¹ Bafalisayo na baandeki bune baya toki na Yelusalema ban'timba. ² Bao ona bene banafunji nake baolea n'bako kanga sokosa njaga. ³ (Kanyongo Bafalisayo na Bayaudi bakaolea kanga sokosa njaga'abo anja, kanyongo baya jigi na n'ponjo a ba fhomi. ⁴ Saa ne Bafalisayo batoki ka soko bakatoke ku leaga kanga esokosa, bayatu na kema angboo asii n'ne baya pati, saa beno, kepoma a sokosea, mbikib'o, mbeka a nyondo, na ekaa.) ⁵ Bafalisayo na baandeki baomuisia Yeso, " Kanyongo sina banafunji nako bakaotamba namuna mochi na n'ponjo a bafhomi, alakini baolea n'bako kanga sokosa njaga'abo?" ⁶ Alakini aoengodea, " Isaya ayan'labi anja kanyongoo a banjonjoko. Bene baandeki, ' Bakpa ne baomoesimia ka ebhombo, alakini meema nab'o a dhanga na eme. ⁷ Baomoabudua jaai, na fondisa amuli a bakpa bya mafundiso nabo.' ⁸ Bodheketi amuli a Mokonga na bedha n'ponjo a bakpa." ⁹ Agotoo engodea, " Namuna sina boenei bomake amuli a Mokonga na bedha n'ponjo nanu! ¹⁰ Kanyongo Musa ayagii, 'En'simia abako na amako,' na, ' N'mbo ayongi kema ajede a abakee ao amakee aopasa akue.' ¹¹ Alakini bogii, ' Kabe n'kpa an'ngodei abakee ao amakee, " N'ne neopasa nekofhe ka bedhe'ako ane Korbani'" (maana li ane Egabo), ¹² ka'ake na siki'a gea kema mutaa abakee ao amakee. ¹³ Boo uja yonga a Mokonga na n'ponjo nanu n'ne boobisa. Na kema asii ne boobgea. ¹⁴ Aoofhana goto n'kindi a bakpa na engodea, " Omookani, benu bobu na okafhani. ¹⁵ Tafho kema ne aenei atoke na n'senge a n'kpa n'ne aenei amuuje kabe angi subi'ake. N'ne aotoka subia n'kpa aange aomuuja." ¹⁶ ( Okani anja kabe bona kechuwe a okafha.) ¹⁷ Saa ne Yeso aya deketi bakpa na ngia kenju, banafunji nake baomuisia gua mekele no. ¹⁸ Yeso aoengodea, " Na benu bojigi kanga ubafha? Bokoo uba gea kema buli ne angi subia n'kpa katoka ka n'senge katoka ku amuiije, ¹⁹ kanyongo katoke ku ngia subia meema nake, alakini agee subia ekundu nake na nyena mopaka omaa nyia.?" Ka laba ne Yeso aogea gea elea buli aanja. ²⁰ Aogea, " N'ne aotoka subia n'kpa aange aomuuja. ²¹ Kanyongoo subia n'kpa, ka meema, aange kema ajede, mambo, kubha, utaa, ²² otungo, kpadha, bojede, jyaa, masa, kankie, edokomisa, na kobobo. ²³ Kema jaai ne aotoka subia n'kpa na uja n'kpa." ²⁴ Aotoka fua aoga ka mosomba Tiro na Sidoni. Fua baondgia kenju mochi, kaya kondiake n'kpa aube oma ne alowe, dhoni kaya toki'ake asemeane. ²⁵ Alakini mala imochi n'ke mochi n'mbo n'seka nake ayatu ba bayoya ao oka guake aobika na gua kechinji'ake. ²⁶ N'ke no ayatu Mugiliki, Surofoenikiani ka ebokoti. Aon'dengemisa atokise bayoya subia n'seka nake. ²⁷ Aon'ngodea, " Dheketa fho banichi balee. Kanyongo n'naake anja bhoa elea a banichi na ebofha bamboa." ²⁸ Alakini aon'jibua na n'ngodea, " Eya, Bosomwa, ata bamboa baolea elea ne agu kusia meja a banichi. ²⁹ Aon'ngodea, " Kanyongo a n'ne ogii, gaa anja. Bayoya batoki subia n'seka nako." ³⁰ Aoja kenju nake aon'donda michi'oke adhae ka eka, na bayoya ban'toki. ³¹ Agotoo toka ka mosomba a Tiro, aoga na Sidoni ka ob'a a Galilaya mopaka ka mosomba a Dekapoli. ³² Baon'bika na n'dhaki mutake n'mbo kayatuo yonga anja, baon'dengemisa abise njaga'ake guake. ³³ Aon'bedha aoga naye mbamba dhanga a n'kidi a bakpa sisake, aobisa michi'a njaga'ake subia kechuwe nake, aogaba na bedha edhaka'ake. ³⁴ Aolenga kegoo, aofhekuma, na n'ngodea, " Efata," maana li, " Ukukana!" ³⁵ Mala imochi kechuwe nake ao ukukana, na n'dhakio a edhaka'ake aotoka, aokpanga yonga anja. ³⁶ Yeso aon'ngodea n'kpa kaube mbe. Alakini bene bayan'ngodei adakane na bene aange ayatuo yonga u. ³⁷ Bao yayama asii, baogea, " Aogea kema buli anja. N'dhaki aokafhi na yonga."