¹ Nwaphongo na ngongo ye, alophe etoma eye, yango mena toloophembe. ²  Tole maphoo manso makyele bée miibombo. Tolookatele bato, toloobongole maphoo ma Nwaphongo. Kasi towo bosembo o boo pha Nwaphongo. Tozingye babona pho bato banso baebe obotshe toli bato bawo phele. ³ Bo Nsimo Elaa ekyeteya banga, bato bayoko tebaesosolo, eli nde bato ba bungye. ⁴  Pho ya bée bato babungye, Molemba okokonza munse mumu kabunzinya malondo ma bée pho bée sa anola Nsimo Elaa. Tozingye bée bawene nwenya molole o ikolo sa bèe. Nwenya me moolole moüte na Nsimo Elaa ya nkyemo ya Yesu Klisto oli elala ya Nwaphongo. ⁵ Wa imole banga Nsimo Elaa, tolowo pho ya banga manpenza, towo pho ya Yesu Klisto obotshe eli yo Nkolo wa bato banso. Ka pho ya banga, toli bato bée ba etoma pho ya Yesu. ⁶  Pho Nwaphongo wakyela yo mokyisi awo yokye; nwenya molole onte ya enzombi! Eli nde ona yo Nwaphongo owa lola o mandondo ma banga pho ya ilophe malondo mateya bato nkyemo ya Nwaphongo ikyiwenene o boo pha Klisto. ⁷ Toli bakoo ndokolo mambongo maakyela bée na yondo, kasi toli na ekpele yonoyo eya motuya onte ya banga. Kyeteya obotshe nwenya munene pho ya ikyela etoma ya Nwaphongo moüte ne kasi na banga phe. ⁸  Bato baloyelele na bibasi mboka enso, kasi tebalobome. Balolukye na maphoo kasi toititale. ⁹  Ba lowiinya kasi te balozwe. Baloünza kasi te balobome. ¹⁰  Mbala na mbala tonyanya iwa sa Yesu o nzoto ya banga pho bomoo phe bo wenene na o nzoto ya banga. ¹¹ Na boli banga na bomoo, toli mbala na mbala o ikama sa iwa pho ya Yesu, pho bomoo phe bowenene na o nzoto ya banga ikyi we. ¹²  Yango mena iwa sili mi banga nkolo inso. Pho ya obotshe bomoo bobe na bée. ¹³  Bakoma o buku pha Nwaphongo obotshe, Naanola Nwaphongo yango mena nawo. Na banga toanole Nwaphongo me, yango mena towo. ¹⁴  Pho toebe obotshe owaakola Nkolo Yesu, aaloakola na banga me molongo na Yesu, emba amokye na banga na bée o boo phe. ¹⁵  Toititale o maphoo manso pho ya bèe, na bomoo ngolu ya Nwaphongo ekomele bato na boikye. Yango mena bato bamoba baikye pho ya imophe melesi na pho ya imokumbela. ¹⁶ Yango mena toloophembe. Na bo nzoto ya banga kyiphembe na mo na mo, kasi o mandondo ma banga, Nwaphongo kalophe bokusi mokolo na mokolo. ¹⁷  Mampasi maokye banga inwanwa eye mali makyikyi imamekyinya na nkyemo iinzikye, na ya bobele Na bobele ikyi lobongyisa yo. ¹⁸  Pho maümunya ma banga te mali mi maphoo mawene be, kasi mali mi maphoo maate maawene bèe; pho maphoo maawene bée temaakoko kasi maatemawene bée mali pho ya bobele na bobele.