¹ Kisa kema ne, Yeso aoga kubi angboo a ob'a a Galilaya, baofhani goto ob'a a Tibelia. ² N'tunduko angbo aobika mbusa'ake kanyongo bayaoni alama ne ayagii gua buno bayatu na ngobo. ³ Yeso aodhafha ka mamba ao ika ba banafunji nake fua. ⁴ (Bibia fulaa a Pasaka a Bayaudi.) ⁵ Saa ne Yeso aya lengi ao ona n'tunduko a bakpa baobika mutake, aon'ngodea Filipi, " Oma sina ooga ka somba n'bako kagea bune balee?" ⁶ (Alakini aya gii bene kagea an'pime Filipi, kanyongo ye sisake ayaubi n'ne aogea anyenekane.) ⁷ Filipi aonjibua, " N'bako a dinari mia ibee katoke ku atu muta n'kpa mochi akute nee ata aboa." ⁸ Andele mochi subia banafunji nake munaamake na simoni Petele, aon'ngodea Yeso, ⁹ " Michi'a nganja mochi ana gutuka itano a n'bako moni na bisoko ibee, alakini n'ne ane eke subia bakpa asii?" ¹⁰ Yeso aogea, " Ebisa bakpa kaod'o." Kasa asii ayatu oma noo. Bakpa bao ika kaod'o, bibia elefu itano ka esab'o nabo. ¹¹ Yeso aobedha gbutuka a n'bako kisa betea akisante, ao ebofha bakpa buno baya iki kaod'o. Aogea namuna imochi ka bisoko, bene baya kondi. ¹² Saa ne bakpa baya kuti, aoengodea banafunji nake, " Dondanisani gbutuka gbutuka ne ajigi, kegea tafho kema ne abungaae." ¹³ Baodondanisa u baotumisa djo komi na ibee a gbutuka ne ayatoki ka n'bako itano aya jigi kino baya lei. ¹⁴ Bene, saa ne bakpa bayaoni alama ne ayagii, baogea, " N'mbe ane dhoni n'nabi n'mbe aopasa bika ka mokonda." ¹⁵ Saa ne Yeso ayaubi gea bayatu bibi a bika dungaake ka bokpekpe kan'bisa mwame, ao ebhoota goto sisake ka mamba. ¹⁶ Saa ne ogogo aya kidiani, banafunji nake baodida ka ob'a. ¹⁷ Baongia ka ketange ka ob'a mopaka na Kapernaumu. Ayatu kadifhio saa no, yeso kaya bikiake mutabo. ¹⁸ Maifhio angbo aonyena, ob'a ao jonga. ¹⁹ Saa ne bayatu ka kiba bibia metele makomi ibee na itano ao makomi isalo bene, bao moona Yeso aotamba gua ob'a na bika bibia ketange, bao tea. ²⁰ Alakini aoengodea, " Eme ambe! Bokotee mbe." ²¹ Bayatuo konda ban'sesee subia ketange, mala imochi ketange aokidia kubi oma ne bayatuoga. ²² Mama nosi, n'yunduko a bakpa buno bayatuo mama kubi'ib'o, bayaoni gea ketanga angboo kayatu fua tondo n'no mochi, n'no Yeso kayangiake kao na banafunji nake alakini n'no banafunji nake bayagee sisab'o. ²³ Alakini, ketenga mochi ayatu fua n'ne ayatoki na Tiberia bibi a oma no baya lei gbutuka a n'bako kisaa Yeso sukulua u. ²⁴ Saa ne n'tunduko bayaubi gea tafho Yeso tafho banafunji nake bayatu fua, baongia sisabo subia ketange na gaa mopaka Kapernaumu na baon'kaba Yeso. ²⁵ Kisa baon'donda kubia ob'a, baon'ngode, " Rabbi, otobiki moni saa sina?" ²⁶ Yeso ao ejibua, gea, " Ka dhoni, ka dhoni, boo mokabha, n'na kanyongoo boto oni alama, alakini kanyongo boto lei n'bako na kuta. ²⁷ Boko tomike mbe kanyongo a elea ne ao fhoa, alakini tomikani kanyongo a elea ne aojiga ka maisa a esa buli n'ne Muna N'kpa anofaae, kanyongoo Abee Mokonga aya teki n'dhakio nake guake." ²⁸ Baon'ngodea, " Beopasa gea kema sina, ka gea betomike mokambo a Mokonga?" ²⁹ Yeso aojibua na engodea, " N'ne ange mokambo a Mokonga: Gea on'belekee n'mbo aya moteki." ³⁰ Bene baon'ngodea, " Ogeaae alama sina, ka gea beone na belekea'ako? Ogeaae kema sina? ³¹ Baabasu baya lei mana ka ndula, bene bayaandeki, ' Aya ebofhi n'bako katoka kegoo na lea.'" ³² Yeso aoejibua, " Ka dhoni, ka dhoni, n'naake Musa ambe aya nofhi n'bako toka kegoo, alakini ane Abee n'mbe aogaba n'bako a dhoni katoka kegoo. ³³ Kanyongoo n'bako a Mokonga ane n'ne adidi kaod'o toka kegoo na gaba maisa ka