosi ba Makedoniya. ²  Onte ya mampasi maikye mazwaka bèe na bolaa pha bèe, kasi babaka na nkyisa nzikye, yango mena bambyaka baphalanga baikye pho ya etoma ya Nwaphongo. ³ Nawene na miyo, baambya na makokyi ma bée na ileka, makokyi ma bée nde na phowa ya bée mampenza, ⁴  Balobondelekye, bamba wo na banga bekye tobaphe nzela ya iangana na banga mi lowo me, pho na bée basungye bato ba Nwaphongo bali o Yuda. ⁵  Yakyela be, yaleka ya umunyaka banga pho ya be. Bataka maambya phanza na Nkolo Yesu. Emba bamba ya mambya na banga me bo wazingaka Nwaphongo. ⁶ Yango mena, toongyi na Tito obotshe, aya unva etoma elaa eya tataka yo oka bèe. ⁷  Pho oli na maphoo manso: Ianola, yela ya iwoo, boebi, imambya na lozingo bo waeteya banga, baa nana ngolu ikye mi lowo lolo. ⁸ Siephe mitindo; kasi bo na wo na bèe, na imiambya sa bebi, na ephe nzela ya iteya laakolo lozingo na bebi. ⁹  Pho koebe bolaa pha lokyela Nkolo wa banga Yesu Klisto; iyo owabaka moto wa ezwele, amibuya mobola pho ya bèe, pho na bobola phe, bèe obutwe bato ba ezwele. ¹⁰ Yango mena na ephe maümunya ma nga mi lowo me, ebongyi na bèe ilendendala, bèe babaka bato ba oboo ba izwa maümunya maamana mbula eelekaa, na ikana imakyelela. ¹¹  Kasi inwanwa eye, unva ikyela etoma me. Oeyunve iyekyela na ndondo yonoyo bo waekanaka bèe, na makokyi mali na bèe. ¹²  Pho bokoambya na ndondo yonoyo, Nwaphongo kaanole ikabo siiambya we kokokana na ili na we, kasi na iteili na we phe. ¹³ Teli obotshe nakpe mampasi ma bato baayoko nambe ephisa mango, pho bée babe na bolaa, bèe owene mpasi, kasi eli nde obotshe bèe banso obe nde ndengye yonoyo. ¹⁴  Inwanwa eye, oli na mbolo nzikye emba okokyi isunga bebi baakambi. Pho mokolo nwa mokamba bèe, bo bée babe na mbolo nzikye, na bée bamosunga me. Na ndengye mena wamokokana. ¹⁵  Nde bowakoma bée o buku pha Nwaphongo obotshe: Owa ongoko mbolo nzikye, wa za bée tebaika ikala na epkele. Baongoko mbolo ndambo, bazee nana boikye me. ¹⁶ Nwaphongo akumame pho akyesi obotshe Tito amiambya mi bée bokomiambya banga. ¹⁷  Tito aanosi yaa moongaka banga, ambakula miambya nde na phowa ye mampenza na iyaa oka bèe pho ya iya iesunga. ¹⁸ Tomotome na nwebi mosuu, moto me, mangomba manso ma baanosi basepele ne, pho kateya Nsimo Elaa na bolaa. ¹⁹  Na pho, mangomba manso ma baanosi bamooloko pho akye na banga o imbanga sa etoma eya ngolu eya lophe Nwaphongo pho ya nkyemo ye na pho ya iweninya ndondo elaa ya banga. ²⁰ Tokyele na ndengye inso obotshe bato sa lowole na bobe na ndengye ekyekyelele banga baphalanga baikye ndengye eye. ²¹  Tolukye ikyela bolaa, teli nde o miyo ma Nkolo kasi na o miyo ma bato. ²² Tobatomi na nwebi na banga mosuu, mbala nzikye mi maphoo maamumekye na banga, towene obotshe kamiambya. Inwanwa eye kakule miambya na koleka pho ya bèe komikambe na bolaa. ²³  Pho ya Tito, iyo ali nwebi na nga owa lozingo na owa etoma onte ya bèe; kasi pho ya bato babale baayoko baye ne, bali batoma ba mangomba ma baanosi, bambe nakyela pho ya nkyemo ya Yesu Klisto. ²⁴  Weninya obotshe kobazingye phele. Pho mangomba ma baabatomi, bawene obotshe toesambe na phele.