¹ Ka saa no, saa ne elefu asii a bakpa baya dondani oma imochi, asii baya dheteani ka echinji, aokpanga mosa engodea banafunji nake, " Endefha'ani na esenge a Bafalisayo, banjonjoko. ² Alakini n'na kema ne asomeni kaonekane ku, na n'ne aiki ka boongombe aopasa ubukana. ³ Kema buli oyongi ka kadifio aokekanaae sua mani, na n'ne otolabi ka kechue a n'pafha a enju aokekanaae ka n'tondo'a enju. ⁴ Neno ngodei, ba malikwa, boko etee mbe n'mbo ao ola ngobo, ne n'ne katoke ku gea kema asii. ⁵ Alakini neno engefhi ka n'mbo boopasa n'tea. N'teani n'mbo, kisa kukua, ana bokota aemaka ka ejimba a insa. Dhoni, Nenongodei, n'teani. ⁶ Baka sombise ku ba moon'kole itano ka gbutuka ibee a bangoa? N'na imochi n'ne Mokonga aenei abosee ka mawazo nake. ⁷ Alakini ao uba esabo a seka'a moo nanu. Boko bange. Bona faidha asii konyena ba mon'kole. ⁸ Neno ngodei, n'mbe amo labi mosa a bakpa, Muna N'kpa an'labeae mosa ba malaika a Mokonga, ⁹ alakini n'mbo amo ngani mosa a bakpa nen'nganaae moso a ba malaika a Mokonga. ¹⁰ Kila n'mbo ayongi ajede ka Muna N'kpa, ba muulimiaae, alakini n'mbo an'nfhoti Loo Motakatifo, baka muulumie ku. ¹¹ Saa ne babiki na benu mosa a sinagogi, baubi a selia na bakota, boko ndindimege kine bayonga ku kinda selia, ao n'ne bolaba ku, ¹² kanyongoo Loo Motakatifo ano fundisaae ne boopasa laba." ¹³ N'kpa mochi ka n'kindi a bakpa aon'ngodea, "Mwalimo, engodea ba munan'ma bagabe uliti na eme." ¹⁴ Yeso aon'ngodea, "Moko, ani ato mobisi mosambisi ao mopatanisi nanu?" ¹⁵ Aon'ngodea, " Engefha sisako ka siki a imona, kanyongo maisa a n'kpa n'naolenga kema asii n'ne anee." ¹⁶ Yeso ao engodea ka mekele, gea, " Chiko a n'kpa a imona aya fholi mbuka asii, ¹⁷ aowaza sisake aogea, ' Nefanyaae kema sina, kanyongo keake na oma a bisa mbuka a chiko namo?' ¹⁸ Aogea, 'N'ne ange negea ku. Ne ngbolaa keleme namo na fheka ongbongbo, na fuaange ne bisaku mbuka namo buli a chiko na n'kumba angboo. ¹⁹ Neyongaae ka nafusi namo, "Nafusi, ona n'kuma asii aesombi n'ne nebisa a mwaka asii. Umbia anja, lea, noa, na ika ka fulaa.'" ²⁰ Alakini Mokonga aya n'ngodei, 'N'bobo, kiifha ne nafusi nako ako deketaae, na kema ne oto tayalisi, abaae a ani?' ²¹ Bene ange n'kpa ane ubate n'mbe aobisa n'kumba asii ka sisake na n'naake na kema mutaa Mokonga." ²² Yeso ao engodea banafunji nake, " Nenongodei, boko bange mbe kanyongo a maisa nanu, n'ne boleae, ao ka nyongo a ngobo nanu, n'ne bololaae. ²³ Kanyongo maisa a nyeni elea, na ngobo anyeni ngombe. ²⁴ Lengani fh'o ban'tufu, bakao kona ao tena ka chiko. Baka na oma a bisa elea ao keleme, alakini Mokonga ao ekutisa. Namuna sina benu bune bona bei konyona ba mbuu! ²⁵ Ani ka benu n'mbe a beli aenei a ongeze gbutuka aboa ka maisa nake? ²⁶ Kabe kotoke ku gea kema ne aboa, kanyongo sina oosangekana ka kema ne aojiga? ²⁷ Wazoni fh'o bene lofho ao mota. N'nao tumika, bongisa kekoba nake. Neyeengodei, ata Solomono ka bodoko nake buli kaya loli'ake ubate lofho ne. ²⁸ Kabe Mokonga ao lolisa kasa a ka chiko, n'ne aikiki kesane, na mema bao maka u ka mabhembe, namuna sina aenei ano lolise kanyena, O benu bona belekea aboa! ²⁹ Boko kabe n'ne boleaae na n'ne bonua'ku, boko bele. ³⁰ Kanyongo nji buli a ka mokonda bao kaba kema ne, na Abanu aubi geae bookonda u. ³¹ Alakini kabani bwame nake, na mbusa banoongezeae kema