¹ Yeso aoga ka Mamba a Mizaituni. ² Kan'bimba aobika goto ka ekalo, na bakpa bobu baobika; ao ika kaod'o na efundisa. ³ Baandeki na Bafalisayo baon'bika na n'ke mochi ne bayan'dondi ao tungana na munya bakpa. Baon'bisa mosa. ⁴ Baon'ngodea, " Mwalimo, beton'dondi n'ke ne ao tungana na munya bakpa. ⁵ Selia a Musa agii ben'bete n'kpa namuna ne ete; obe ogii kema sina guake?" ⁶ Baya gii bene ka bisi'ake meeko kagea bapate kema an'sitakea kao, alakini Yeso aogudumana na andeka kaod'o na michi'a njaga nake. ⁷ Saa ne batuo muisia tondo, ao mama na engodea, " N'mbo kagii mbe jambi aboe ete an'bete." ⁸ Agotoo gudumana, na andeka kaod'o na michi'a njaga. ⁹ Saa ne baya oki bene, mochi mochi ao tea, kpanga ka fhomi. Kisa Yeso aojika sisake, na n'ke no bayan'bisi mosa'ake. ¹⁰ Yeso ao mama na n'ngodea, " N'ke ne, bakpa ne batoko sitakei? Tafho n'mbe ako ukumuu?" ¹¹ Aogea, " Tafho mochi, Bosomwa." Yeso aogea, " Ataa eme keko ukumua'ke. Gaa, kofanye goto jambi." ¹² Yeso aoengodea goto, aogea, " Nene obela a mokonda; n'mbo abiki mbusa'ani katambe ku subia kadifhio alakini abaae na ebela a maisa." ¹³ Bafalisayo baon'ngodea, " Oosuudia sisako; usuudha nako n'naake dhoni." ¹⁴ Yeso aojibua na engodea, "Ata kabe neo esuudia sisani, usuudha namo ane dhoni. Neubi oma ne netoki na oma ne neoga, alakini bokoo uba oma ne neyetoki na oma ne neoga. ¹⁵ Boo ukumua ka ngobo, ene keun'kumuake n'kpa. ¹⁶ Kabe neye ukumu, ukumu namo ane dhoni kanyongoo keake sisani, alakini nena Abee n'mbo aya moteki. ¹⁷ Eya, baandeki subia selia nanu gea usuudha a dhoni ane usuudha a bakpa ibee. ¹⁸ Nene n'mbo asuudii guani sisani, na Abee n'mbo aya moteki ao suudia guani. ¹⁹ Baon'ngodea, " Abako a koni?" Yeso aojibua, " bokoo muuba Abe na eme; kabe boto muubi eme, butuo pasa goto bomuube Abee." ²⁰ Aya labi yonga ne ka bisa bene aya fundisi subia ekalo, tafho n'mbe ayan'dungi kanyongo saa nake kayatuake bibi. ²¹ Agotoo engodea, " Neo bunga; bomo kabaae na bokuaae ka jambi nanu. Boke bikaae oma ne neoga." ²² Bayaudi baogea, " Oemwaae sisako? Ane beno agii, boko bikaae oma ne neoga'?" ²³ Yeso aoengodea, " Botoki kusi; eme netoki kegoo. Bone bakpa a ka mokonda; keake a ka mokonda nee. ²⁴ Kabene, nenongodei gea bokuaae ka jambi nanu. Kaynongoo kanga belekea gea NEBEI, bokkuaae ka jambi nanu. ²⁵ Bayeo n'ngodea, " Obe ani?" Yeso aoengodea, " N'ne notonoongodei kpanga mosa. ²⁶ Nena kema asii aengodea na ukumua guanu. Alakini, n'mbo ayamoteki ana dhoni; na kema ne neo oka toka mutake, neyonga kema ne ka mokonda." ²⁷ Bakaya oki n'ne ayatuo engodea gua Abee. ²⁸ Yeso aogea, " Saa ne bon'sakua ku Muna N'kpa, boubaae gea NEBEI, na geaae keogea kema sisani. Bene Abee aya mofundisi, neoyonga kema ne. ²⁹ N'mbo aya moteki ana eme oma imochi, kamo deketiake sisani, kanyongo ne tondoogea kema ne aon'fulaisa." ³⁰ Bene Yeso atuo yonga kema ne, bakpa asii baya n'belekei. ³¹ Yeso aoengodea Bayaudi bune bayan'belekei, " Kabe bojigi subia yonga namo, bone dhoni banafunji namo; ³² boubaae dhoni, na dhoni anobisaae hulu." ³³ Baon'jibua, " Bene basiko a Abulahamu beketuake bakobe a n'kpa; namuna sina oenei oyonge, ' Bobaae hulu'?" ³⁴ Yeso ao ejibua, " Ka dhoni ka dhoni, nenongodei, kila n'kpa ne agii jambi ane n'kobe a jambi. ³⁵ N'kobe katoke ku jiga kenju esa bui; michi aambe aojiga esa bui. ³⁶ Kabene, kabe Michi ako bisi hulu, obaae dhoni hulu. ³⁷ Neubi gea bone basiko a Abulahamu; bookabha bomoole kanyongoo yonga namo n'naake na oma subianu. ³⁸ Neo yonga n'ne neto oni mutaa Abee, ne benu boogea n'ne boto oki mutaa baabanu." ³⁹ Baojibua na n'ngodea, " Abasu ane Abulahamu." Yeso aoengodea, " Kabe botu banichi a Abulahamu, botuo pasa mokambo a Abulahamu. ⁴⁰ Boyeo kabha bomoole, n'kpa ne anongodei dhoni gea neto oki mutaa Mokonga. Abulahamu kaya giiake bene. ⁴¹ Boogea mokambo a baabanu." Baon'ngodea, " Boketo bokotani'ake ka afhe a utungo; bena Abe mochi: Mokonga." ⁴² Yeso aoengodea, kab Mokonga ayatu Abanu, botuopasa bomokonde, kanyongoo netoki muta Mokonga nene moni; keto biki'ake sisani, alakini aya moteki. v 43 Kanyongo sina bokoo uba nyongo namo? Ane kanyongo bokotoke ku oka yonga namo. ⁴⁴ Bone a Abanu, n'keti, bookonda gea siki a abanu. Ayatu mooli a bakpa kpanga mosa katoke ku mama ka dhoni subiak. Saa ne aoyonga ao yonga mbea, aoyonga ka okona nake kanyongoo ane n'kpa a mbea na abambea. ⁴⁵ Neoyonga dhoni kpanga mosa, bokoo mobelekea. ⁴⁶ Ani subiane aenei amo sitakie ka jamnbi? Kabe neyongi dhoni, namuna sina boko tekoke bomo belekee? ⁴⁷ N'mbo ane a Mokonga ao oka yonga a Mokonga; boko ebookiake kanyongo bokoake a Mokonga." ⁴⁸ Bayaudi baon'jibua na n'ngodea, " Beke toke gea one Musamalia a dhoni na ona bayoya?" ⁴⁹ Yeso aojibua, " Ketoke ku ba na bayoya, alakini neo moesimia Mokonga, bomo zalau. ⁵⁰ Keakeo kaba bodoko namo; n'kpa mochi ambe aokaba na ukumua. ⁵¹ Ka dhoni, ka dhoni, nenongodei, kabe n'kpa abedhi yonga namo, katoke ku ona kukua." ⁵² Bayaudi baon'ngodea, " Beubi ye gea ona bayoya. Abulahamu na ban'nabi bayaku; alakini ogii, ' Kabe n'kpa a bedhi yonga namo, katoke ku kengea kukua.' ⁵³ Koake ongbongbo kon'nyena Abasu Abulahamu n'mbo ayaku, obe gaake? Ban'nabi goto bayaku. Ogii one ani? ⁵⁴ Yeso aojibua, " Kabe needhokomisi sisani, bodhoko namo ane jaai; ane Abe n'mbo aomo dhokomisa gua n'mbo ogii gea ane Abanu. ⁵⁵ Bokoto muubi'ake, alakini nemuubi. Kabe netogii, ' Kemuubi'ake, ' Netuo pasa nebe ubate benu, n'kpa a mbea. Kabene, Nemuubi na bedha yonga nake. ⁵⁶ Abanu Abulahamu aya fulai ka ona esa namo, aya oni u na aya fulai." ⁵⁷ Bayaudi baon'ngodea, " Koake na mwaka makomi itano, ogii gea oto mooni Abulahamu?" ⁵⁸ Yeso aoengodea, " Ka dhoni ka dhoni, nenongodei, mosa Abalahamu abe , NEBEI." ⁵⁹ Bao bonyea ete ka n'makea, alakini Yeso ao esomea na toka ka ekalo.