¹ Pho tokyele etoma elele yonoyo na Nwaphongo, to ebondele: bèe saoto ngolu eya zwa bèe oka ye. ²  Nwaphongo awo yokye: Imbele sa wenenekye ngolu ya nga naeyokaka, mokolo nwa lobiko na ya esunga. Kyeka inwanwa eye imbele sa ianola ngolu ya Nwaphongo, kyeka mokolo nwa lobiko. ³  Toloozingye ikyela lowo lokokyi ikatela bato o nzela ya Nwaphongo pho toloozingye obotshe bato bawole etoma ya banga na bobe. ⁴ Kasi mi maphoo manso makyele ɓanga, toteya obotshe toli bato ba etoma ba Nwaphongo. Na bo towene mampasi ndengye na ndengye, na bo balonyokolo, toititale nde babona. ⁵  Balokutuba, alonyosa o boloko, batomisa bato obotshe balokyele mobulu; tokyele etoma na bokusi, mbala eyoko toloikaka zwaka malondo ma ilala na ma izaa. ⁶  To miweninya bato ba etoma ba Nwaphongo na imikamba sa banga silaa, na boebakye pha banga, na ikanga mandondo, na ikyela bolaa, na nzela ya Bolobo, na izinga bato na ndondo yonoyo, ⁷  na iteya sa banga sa bosembo, na pho ya ngolu ya mwiya nwa Nwaphongo. Mobesi molaa nwa banga moli ndokolo binwanele ba banga pho ya ikyinda banguna na pho ya imibatela me. ⁸ Bato bana balokumole, baayoko balosemole, bana balokumisa, bayoko balotole, balowene ndokolo bato ba bole nzuka towo phele, ⁹  Balokyekye ndokolo moto taaloebe, kasi bato banso baloebe. Baloümunya nkolo inso obotshe tomowaa, kasi balowene obotshe toli nde na bomoo. Balophe mampasi, toloowe. ¹⁰  Baloweninya ngongo kasi toli nkolo inso nde na nkyisa, toli babola kasi tobuya bato baikye bato ba ezwele o nzela ya Nwaphongo, towene ndokolo tololi na ekpele nzuka o bona bosembo toli na mbolo inso. ¹¹ Bèe bato ba Koliti, toewole polele, toewole ili o mandondo ma banga. ¹²  Banga toloika le iyezinga, eli nde bèe bate balozingye. ¹³  Naewole ndokolo oli bana banga, nawo na bèe ngakye; Olowole ili o mandondo ma bèe, olozingye bokoezingye banga! ¹⁴ Bée saangana na bato bate baanole Yesu Klisto pho ya ikyela na bée etoma elele yonoyo. Ndengye'ye moto molaa na moto mobe bakokyi ikyela etoma elele yonoyo ? Nwenya na enzombi bakokyi iangana? ¹⁵  Klisto na Zabulu bakokyi iyokana? Moto oko anole Klisto na otomoanole, bakokyi iba na maümunya ndengye yonoyo ? ¹⁶  Bikyeko tebili na elele o tempelo ya Nwaphongo. Pho banga toli tempelo ya Nwaphongo oli na bomoo. Eli nde bo wawo yo Nwaphongo obotshe: Namoba onte ya be, na motambula na be, namoba Nwaphongo wa be, emba bée bamoba bato banga. ¹⁷ Yango mena Nkolo Nwaphongo kawo na bato bée yokye: Mana onte ya bato baabe, saba elele yonoyo na be, sakuma mbolo ya nsokoto, emba nga na moeyamba. ¹⁸  Namoba ango wa bèe, emba bèe wa moba bana banga, ebe bampele ebe ba babasi. Kyewo Nkolo Ekambambasi.