¹ Balipisi a kodi bobu na bakpa a jambi baya biki mutaa Yeso ka oka'ake. ² Bafalisayo na baandeki bobu bao ungumaga kimochi, baogea, " Mogaa ne aesesei bakpa a jambi na leaga naab'o oma imochi." ³ Yeso aoyonga naab'o ka mekele, aogea, ⁴ " Ani subianu, kabe ana ba mogogo mia mochi na n'bungisa mochi'abo, kaenei a dekete makomi tisa na tisa ka ndula na gaa mbusa'a n'mbe aya bungi mopaka an'donde? ⁵ Saa ne an'dondi, an'bisi ke'ekota'ake na fulaa. Saa ne abiki kenju, aofhani ba malikwa'ake oma imochi na badake, na engodea, ' Befulaieni kanyongo nen'pati mogogo namon'mbe ato bungi.' ⁷ Nenongodei bene, fulaa abae kegoo ka n'kpa a jambi no atubuu, konyena bakpa anja makomi tisa na tisa buno bakao konda tubua. ⁸ Ao n'ke sina n'mbe ana gbutuka komi a imona na bungisa imochi, kaenei a lolise obela, fuaa enju, na kaba u anja mopaka aone u? ⁹ Saa ne aopata u, aebofani oma imochi ba malikwake na badake, na gea, ' Falaiani na eme, kanyongo neto pati gbutuka a imona ne neto bungisi. ¹⁰ Ka bene, Nenongodei, fulaa abae mosa a ba malaika a Mokonga ka n'kpa a jambi ne atubuu." ¹¹ Yeso ao engodea, mogaa mochi ayatu na banichi ibee, ¹² n'mbo moganda aon'ngodea abake, 'Abe, n'mofha gbutuka a imona namo.' Aoegabea n'kumba nake. ¹³ Ka matu aboa, moganda ao bisa n'kumba nake oma imochi aotoka aoga ka nji a danga, na koni ange aya gobi kema nake buli ao kpanga ikika kanga boenge. ¹⁴ Saa ne aya gobi kema buli, n'nja angbo ao gua kanji no, aokpanga ba na siki. Aoga kangia ka mokambo mutaa n'kpa mochi a kanji no, n'mbo ayanteki ka chiko a ba ngea. ¹⁶ Ao kpanga leaga elea na bangea badeketi kanyongo tafho n'mbe aya mofhi kema a lea. ¹⁷ Saa ne moganda no aya ji subiake, aogea, ' Bakpa asii a mokambo a abe bana n'bako asii, ne eme neokwa na nja moni! ¹⁸ Ne mamaae na toka moni na gaa muta abe, na ngode'ake, " Abe, negii jambi ka egoo na mutako. ¹⁹ Keenei ake ba moofhane michi'oko; omo bise ubate n'kpa mochi a mokambo nako."' ²⁰ Michi'a ganja ao mama aotoka na gaa muta abake. Saa ne ayatu tondo danga, abake ao moona na gaa mbango na ngomi, na gbukumia'ake na n'didiake. ²¹ Michi aon'ngodea, 'Abe neto gii jambi mutako na ka egoo. Keake na maana bamoofhane mchi'oko.' ²² " Abake aogea, ' Bikani mbango na ngombe anja, na n'lolisaani, na bisani bobake ka jaga'ake na makalabanda ka echinji nake. ²³ Na bikani na n'panjo a kagbema ne anoni n'tenani. Befulaie na ba na fulaa! ²⁴ Kanyongoo michi'omo ato ku, na bene apati goto maisa. Aya bungi, na bene aonekani.' Bao kpanga ba na fulaa. ²⁵ Fomeake ayatu ka chiko. Bene ayatuo bika na kidia bibi a enju, ao oka lembo na n'bina. ²⁶ Aomofha n'kpa a mokambo mochi na muisia'ake kema sina aopasa abe. ²⁷ N'kpa a mokombo no aon'ngodea, ' Muna'amako abiki kenju na abako atonteni n'ponjo a kagbema a bononi kanyongo an'sameli na ngobo anja. ²⁸ " Fhomeake ao bea na kaya toki'ake ngia subi, na abake aojuana aon'dengemisa. ²⁹ Alakini fhomeake aojibua aongodea abake, ' Lenga, mwaka asii ne nekobekani kanyogo'ako, ke zalau mbe kanoni nako, komofhi mbe mponja a meme gea nefulaie na ba malikwa namo, ³⁰ alakini saa ne anako abiki n'mbe auji maisa nako na ba amaikola, on'tenei moganda a kagbema a bononi.' ³¹ " Abake aongodea, 'Michi, oikika na eme esa buli, na kema namo buli ane ako. ³² Alakini ane anja mutasu ka ba anja na fulaia, kanyongo moto'ako ayaku, na bene apati goto maisa; aya bungi, na bene aonekani.'"