¹ Isa imochi saa ne Yeso atumono'ofundisa bakpa subia ekelo na fundisa enjili ne bakota a bokoani na baandeki baya biki mutake na ba fhomi. ² Baoyonga baogea, " Osongodea ka bokota sina n'ne oogea kema ne, ao ani ayakofhi bokota ne." ³ Ao ejibua na engodea, " Neno uisiaae usia mochi, na bomongodee. ⁴ Ubhatizo a Yoani aya toki kegoo ao mutaa bakpa?" ⁵ Bao waza sisab'o, baogea, " Kabe begii, ' Atoki kegoo' ageea, ' Kanyongo sina boko n'belekei?' ⁶ Alakini kabe begii, mutaa bakpa, bakpa bobu baso betaae ete, kanyongo bakpa bobu baya ubi geae Toani ayatu n'nabi." ⁷ Baon'jibua geae bakao uba oma ne aya toki. ⁸ Yeso aoengodea, "Na eme ketoke ku nenongodee ka bokota sina neogea kema ne." ⁹ Aoengodea bakpa mekele ne, "Mogaa mochi aya koni ebhondo nake, ao deketa u motaa bamotisi ebhondo aoga kanji angboo ka matu asii. ¹⁰ Ka saa anja ao n'teka n'kpa a mokambo nake mutaa bamotisi ebhondo, bamofhe mbuka a chiko nake a ebhondo. Alakini bakpa no baon'bheta, baon'jisa njaga jaai. ¹¹ Aon'teka ongboo bagotoo n'bheta, baon'kuisa na soni, baon'jisa njaga jaai. ¹² Aon'teka ongboo a isalo ba gotoo n'tuma, baon'jisa. ¹³ Mokota a chiko'a ebondo aogea, 'Negeaae kema sina? Nen'tekaae michi'omoo n'mbe nen'kondi. Saa angboo baenei bamofhe esima.' ¹⁴ "Alakini saa bachungi'a chiko baya booni, baolaba sisab'o, baogea, 'N'mbe ambe muliti. Ben'mwe, kanyongo uliti ne ajige'asu.' ¹⁵ Baon'maka mbamba a chiko na ola'ake. Kema sina moko'a chiko aenei agee mutaa bakpa no? ¹⁶ Abikaae na uja bachungi'a chiko a ebhondo, na ebofha bachungi angboo." Saa ne baya oki bene, baogea, "N'no n'natoka ku ab'e." ¹⁷ Alakini Yeso ao eonjea, aogea, " Maana na kema ne baandeki ane eke: 'Ete ne bafheki baya kpemi abiki ete a nsungo?' ¹⁸ Kila n'mbo agu kao abhunukaae ghutuka gbutuka, na n'mbo agua ku kao ejigaae ebuu." ¹⁹ Baandeki na mokota a bakoani baokenge ban'dunge ka saa no, kanyongo bayaubi geaae aya maki mekele no kanyongo'abo. Alakini batuo tea bakpa. ²⁰ Baon'lenga bokeboke, baon'teka abhongola n'mbe aodema geae ana dhoni, gea bapate yonga ajede mutake, bene ban'gee naye mutaa basambisi ka bokota a mena'anji. ²¹ Baon'muisia, gea, "Mwalimo, beubi geae oolaba na fundisa dhoni, na koako n'gama n'kpa, alakini oofundisa dhoni a afhe a Mokonga. ²² Ane anja belipe kodi mutaa Kaisala ao n'na beno?" ²³ Alakini Yeso aya ubi konjonjoko nabo, na engodea, ²⁴ "Moonisani dinali mochi. Maenge na ina a ani n'ne akao?" Baogea, A Kaisala." ²⁵ Aoengodea, "Mofhani Kaisala n'ne ane a Kaisala, na Mokonga kema a Mokonga." ²⁶ Bakaya toki bapate kosa imochi kino aya labi mosa a bakpa, alakini baoyayama ka jibo nake, bao dakana. ²⁷ Saa ne Basadukayo mochi bayabiki mutake, bano baogea geae ufufuko n'naake bei, ²⁸ bao muisia, gea, "Mwalimo, Musa ayaandeki geae kabe moko aku aon'deketa n'ke kanga banichi, muna'amake aopasa abue n'ke no kanyongo abokote banichi kina a muna'amake. ²⁹ Boko saba baya loe, na n'mbo a kwanja aon'songa n'ke, aokua kanga banichi, ³⁰ n'mbo a pili goto beno. ³¹ n'mo a isala ao'boa, na bene bene bobu saba goto baokua na deketa'ake kanga banichi. ³² Kisa beno n'ke no aokua. ³³ N'ke no abaae n'ka n'kpa sina ka ufufuko? Kanyongo bobu saba bayan'songi." ³⁴ Yeso ao engodea, "Bani aka matu ne bao omana na omanisa. ³⁵ Alakini bune bana bojeme ka matu ne a fufuka mutaa bak'u bakatoke ku omana ao omanisa. ³⁶ Bakatoke ku bakue, kanyongo babiki namuna imochi na ba malaika na banichi'a Mokonga, babiki ka ufufuko. ³⁷ Alakini baku baya fufuki, baya moonisi Musa, oma no ka ndula, fua baofhani Bosomwa Mokonga a Abulahamu na Mokonga a Isaka na Mokonga a Yakobo. ³⁸ Ka bene n'aake Mokonga a bak'u, alakini a bune bao onafha, kanyongo bobu baikiki mutake." ³⁹ Baandeki mochi baon'jibua, "Mwalimo, ojibu anja." ⁴⁰ Kanyongo bakaya kengi muisia'ake goto. ⁴¹ Yeso ao engodea, Namuna sina bogii geae Klisto ane muna Davidi? ⁴² Kanyongo Davidi sisake agii subia Buku a Zabuli, Bosomwa ayan'ngodei Bosomwa namo, 'Ika ka njaga'ani a muuku, ⁴³ mupaka bene nebisa ku ba adhui nako kusi'a echinji nako.' ⁴⁴ Na Davidi aomofhana Klisto 'Bosomwa', kanyongo sina abaae goto muna Davidi? ⁴⁵ Aya yongi kema ne ka kechue a banafunji nake, ⁴⁶ " Engefhani na baandeki, bune baokonda tamba na bongo endaa na konda samba anja ka soko na mbata bokota ka sinagogi na oma a esima esa afhulaa. ⁴⁷ Bagoto'o ngbola enju a bake a kekusa, na ka onekana baogea memi endaa. Bakpa nammuna ne bapataae ukumu angbo."