¹ Esa mochi ayatuo mema oma imochi. Saa ne ayagobi, mwanafunji nake mochi aon'ngodea, "Bosomwa, osofundisa mema beno Yoani ayafundisi banafunji nake." ² Yeso aoengodea, "Saa ne boomema, geani, ' Abe, inaako abe na esima sawa motakatifo, Bwame nako abike. ³ Osofhe n'bako nasu a esa buli. ⁴ Osamee jambi nasu, bene besamei bune bana dheni nasu. Koso dhekete n'mbe ka majalibo." ⁵ Yeso ao engodea, " Ani subianu abae na malikwa'ake, aenei agee mutake subia kiifha, na n'ngodea, 'Malikwa, omokopisa gbutuka isalo a n'bako, ⁶ Kabe malikwa namo angi katoka ka afhe, keake na kema ne neenei nebisa mosa'ake? ⁷ N'mbe asub'i aya n'jibu aopasa ayonge, komo vulunge mbe. Beye daki iso a n'pome, banichi'amo na eme beye ka eka. Ketoke ku ne mame na ofha'ako n'bako.' ⁸ Nenongodei, ata ka mami na ofha'ako n'bako kanyongo one malikwake, kanyongo oiki kanga soni, amamaae na ofha'ako gbutuka asii a n'bako ne okondi. ⁹ Nenongodei goto, memani banofhae; kabani, bopataae, betani kiso an'pome, ba ukuaae kanu. ¹⁰ Kanyogo n'kpa ne aomeme aopata; na n'kpa ne aokabha, ao donda; na n'kpa no ao beta kiso a n'pome bao mukuia. ¹¹ Abe sina, kabe anake an'memi bisoko, amofhae njoka oma a bisoko? ¹² Ao kabe an'memi leke, amofhae n'koto? ¹³ Kabene, Kabe obe n'kpa ojede boubi gaba mutaa banichi'anu, namuna sina Abanu n'mbe akegoo aonofha Loo Motakatifo mutaa buno baon'mema?" ¹⁴ Yeso aotokisa bayoya bakauma. Saa ne bayoya baya toki, n'kpa no ayatu kauma ayongi, n'kindi a bakpa baoyayama. ¹⁵ Alakini bakpa asii baogea, " Aotokisa bayoya na Belezebula." ¹⁶ Buna'angboo baon'kenge aeonise alama atoka kegoo. ¹⁷ Alakini Yeso ayaubi mawazo nab'o aoengodea," kila bwame ne agabekani sisake, aujukani, na enju ne agabekani sisake ag'u. ¹⁸ Kabe N'keti aegabi sisake, bwame nake amamaae namuna sina? Kanyogo bogii geae neofholea bayoya na Belezebula. ¹⁹ Kabe neotokisa bayoya na Belezebula, muta ani badanu baofholea nee? Kanyongo ne, babaae ba nondi nanu. ²⁰ Alakini kabe neo etokisa bayoya na michi'a njaga a Mokonga, ubani gea bwame a Mokonga abiki mutaanu. ²¹ Saa ne n'kpa ongbongbo ana bachungi ne bana ngoa kenju nake, oma nake aanja, ²² alakini saa ne n'kpa ne aongbongbo asii an'kindi, n'mbe akumbaae ngoa nake n'ne ayatuo senda kao na uta oma nake. ²³ N'mbe n'naake na eme amo yje, na n'mbe ka iki na eme agee mbamba. ²⁴ Saa ne loo ajede atoki subia n'kpa, aonyena oma ne n'na na ib'o ao umbia fua. Kabe kadondi kema, agii, 'Nejaae goto kenju namo oma ne nete toki'. ²⁵ Ayeoja, aodonga bafuu enja na bisa u anja. Ka bene aopasa agee kobua loo angboo saba kanyongoo babike baike bobu fua. Namuna a maisa a n'kpa no abaae goto ajede asii konyena mosa." ²⁷ Saa ne aya labi kema nee, n'ke mochi ao koga gua n'kindi a bakpa aon'ngodea, " Sofho ne aya kobokoti apate kalamo na ebee ne oto n'nu." ²⁸ Alakini aogea, " Bene, kalamo abe n'mbo ao oko Yonga a Mokonga na chunga i." ²⁹ Bene n'kindi ayatuo ba asii, Yeso aokpanga laba