¹ Eye ya moba mbala ya nga eya iyato ya iyaa oka bèe. Bo wakoma bée o buku pha Mibeko obotshe: Batene bolombe bookyi manzoka mabale naa maato makyee munoko monomo. ²  Nali na lowoo lonolo la iwole bato bakyelaka masumu na bèe banso me. Naünva ewole lowoo me imbele sabaka nga oka bèe mbala eya ibale, na inwanwa eye boli nga itakye, nakule butolela lowoo me ngakye: Mbala eya nsima wamoya nga oka bèe, esiokye na moto monomo ngongo. ³ Pho kozingye naeteya obotshe Klisto kawo o munoko nwa nga, walowene. Iyo tali na bokoo oka bèe, kasi kateya bokusi phe onte ya bèe. ⁴  Nde phele, azangaka bokusi imbele sa mobakaka bée o ikolo sa ekulusu, kasi inwanwa eye ali na bomoo pho ya nwiya nwa Nwaphongo. Na banga tozangyi bokusi ndengye eyazangaka Klisto, kasi wamowene obotshe toli na bomoo boli ne, pho mwiya nwa Nwaphongo nwa banda ikyela na banga onte ya bèe. ⁵ Omimekye bèe mampenza booli onte ya ianola. Omimekye! Tooebe obotshe Yesu Klisto ali onte ya bèe? Nwanaka imimeka me siloekpenele. ⁶  Kasi naümunya obotshe wa moeba obotshe imimeka me tesiikyi loekpenela. ⁷ To bondele Nwaphongo obotshe bèe sakyela nono bobe bonobo, tololi na phowa ya imilongya, kasi tozingye obotshe bèe okyele bolaa, na bo banga toloikyi longa. ⁸  Pho tolokokyi itemele bosembo pha Nwaphongo, kasi tosengyesi nde ikyela ili phele. ⁹ Tokumbe imbele sili banga na bokoo emba bèe na bokusi o nzela ya Nwaphongo. Lowo loobondele banga Nwaphongo loli obotshe bée obe bato balaa mpenza. ¹⁰  Yango mena, naekomesi babona o boo pha nga iyaa oka bèe, pho waamoya nga oka bèe, nga saya ephe etumbu na bokonzi pha mpe Nkolo, bokonzi me boli na ntina ya itomba ingomba sa bèe, kasi pho ya isioto phe. ¹¹ Kasi inwanwa eye bande na nga, oikala na bolaa. Luka ikyela bolaa, kuyinyaka bèe na bèe, ookanaka onte ya bèe, baa na ná bose. Emba Nwaphongo owa lozingo na owa bose amoba na bèe. ¹²  Obeyinya bée bakyi na baayoko, ombe na yambana. ¹³ Baanosi ba Nwaphongo bali wawa baelongosi. ¹⁴ Le obotshe ngolu ya Nkolo Yesu Klisto, lozingo la Nwaphongo, na isungyi sa Bolobo Bosantu ibee na bèe banso.