¹ Pilato aon'bedha Yeso aon'beta gbutu. ² Ba soda loka kekombo a ngenge. Baobisa u ka moo a Yeso na n'lolisa ngombe a mbodh'a. ³ Baobika mutake na gea, " Samba, Mwame a Bayaudi!" na n'bheta. ⁴ Pilato aotoka goto ka n'tanga na engodea, " Onani, nen'biki naye ka n'senge mutanu kanyongo boube gea kedondi'ake bojede subi'ake." ⁵ Yeso aoga kan'tanga, na aloli kekombo a ngenge na bongo a mbodh'a. Pilato ao engodea, "Lengani, n'kpa ne ambe!" ⁶ Saa ne bakota a bakoani na bafhomi baya mooni Yeso, bao koga na gea, " N'kpatani, n'kpatani!" Pilato aoengodea, " N'bedhani sisanu na n'kpatani, kanyongoo kedondi'ake bojede subi'ake." ⁷ Bayaudi baon'ngodea, " Bena selia, sawa na selia aopasa akuwe kanyongo agii gea ane Muna Mokonga." ⁸ Saa ne Pilato aya oki bolabi ne, ao sokanaga asii, ⁹ aongia muta mena'nji goto na n'ngodea Yeso, " One n'kpa a kanji sina?" Alakini Yeso kaya mofhi'ake jibo. ¹⁰ Pilato aoengodea, "Koo moongodea kema? Koo uba gea nena bokota a kodha'ako, na bokota a n'kpta'ko?" ¹¹ Yeso aon'jibua, " Koake na bokota guani tondo kanyongoo n'ne bato mofhi toka kegoo. Ane ka bene, n'mbo aya mofhi eme mutanu ana jambi angbo." ¹² Ka jibo ne, Pilato ao kengea n'deketa, alakini Bayaudi bao koga, gea, " Kabe on'deketi n'kpa ne, koake malikwa'ake na Kaisala. Kila n'kpa ne aebisi sisake mwame an'manisi Kaisala." ¹³ Saa ne Pilato aya oki yonga ne, aon'bikisa Yeso kan'senge na in'kisa kaod'o ka mbata a ukumu oma ne baofhani " Etandale," alakini ka ki Ebulania, baofhani, " Gabbatha." ¹⁴ Ayatu esa a bondea Pasaka, bibia saa sita bene. Pilato ao engodea Bayaudi, " Onani, mwame nanu ambe!" Bao koga, " Mbamba naye, mbamba naye; n'kpata!" Pilato ao engodea, " Neenei nen'kpate Mwame nanu?" Bakota a bakoani baojibua, " Bekeake na mwame tondo Kaisala." ¹⁶ Ka bebe Pilato aon'deketa Yeso mutab'o ban'kpate. ¹⁷ Bene ban'bedha Yeso, na gaa, aokumba mosalaba nake, mopaka oma ne baofhani " Gangata," n'ne baofhani ka Kiebulania "Gologota." ¹⁸ Baon'kpata Yeso fua, na boko babee, kila mochi kila n'chi, na Yeso subi'abo. ¹⁹ Pilato agotoo andeka ka kibao na bisa u gua mosalaba: YESO MUNAZALETI, MOKOTA A BAYAUDI. 20 Bayaudi asii baosoma maandeko ne oma no bayan'kpati Yeso bibi a n'nji. Bayaandeki maandeko ka kesambae a Kiebulania, Kilatini, na ka Kigiliki. ²¹ Bakota a bakoani a bayaudi baon'ngodea Pilato, " Koandike, ' Mwame a Bayaudi, alakini, 'N'ne mochi ayagii, " Neme Mwame a Bayaudi.""' ²² Pilato aojibua, " N'ne neandeki neandeki." ²³ Saa ne basoda bayan'kpati Yeso, baoboa ngombe nake, baogaba u gbutuka gena, mochi muta kila mochi; bagotoo gaba bongo. Baoboa bongo n'ne kayatu na oma a sona kpanga kegoo mopaka kusi. ²⁴ Baoyonga sisab'o, " Beke bome mbe u, lakini bene be bete sembe kao beone abae a n'kpa sina." N'ne aya nyeni ka gea maandeke akidiane n'ne ayagii, " Baya gabi ngombe namo subi'abo na maka sembe ka bongo namo." ²⁵ Amake na Yeso aya mami bibi a mosalaba nake, bamuna'amake na amake, Malia n'kake na Kilofasi, na Malia Magadelena. ²⁶ Saa ne Yeso aya mooni amake na mwanafunji nake n'mbo ayan'kondi bamami bibi, aon'ngodea amake, " N'ke, n'lenga, michi'ko!" ²⁷ Aye on'ngodea mwanafunji, " N'lenga amako!" Kpanga saa aon'ga naye kenju nake. ²⁸ Kisa bene, ao uba gea kema bubuli ayo kidiani na kagea maandeko aya pasi onekana, Yeso aogea, " Neoki siki'ibo." ²⁹ Baya bisi n'tuka mochi n'ne aya tumi na makana ajia fua, baobisa bongo atumi na makana ajia na bisa u ka ebombo nake. ³⁰ Saa ne aya buu makana ajia, aogea, " Asi." Ao gudhumisa moo nake na dhusukana. ³¹ Bene Bayaudi, kanyongoo ayatu esa a bongisaga, na kagea ngobo nake kaya toki'ake ajige gua mosalaba ka Sabao (kanyongo Sabato ayatu a lazima asii), baon'mema Pilato ba bhune n'bombo nake na tokisa u. ³² Basoda baobika na bhuna n'bombo a n'kpa a kwanja na n'mbo a pili buno baya ekpati na Yeso. ³³ Saa ne baya biki muta a Yeso, bao ona gea ayo ku, bakaya buni'ake n'bombo nake. ³⁴ Ka bene, soda mochi aon'tuma na ekonga, mala imochi majia na ib'o ao dida. ³⁵ N'mbo aya oni bene ao suudia, na usuuda nake ayatu dhoni. Aubi gea gea n'ne aya yongi ane dhoni kagea boopasa belekea. ³⁶ Kema ne ayanyenekani kagea maandeko akidi'ane, " Tafho n'kua nake mochi ne abunukaae." ³⁷ Maandeko angboo agii goto, " Bamoenjeae na n'tuma na ekonga. ³⁸ Kisa kema ne, Yosefu n'kpa a Alimatayo, ayatu mwanafunji a Yeso kpanga kala(alakini kayaubukani ka tea Bayaudi), aon'mema Pilato kabe aenei akumbe ngobo a Yeso. Pilato ao mofha luusa. Bene Yosefu ao bika na kumba ngobo nake. ³⁹ Nikodemu naye aya biki goo, n'mbo aya biki muta a Yeso mala a kwanja kiifha. Aobika na malasi a manemane na timbe, bibia mboso mia mochi. ⁴⁰ Baobedha ngobo a Yeso na bumbia u na ngombe anja na kasa anja, ubate beno ayatu n'ponjo a Bayaudi ka umba ngobo. ⁴¹ Ka oma no bayan'kpati, chiko moji aboa ayatu fua; na subili bota maochi ayatu fuamo n'ne bakayan'bisiake n'kpa subi. ⁴² Kanyongo ayatu esa a bongisaga a Bayaudi na kanyongo nggangbata ayatu bibi, baon'bisa Yeso subi.