¹ Eli nga Polo owa olo Nwaphongo pho ya iba toma ya Yesu Klisto na Timote nwebi na banga, toekomele mokanda mumu bèe bato ba ingomba sa Koliti na baanosi banso baasu bali o nkyisi ya Akaye. ²  Nwaphongo ango wa banga na Nkolo wa banga Yesu Klisto baekyele bolaa, baephe na bose. ³ Tokumbele Nwaphongo ango wa Nkolo wa banga Yesu Klisto. Nkolo inso kaokyele bato ngongo, kabakuya. ⁴  Mbala inso ikyinyokomo banga, kalokuya pha ya obotshe na banga tokyende kuya nde bomo me bato banyokomo. ⁵ Nde bomo pho minyoko ma Klisto miili miikye mi banga, nde bomo Nwaphongo kalokuya na boikye pho banga toangana na Klisto. ⁶ Bo toli o nkaka eli pho ya obotshe bée okuyame ozwe ibikyi; botokuyane, eli pho ya obotshe bée okuyame na ikanga motema o minyoko bo mizwe banga. ⁷  Toli na ianola obotshe Nwaphongo kaelenza bokololenza yo, pho bèe kookye mpasi nde bookookye banga me. ⁸ Bebi na banga, tozingye obotshe oebe bowaoka banga mpasi o manyete ma Azi. Tooka mpasi na boikye walekaka na bokusi pha banga. Toloikaka umunya na obotshe tomobika. ⁹  Phele, toümunyaka o mandondo ma banga obotshe tomowa. Nzuka Nwaphongo akyela babona pho banga salemela bokusi pha banga mampenza, kasi pho tolemele nde yo. Eli yo okoakole bato o iwa. ¹⁰  Eli yo owa lobikya o iwa me saa boobo si unvakyi waa banga, amba na lobikya na o mampasi masuu me; molemo nwa banga moli nde oka ye pho amokula lobikya na o mampasi masuu nde m. ¹¹ Na bèe, wa losunga na mabondeli. Pho bo bato baikye babondeleNwaphongo pho ya banga, bato baikye baamophe melesi me pho ya bolaa pha lokyela yo. ¹² Kyeka lowo lokyele mawala ma banga lango lolo; o mandondo ma banga toebe obotshe mobesi nwa banga o mokyisi moli molaa konza oka bèe, tobe na bèe na imiüya na ná bosembo boüte na Nwaphongo. To loika kambema na zebi sa bato kasi na ngolu ya Nwaphongo. ¹³  Pho o nkanda ya banga, toloo ekomele maphoo masuu, nde matangye bèe na ma sosolo bèe. Na anole obotshe wa lososolo na bolaa, ¹⁴  pho olosososi bonte inwanwa eye, mokolo nwa moya Yesu Nkolo wa banga, wa mozwa ngambo, pho ya banga na banga tomozwa ngambo pho ya bèe. ¹⁵ Nabaka na ianola bomo yango mena nazingaka naino iya oka bèe pho naesungye mbala eya ibale, ¹⁶  emba bonaüti oka bèe na mokyende o Makedoniya, bonamani o Makedoniya nambe kula ya butwa oka bèe, pho okyende nzika o Yuda. ¹⁷ Waakana nga obotshe na mokyela babona, nakana bokanela? Na nyango ya nga ili nde nyango ya bomoto pho na wo “èe“ na “phe“ mi lowo lonolo? ¹⁸  O boo pha Nwaphongo oli na bosembo na wo na bèe ngakye, ya wo nga na bèe teyaikaka ba “èe“ na “phe“ mi lowo lonolo. ¹⁹ Pho Yesu Klisto, Nwana wa Nwaphongo, yo mampenza owaeteya banga, inga na Sila na Timote, yo taika wo “èe“ na “phe“. Mi lowo lango lonolo, aba kawo nde “èe“. ²⁰  Pho eli “èe“ yo okolophe ianola obotshe manso malolakyela Nwaphongo mali ma phele. Emba o nzela ye towo obotshe: Ame pho ya ikumbela Nwaphongo ²¹ Eli yo Nwaphongo yo mampenza okolokuya na banga na bèe o nzela ya Yesu Klisto. Eli nde yo owa loolo. ²²  Alokyela elembetele ekyeteya obotshe toli bato be, amba na tonza mandondo ma banga na Bolobo, okoteya obotshe alophe mbolo nsuu yaawoko yo. ²³ O boo pha Nwaphongo nakati seleka na bomoo pha nga, bo nakate na wee; yabaka pho nga saaya iyaekyela bobe, yango mena siika yaa o Koliti. ²⁴  Teli obotshe toyaetomisa isengyesi bèe ianola, pho waünva anola Yesu Klisto na bokusi. Kasi tozingye ikyela etoma elele yonoyo na bèe pho obe na nkyisa.