¹ Pho Nwaphongo alolakyela babona, bande na nga ba lozingo, tomikunyole na bobe bonso pha nzoto na pha molimo, tomilenza o ibutwa baakolo bato ba bosantu na boilakye Nwaphongo. ²  Oloyambe o mandondo ma bèe, toloika kyela moto bobe, toloika bungya moto monomo, toloika kosa moto. ³  Saümunya obotshe nawo ɓaɓona phɔ ya iyewole na bobe. Eli nde bowa ewole nga obotshe toezingye na boikye na bo o iwa na bo na bomoo. ⁴  Sili na ziko mi bèe, nali na lolendo pho ya bée. Onte ya mampasi ma banga manso, si phembe, natonde na nkyisa. ⁵ Pho na wakoma banga o Makedoniya, toloikazwa na nwana imbele wa iyema, nde minyoko na minyoko, toloika baa bose na bato, na boilakye o mandondo. ⁶  Kasi Nwaphongo okokuya bato baaphembi, alokuye na ikoma sa Tito. ⁷  Teli nde pho ya bokomakye phe, kasi na pho aloimola ndengye eya mokuya bèe. Aloimola na phowa ya bèe ya ikula nvene, na ngongo ya bèe pho ya maphoo maabe malekana, na phowa ya bèe ya inzambelela. Yango mena nkyisa ya nga ilekyi bonene. ⁸ Naebe obotshe mokanda nwa ekomelaka nga nwa ephe ngongo, sikuli baa na ngongo pho ya lowoo me. Naokyi ngongo wa wene nga obotshe mokanda me nwa ephekye ngongo nde pho ya nwana imbele mokuwe. ⁹  Kasi inwanwa eye na sepele pho nakoma mokanda mamuna. Si sepele pho ya obotshe naephe ngongo. Nasepele pho ya obotshe wabaka na ngongo pho ya lowo loobe lakyela bèe, emba yango mena wamba bongye mandondo. Ngongo ya bèe yabaka nde bowazingaka Nwaphongo pho obongya mandondo. Yango mena toloika ekyela bobe na mokanda me. ¹⁰  Pho ngongo ekyeüte na nwango nwa Nwaphongo, kyetome moto ibongya mobesi momokambe o lobiko; ngongo ndengye mena tolomiime na yango. Kasi ngongo ekyeute na maümunya ma mokyisi mumu, kyetome o iwaa. ¹¹  Kyeka inwanwa eye mbano ya ngongo ya bèe bowazinga Nwaphongo, Kyeka ndengye emambye bèe, kyeka bookomiwele bèe obotshe tokyele masumu, kyeka boomengyi bèe na maphoo malekana, kyeka boile bèe, kyeka phowa ya bèe ya ikula nvene, kyeka boozingye bèe ikyela ikyizingye Nwaphongo, kyeka bozingye bèe iphe okyesi bobe etumbu. Oteye na ndengye inso obotshe toika ba na lowo i lowo lalona. ¹²  Bo na ekomelaka mokanda mamuna, teyabaka maphoo ma moto owa kyela bobe, naa pho ya moto owa kyela bèe bobe. Kasi yabaka nde pho ya obotshe oebe bolaa o oo pha Nwaphongo imiambya sa bèe pho ya banga. ¹³ Yango mena mobuyise nwa bèe molokuyee. Teebe nde ikuya na ikuya, tokulizwa nkyisa ilekyi boikye na iwene Tito na nkyisa pho ya ndengye eyabaka bèe ne na bolaa. ¹⁴  Wa motoma nga oka bèe naekumisa o boo phe. Inwanwa eye toikyi mpe sòo. Maphoo manso mawo banga na bèe, mali phele. Ikumisa saaekumisa banga o boo pha Tito sili sa phele me, wakyelama nde bomo ¹⁵ Yango mena phowa ye pho ya bèe ekuli leka boikye wa umunya yo ndengye eya motosa bèe banso na ndengye eyamoyamba bèe na bolaa, na botosi bonso. ¹⁶  Nasepele pho nakokyi iyelemela i maphoo manso.