¹ Esengyesi obotshe na mitate, na botebe bolaa, kasi nalukye iwo inwanwa pho ya mandoto na maphoo maanveninyaka Nkolo. ²  Naebe moklisito monomo, owa baaka o ikolo, elekaa lolo mambula iko mbuka manee, (siebe naa abaaka o ikolo phele naa yabaka ndoto, Nwaphongo yo mampenza kaebe). ³ Phele, naebe obotshe Nwaphongo akyende na moto me o Paladiso. (Nakule wo ngakye, siebe naa abaaka o ikolo phele naa yabaka ndoto, Nwaphongo yo mampenza kaebe). ⁴  Omo aokaka maphoo matemakokyi moto iwoo naa imekola. ⁵  Pho ya moto me namitata, kasi pho ya nga, namokyela mawala ma nga nde o bokoo pha nga. ⁶ Bo nazingakyi imitata nde sikyesi ndokolo moto wa nwaa, pho nde nawo maphoo; maa phele. Kasi nale imitata pho siibenele obotshe bato babee na maümunya manene mi nga koleka maphoo mawene bée na maokye bée pho ya nga. ⁷  Yango mena, pho nga satonda na mawala mimapho ma nveninyaka Nwaphongo, Nwaphongo ampe bolosi bokusi ndokolo toma ya Molemba pho ya invanda na inkatela pho nga satonda na mawala. ⁸ Nabondelekye Nkolo mbala iyato pho ya obotshe ambikya na bolosi me. ⁹  Kasi yo amba ya ambuyisa yokye: Ngolu ya nga ekokyi na we. Pho mwiya nwa nga momiweninya oka moto ootoli na bokusi. Yango mena nasepele nde imitata na bokoo pha nga, pho mwiya nwa Klisto mobee mi nga. ¹⁰  Yango mena nasepele ɓokoo pha nga, bo bantosi, bo na kambi, bo banyokosi na bo banveninye mpasi pho ya Klisto. Pho imbele sili nga na bokoo, eli nde sango sili nga na bokusi. ¹¹ Nawo ndokolo na yeya, kasi eli bèe bato bazingye bomo. Pho esengyelakyi oɓokye bèe onzambelele. Pho na bo sili na ntina, bato babangye bèe batoma baanene tebaandekye. ¹²  Bilembo biweninya obotshe nali owakolo toma bakyelamaka onte ya bèe, bèe koebe bowabaka nga nakangye motema mi maphoo manso, koebe na bilekyesako ndengye na ndengye ba weninyaka mwiya nwa Nwaphongo. ¹³  Ekpele'ye eyakyela nga o mangomba masuu eteyaika nga kyela oka bèe? Naebe nde lowo lonolo, obotshe sika anola obotshe onzeya. Indimbisa na bobe pha ekyela nga. ¹⁵  Pho ya nga, namoba na nkyisa ya ibungya inso ili na nga, na imibungya nga mampenza pho ya bèe. Bo nga na ezingye na boikye babona, bèe wa munzinga bontee? ¹⁶ Wa moanola obotshe sikaka baa ephesi pho ya bèe. Kasi bato bamowo obotshe, nga Polo moto mobe, na yaekpela baphalanga na boole. ¹⁷  Onte ya bato batomaka nga oka bèe, moto nza owa toma nga obotshe ayaekosa pho ankpele baphalanga? ¹⁸  Natomaka Tito na nwebi monomo okoebe bèe obotshe bayee oka bèe. Emba Tito aya ekosa pho aekpele baphalanga? Banga ne toloika baa na maümunya ndengye yonoyo? ¹⁹ Tee nono inwanwa eye, bèe koümunya obotshe nalukye nzela ya imilongya o boo pha bèe? Teli bomo! Towo nde o boo pha Nwaphongo bozingye Klisto. Bande na nga, nambe wo na bèe maphoo manso mamana, pho tozingye iyesunga pho obotshe okole o nzela ya Nwaphongo. ²⁰ Naile obotshe imbele sa mokoma nga oka bèe, naya ezwa na mozalesi nwa moba sa nsunga naa nwaka nga sa esunga me. Naile obotshe toko na zuwa, yoo na iwelana, itolana, iyoono, mawala na ikyemikyela mobulu ibe onte ya bèe. ²¹  Naile obotshe imbele samokula nga yaa oka bèe, Nwaphongo wa nga sa mpe nsoo o boo pha bèe, emba na motonda na ngongo pho ya bato bakyelaka masumu kalakala, tebambe nale ikyela maphoo maa nsoo, bondumba na maphoo mabe ndengye na ndengye makyelaka be.