¹ Yango mena nakani obotshe esikule yaa oka bèe pho nde nakuli ebuya bato ba ngongo. ²  Bo naebuye bato ba ngongo, ete wazwane moto owa moephe nkyisa pho bèe banso wamoba na ngongo. ³ Yango mena naekomesi mokanda ɓo waekomelaka nga o elele ya obotshe na ya ekyeka, sizingaka obotshe bonaesi oka bèe nayaezwa na ngongo ebe na bato bawa bakokakyi impe nkyisa. Nali na ianola obotshe bo na be na nkyisa na bèe banso oli bato ba nkyisa. ⁴  Waa ekomela nga mokanda mamuna, na mokoma na ndondo boblosi nana mbembe o miyo. Sizingaka iyeyokyisa ngongo, kasi naekomela pho oebe ndengye ekyeezingye nga. ⁵ Bo moto monomo ampe mpasi o motema, taikyi ephe nde nga na nga, akuti ephe na bèe banso me, kasi banga samba lobo lolekyinya lowo me. ⁶  Pho ya moto wa ndengye mena, bato baikye bakokyi imooya, yango mena, ⁷  inwaŋwa eye oengyesi imolimbisa na imokuya, bo phe ngongo yaa mophila na boikye. ⁸ Emba naebondi, omoteya polele obotshe oli nde imozinga. ⁹  Ntina eya ekomelaka nga ya baka pho ya iemeka na ikyeka bokotosa phele. ¹⁰ Bo olimbise moto, nga naamolimbisa me. Bo nga nalimbise moto mi lowo lookokyi nga imolimbisa, eli pho ya bèe, o miyo ma Klisto. ¹¹  Pho banga sakosama na Molemba. Pho toloobungye maümunya me. ¹² Wakoma nga o Troas pho ya ikye teya Nsimo Elaa ya Yesu Klisto, omo naesi ya wene obotshe Nkolo Yesu ambongyiselaka nzela pho ya iteya. ¹³  Kasi nabaka na boilakye pho sikaka zwa nwebi na banga Tito. Emba namba ya ika bato ba Troas, namba ya kyende o Makedoniya. ¹⁴ Tokumbele Nwaphongo okolokambe nkolo inso o elonga o nzela ya Yesu Klisto. Na nzela ya banga kaebinya Yesu Klisto mboka enso ndokolo solo ya malasi ekye nyangwe mboka enso. ¹⁵  Na bomo toli ndokolo malasi ma solo elaa mabonzele Klisto Nwaphongo, toli malasi me pho ya bato baali o nzela ya lobiko na baamibungye itakye na Nwaphongo. ¹⁶ Pho ya bato bali o ibunga, solo me eli ebe, kye bakambe o iwaa. Pho ya bato baabikya Nwaphongo, solo me eli elaa, kye bakambe o bomoo pha bobele na bobele. Emba okokyi ikyela etoma me nza? ¹⁷  Tololi ndokolo bato bayoko baüngya Iloba sa Nwaphongo, kasi pho eli Nwaphongo owa lotoma, towo nde na bosembo o boo phe pho toangana na Yesu Klisto.