¹ Naongye na bèe okangakye mandondo, onde nawo ndokolo moyeye (moto wa nwaa). Nde phele otaa kanga mandondo. ²  Nali na zuwa pho ya bèe, nde booli zuwa sa Nwaphongo, nakane iyelongya na molo monomo, molo me eli Klisto. Na zingye iyeteya o boo phe ndokolo ngondo oli naino sataa eba nzoto ya lele. ³ Kasi koebe ndengye eya kosaka nzoo Ewa na malondo me mabe. Na ile, imbele sisuu Molemba akokyi iya bunzinya maümunya ma bèe maalaa pho bèe sakula zinga Klisto na ndondo yonoyo. ⁴  Pho bo naweni obotshe moto mosuu aesi ya eteya Yesu mosuu okyese na owa eteyaka banga, bèe wa moanola. Koanole Bolobo bokyese na Bolobo pha zwaka bèe na Nsimo Elaa ekyese na eya eteyaka banga. ⁵ Naümunya obotshe bato baabangye bèe obotshe batoma banene, tebandekye na ná ekpele yonoyo. ⁶  Na bosili na yela ya iwo, kasi nali na boebi. Mbala nzikye na a naeweninya phango na maphoo ndengye na ndengye. ⁷ Waeyimolaka nga Nsimo Elaa ya Nwaphongo, sikaka eyonga ekpele. Namiüyaka o boo pha bèe pho bèe obutwe bato banene. Babona nakyelaka bobe? ⁸ Naanolaka iphutama na mangomba ma baanosi ba Nwaphongo masuu, nabaka nabikye nde na bèe pho ya iesunga. ⁹  Imbele saabaka nga oka bèe, sikaka baa ephesi ya moto wabaka nga na masengyesi, pho bebi baütaka o Makedoniya banzelelaka na mbolo inso yaa sengyelaka na nga. Sikaka zinga ibaa ephesi ya bèe, náa milowo ye. Na moikala ibaa nde bomo. ¹⁰ Nawo na bosembo pha Klisto boli onte ya nga ngakye: O nkyisi ya Akaye inso, moto na monomo etaandomya. ¹¹  Na wo babona pho ya'ye? Pho obotshe siezingye? Nwaphongo kaebe obotshe na ezingye. ¹² Ikyikyele nga na moikala ikyela nde bomo, pho, obotshe batoma ba boole babana bée sazwa nzela ya imitata obotshe bakyele etoma nde bokyele banga. ¹³  Bato me babana bali batoma ba boole, baibi, bakatele bato obotshe bali batoma ba Klisto. ¹⁴ Kasi teli lowo la ikamwa, pho Molemba yo mampenza kakate obotshe ali anzelu owa moo. ¹⁵  Tekuli ba na lowo laikamwa bo ɓoto baetoma; bée bakate obotshe bali bato ba etoma ba Nwaphongo owa bosembo, o mokolo nwa nsuka, bamozwa etumbu ekokyi na bitoma ba be. ¹⁶ Nakule wo ngakye: Moto monomo saümunya obotshe nga na yeya (nga nali na nwaa), kasi bokoümunya bomo, anola obotshe na yeya pho nakute mitata nwana bokyii me. ¹⁷  Bo na mitate, siwo bozingye Nwaphongo, kasi ndokolo na yeya. ¹⁸  Bokomitate bato baayoko mi maphoo ma mokyisi, na nga namitata nde bomo. ¹⁹ Bèe bato ba ɓaakolo malondo, komengyele ianolela bato ba yeya! ²⁰  Koanole obotshe bée baebuya baombo ba be, ba ebololo mbolo na malondo, ba etiyole, baewande o maboo. ²¹  Naokye nsoo ya ilowo, toloikaka leka bokoo pho ya ikyela ndengye mena! kasi wa mekye bebi imitata nawo ndokolo na yeya, nakokyi imitata na nga me. ²²  Bée bali Ba-Ebele? Na nga me! Bée bali bato ba Isalayele? Na nga me! Bali bana ba Abalayama? Na nga me! ²³  Bali bato ba etoma ya Klisto? -Namowo ndokolo moto owa yeya- Na balekye, nawene mpasi o etoma ileka be. Nanyoloko mbala nzikye o boloko ileka be. Bato banvandaka na boikye ileka be, nabaka mi makama ma iwaa mbala nzikye ileka be. ²⁴ Bayuda ba nvandaka phimbo mako maato na ibuwa mbala itano, ²⁵  bakonzi ba Baloma bambinda phimbo mbala iyato, bamaa mabanga mbala yonoyo, nazinda na masuwa mbala iyato, nakyela mokolo mobimba o maa, na moo na mokolo. ²⁶  O mambanga ma nga nazwaka makama ndengye na ndengye; makama maa vato na maa masuwa, makama oka baibi, makama oka bebi na nga Bayuda, oka bato batebali Bayuda, na oka bebi na banga ba bole; makama onte ya nkyisi inene na o mabokye. ²⁷ Na wenekye mpasi na bitoma biikusi. Mbala nzikye sikaka lala ebuu. Na waka na nzala nana phowa ya maa, imbele siiyoko sibaka nono na ekpele ya izaa. Nazangaka na etobu, na nyokomo na ná mpiyo. ²⁸  Mampasi masuu malii kasi sii matangye. Maümunya ma nga ma mokolo na mokolo mali pho ya baanosi ba mangomba manso. ²⁹  Moto monomo bo aphembi o nzela ya Nwaphongo, na nga na phembe me. Bo moto monomo akaa o isumu, wankyele mpasi ikye o ndondo. ³⁰ Bo ebe obotshe na mitate, na mitata na bokoo pha nga. ³¹  ŊNwaphongo, ango wa Nkolo wa banga Yesu, ookokumbele bato nkolo inso, kaebe obotshe siikate. ³² Wa baka nga o Damaseke, mokonzi o munene wa mokyisi me yabaka Aletasi, mokonzi monomo abaka onse ye. Mokonzi me, akyekye mikyela batuluku o bibonga binso ba mokyisi pho ba nzakya. Mokyisi me nwalungamaka na ekuka. ³³  Kasi baanosi ba Nwaphongo bamba nyosa mieluba enene, bamba ya ntokolo o fenetele eyabaka o ekuka, nono wa nzuya bée o nze. Nono waalota nga.