na gea, " Ebokoti ne ane ebokoti mochi ajede. Aokaba alama, baka pate ku alama mochi tondo alama a Yona. ³⁰ Kanyongo Yona ayatu alama ka Ninawi, bene aange Muna N'kpa abaae alama ka ebokoti ne. ³¹ Mwame n'ke a kusi amamae ka ukumu na bakpa a ebokoti ne na eukumua, kanyongo ayatoki na n'sungo a mokonda ka bika oka bokichwa a Solomono, lengani, n'mbe a ognbongbo kon'nyena Solomono a moni. ³² Bakpa a ka Ninawi ba mamaae ka ukumu na bakpa aebokoti ne na u, kanyongo baya tub'u ka maubili a Yona, lengani, n'mbo a ongbongbo kon'nyena Yona a moni. ³³ N'kpa n'naotoka a lolise obela, na somea u kusia djo, alakini ka ngango, ka gea bune baongia baone obela. ³⁴ Iso nanu ane obela a ngobo. Saa ne ngobo nako aanja, ngobo nako bubuli alolaae. Alakini saa ne iso nako aajede, ngobo nako atumaae na kad'ifio. ³⁵ Alakini, engefhani obela ne asubianu n'naake kadh'ifio. ³⁶ Kabe'ake ngobo nako buli ana obela, tafho n'tabi nako mochi n'ne abaae subia kadh'ifio, bene ngobo nako buli abaae ubate obela ne ao lola na bonjenje'ake gu'ako." ³⁷ Saa ne aya gobi laba, Mofalisayo mochi aongodea abike alee mutake, Yeso aoga na umbia. ³⁸ Mofalisayo ao yayama ka ona beno Yeso kaya sokosi njaga mosa a lee. ³⁹ Alakini Bosomwa aon'ngodea, " Bene, bene Bafalisayo boosokosa kepoma ka n'senge na ofhefhe , alakini subii atumi na kuba na bojede. ⁴⁰ Bakpa a kanga ubafha! Bokoo uba geae n'mbe aya bongisi n'senge aya bongisi subi? ⁴¹ Fhole n'ne a subi ubate egabo, na kema buli abaae anja mutako. ⁴² " Alakini ngomi'anu Bafalisiyo, kanyongo boofholea mochi a komi a imona na kasa a chiko, alakini boozalauwa ukumu na ekondi a Mokonga. Ane anja tomika ka ukumu a na ekondi a Mokonga, kanga gua ka kema angboo doto. ⁴³ Ngomi'anu Bafalisayo kanyongoo bookonda mbata a mosa subia sinagogi na samba a esima ka oma'a sombisa n'kumba. ⁴⁴ Ngomi'ako kanyongoo one ubate bota ne aujukani n'ne bakpa baotamba gui kanga uba." ⁴⁵ Muubi mochi a selia aon'ngodea, "Mwalimo, n'ne ooyonga ane efhoti asii muta'asu." ⁴⁶ Yeso aogea, " Ngomi'anu ba mwalimo a selia! Kanyongoo okumbisi bakpa n'kumba ne baka toke ku kumba, alakini kotoki bed'a n'kumba na michia'njaga nako mochi. ⁴⁷ Ngomi'ako, kanyongo oofheka bota a ban'nabi, na ba tatako ange bayaemwe. ⁴⁸ Bone basuud'a na bo ubi mokambo a batatanu, kanyongo bayaemwe na fheka bota'ab'o ⁴⁹ Ka bene goto, Bokichwa a Mokonga agii, " Netekaa mutab' ba n'nabi na bagoigi, baetesaae na olaabo'. ⁵⁰ Ubate mbuka, ebokoti ne a gaekanaae kanyongo'a majia a ban'nabi n'ne boye duki u kpanga a bongisa a mokonda, ⁵¹ Kpanga majia a Abeli mopaka ka majia a Zakaria, n'mbe baya n'mwe ka mazabao k subia ekalo. Eya, Neno ngode, ebokoti ne ba kumbaae n'kumba. ⁵² Ngomi'anu benu baubi a selia, banyongo boto uti chenje a ubafha, bako ngi'ake sisanu, bafhei buno baongia." ⁵³ Kisaa a toka a Yeso, baandeki na Bafalisayo bao n'kpema na manisa'ake ka kema asii, ⁵⁴ Baon'bisia meeko kanyongo ban'pata ka kema ne ageae.