mokonda." ³⁴ Baon'ngodea, " Moko, asofha n'bako ne a esa bui." ³⁵ Yeso aoengodea, Eme nene n'bako a maisa; n'mbe abikaae mutamo ka kuwe ku na nja, na n'mbo amo belekei kakuwe ku na sikiib'o. ³⁶ Alakini nenongodei bene bomooni eme, na kanga belekea. ³⁷ Kila n'mbo Abee atomofhi abikaae mutam'o ketoke ku n'maka. ³⁸ Kanyoongo nedidi kaod'o toka kegoo, n'na ka gea ekondi namo, alakini ekondi a n'mbo aya moteki. ³⁹ N'ne ane ekondi a n'mbo aya moteki eme, gea ketoke ku n'bungi mochi ka buno ayamofhi, alakini aefufulaae esa a muiso. ⁴⁰ Kanyongo n'ne ange ekondi a Abee, kagea kila n'kpa ne amooni Michi na n'belekea aopasa abe na maisa a esa bui na n'fufula'ake ka esa a muiso." ⁴¹ Bayaudi bao bela guake kanyongoo ayagii, " Emeambe n'bako ne atoki kegoo." ⁴² Baogea, " N'na Yeso ne ambe muna Yosefu, n'mbe bemuubi abake na amake? Namuna sina aogea, nedidi kaod'o toka kegoo'?" ⁴³ Yeso aojibua na engodea, " deketani ngongonaga sisanu. ⁴⁴ Tafho n'mbe aenei abike mutamo mopaka Abee an'teke bibi'ani, na n'fuhulaake ke esa a muiso. ⁴⁵ Baandeki subia ban'nabi, ' Mokonga an'fundisaae kila n'kpa.' Kila n'mbo aya oki na ejifunja toka muta Abee abiki mutamo. ⁴⁶ N'na n'kpa ne, aya mooni Abee, tondo n'mbo ayatoki mutaa Mokonga aya mooni Abe. ⁴⁷ Ka dhini ka dhoni, n'mbo abelekei ana maisa a esa bui. ⁴⁸ Nene n'bako a maisa. ⁴⁹ Baabanu baya lei mana subia ndula baotinda bobu. ⁵⁰ N'ne ane n'bako ne atoki kegoo, ka gea n'kpa aopasa alee kua kagea kakue mbe mono. ⁵¹ Nene n'bako a maisa n'ne adidi toka kegoo. Kabe n'kpa alei ka n'bako ne, aikikaae esa bui. N'bako ne nemofhaae ane kesuku namo kanyongo a maisa a mokonda." ⁵² Bayaudi bao bela subiabo na kpanga sana, baogea, " Namuna sina n'kpa ne aenei asofhe kesuku nake belee u?" ⁵³ Yeso aoengodea, " Ka dhoni, ka dhoni, kanga lea kesuku a Muna N'kpa na noa majia nake, bokotoke ku ba na maisa subianu. ⁵⁴ N'mbo alei kesukun namo na noa majia namo ana maisa a esa bui, afufukaae ka esa a muiso. ⁵⁵ Kanyongoo kesuku namo ane elea a dhoni. ⁵⁶ N'mbo alei kesukun namo na noa majia namo ajigi subiani, na eme subi'ake. ⁵⁷ Bene Abe ne aikiki atomo teki eme, na bene neo ikika kanyongo a Abee, n'mbo amo lei eme, aikikaae goto kanyongo'ani. ⁵⁸ N'ne ane n'bako ne aya didi toka kegoo, n'na bene baabe baya lei na dusukana. N'mbo alei n'bako ne aikikaae esa bui." ⁵⁹ Alakini Yeso ayagii kema ne subia sinagogi saa ne ayatuo fundisa ka Kapernaumu. ⁶⁰ Banafunji nake asii bune baya oki n'ne baogea, " N'ne ane yonga akpe; ani aenei aoke u?" ⁶¹ Yeso, kanyongoo aya ubi gea banafunji nake bayatuo ngongonaga kine, aoengodea, " N'ne ano gii bonjede? ⁶² Eke kabe bomooni Muna N'kpa adhafhi fua ayatu mosa? ⁶³ Loo anga aobisa maisa; kesuku n'naake kema. Yonga ne netoengodei ane loo, na ane maisa. ⁶⁴ Bakpa mochi subianu banaakeo belekea." Kanyongoo Yesu aya ubi kpanga mosa buno bakaya tokiake belekea na ani aya pasi n'sombisa. ⁶⁵ Aogea, " ane kanyongo a n'ne aange netonongodei gea tafho n'mbe aenei abike mutamo, kanga Abee an'kondee." ⁶⁶ Kanyongo a n'nde, banafunji asii baya gee mbamba na kanga tamba goto naye. ⁶⁷ Yeso aoengodea buno komi na ibee, " Bokoo konda na benu bogee?" ⁶⁸ Simoni Petele aon'jibua, " Bosomwa, begaae goto muta ani? One yonga a maisa a esa bui, beto belekei na uba gea one Motakatifo a Mokonga." ⁷⁰ Yeso aoengodea, " N'na emeambe neto esombu, komi na ibee, na mochi subianu ane n'keti?" ⁷¹ Aya yongi gua Yuda muna Simoni Isikaliote, kanyongoo ayatu ye, mochi ka komi na ibee, n'mbo ayapasi an'sombise.