ne. ³² Boko tee mbe, n'kindi a boa a ba mogogo, kanyongoo Abanu afulai asii anofhe bwame. ³³ Sombisani oma nanu na fholeani egabo a bune baka na kema. Bisani kanu njombi ne n'nao fhoa, imona kegoo n'ne n'nao sia, oma ne bakukuba bakatoke kidiana bibili, na ban'senge ujai. ³⁴ Kanyongo oma ne imona nanu aiki, aange meema nanu abaae goto. ³⁵ " Baani tayali ka mana na lolani n'tongo nanu a china'akudu na obela nanu a lolee, ³⁶ na ikani ubate bakpa ne baon'bodea mwalimo nabo saa ne aobika katoka ka fulaa a eyamani, ao beta kiso a n'pome, baopasa ukuia'ke mbango. ³⁷ Kalamo mutaa bakpa'a mokambo ne mwalimo nabo aendondaae na bao lenga saa ne ao kidia. Ka dhoni, neno ngodei, afholeaae bongo nake na eikisa kaod'o ka meja, na bika ebof'a elea. ³⁸ Kabe mwalimo abiki ka mala a ibee lenga kiifha, oa kabe kesa a isalo, na edonda tayali, bakpa a mokambo no bapataae kalamo. ³⁹ Ka oka bene, gea kabe mwalimo a enju aya ubi saa ne bakukub'a babikaae, enju nake kaya pasia'e abunuke. ⁴⁰ Ne benu boopasa bo ike tayali, kanyongo Muna N'ka aobika ka saa ne bokoo uba." ⁴¹ Petele aogea, "Bosomwa, ooyonga tondo mekele ne kanyongo nasu, ao mutaa n'kpa angboo?" ⁴² Bosomwa aogea, " Ani a onjanja na mokichwa n'mbe bosomwa nake aenei an'bise gua badake bakpa a mokambo kanyongo aebhofhe elea ka saa anja? ⁴³ Kalamo mutaa n'kpa a mokambo no bosomwa nake an'fanyei bene saa a bika'ake. ⁴⁴ Nenongodeai dhoni geae an'bisaae gua n'kumba nake bubuli. ⁴⁵ Alakini kabe n'kpa a mokambo no agii subia meema nake, "Bosomwa namo acheeb'u kaja,' na kpanga bhet'a bakpa a mokambo bhok'o na bhak'e na leaga na n'noa ao lebwa, ⁴⁶ bosomwa a n'kpa a mokambo no abikaae esa na ne n'nao uba an'tenagaae aboboa na bisa'ake oma imochi na buno bana'o belekea. ⁴⁷ N'kpa a mokambo no, uba ekondi a bosomwa nake na kaya etayalisi oa gea sawa na ekondi nake, ban'betaae na gbutu asii. ⁴⁸ Alakini n'mbo n'nao uba na ayagii n'ne ayaenei ban'behte, ban'bhetaae gbutu aboa. Alakini n'mbo baya mofhi asii, ban'memaae asii, na n'mbo nayapati asii, ne beno ange ba'memaae asii. ⁴⁹ Neye biki ko lolisa insa ka od'o, na namuna sina neye kondi ololee jye. ⁵⁰ Alakini neopasa nepate ubatizo mochi, n'ne neopasa neteseke asii mopaka akidi'ane! ⁵¹ Bo wazi geae neto bikisi amani ka od'o? N'naake, Nenongodei, alakini gabekana. ⁵² Kanyongoo kpanga keekee nee na fua batano babae kenju mochi a gabekanaae ; bakpa isalo ka bakpa ibee, na bakpa babee ka bakpa isalo. ⁵³ Ba gabekanaae, abe na michi, michi na abe, n'ma na n'seka, n'seka na n'ma, nyamoto n'ke na n'ka michi'oke, n'ka michi na nyamoyo'ke n'ke." ⁵⁴ Yeso aya labi goto bene ka n'kindi a bakpa, "Saa ne booni ebundu akidi'ani njaga a muuku a mokonda, yongani saa no, 'N'vua abiki,' na aopasa abe bene ande akidia ku. ⁵⁵ Saa ne kuka a kusi ao nyena ubani geae, malifhio abae adjo, na aopasa abe bene. ⁵⁶ Babolia, boubi namuna sina boenie bo ube ali nanu a kaod'o, alakini bene aloe bokoo uba namuna a uba saa ne ao onekana? ⁵⁷ Kanyongo sina boko enei bofanye ukumu anja mutaa ban'kobe nanu? ⁵⁸ Kanyogoo saa ne booga na bune boosamba naabo mutaa basambisi, geanin buli bopatane ka afhe kanyongoo kako bikise mutaa mosambisi, na mosambisi kako bikise mutaa mokota, na mokota maka'ako kenju a kifungo. ⁵⁹ Nenongodei, boko toke ku toka fua mopaka bolipe bangoa buli."