¹ Mogaa mochi ina'ake Lazalo ayatu na ngobo. Ayatu n'kpa a Betania, n'nji a Malia na muna'amake Malata. ² Malia n'mbo aya n'sii Bosomwa gamba a manemane na kombe'ake echinji na seka'amoo nake, muna'amake Lazalo ayayu na ngobo. ³ Ba muna'amake baoteka mbino mutaa Yeso, gea, " Bosomwa, ona n'mbo aoko konda ana ngobo." ⁴ Saa ne Yeso ayaa oki bene, aogea, " Ngobo n'naake kukua, alakini ayatu kanyongo a obebo a Mokonga ka gea Muna Mokonga adhokomane kuo." ⁵ Yeso ayatuo n'konda Malata na muna'amake na Lazalo. ⁶ Saa ne aya oki gea Lazalo ana ngobo, Yeso aojiga esa ibee angboo oma ne ayatu. ⁷ Kisa bene, aoengodea banafunji, " Begee goto na Yudea." ⁸ Banafunji baon'ngodea, " Rabii, keekee ne Bayaudi bako bhetaa ete, ogotoo ja ko?" ⁹ Yeso aojibua, " Esa mochi n'na na saa komi na ibee a sua mani? Kabe n'kpa atambi sua mani, katoke ku betekana, kanyongoo ao onafha na mani a mokonda. ¹⁰ Kabene, kabe atambi kiifha, abhetekanaae kanyongoo mani n'naake subia'ke" ¹¹ Ayagii kema ne, kisa kema ne, aoengodea, " Malikwa nasu Lazalo adhae, alakini negee nen'jujukise ka too." ¹² Banafunji bayeo n'ngodea, " Bosomwa, kabe adhae, ajujukaae." ¹³ Yeso aya yongi ka kukua nake, alakini bayaubi gea aoyonga gua too a umbia. ¹⁴ Yeso aoengodea ka n'tanga, " Lazalo aku. ¹⁵ Nefulai, kanyongo a ina'ako, gea ketu'ake fua kagea bo pase belekea. Begee mutake." ¹⁶ Tomasi, n'mbo baya moofhani Didimo, aoengodea badake banafunji, " Begeeni na besu bekue na Yeso." ¹⁷ Saa ne Yeso aya biki aon'donda Lazalo subia bota ayegii matu gena. ¹⁸ Betania ayatu bibi a Yelusalema, bibi a kilometele komi na itano. ¹⁹ Bayaudi asii baya biki mutaa Malata na Malia, ka ekpekpemisa gua muna'amabo. ²⁰ Saa ne Malata aya oki gea Yeso atuo bika, aoga ka dondana naye, alakini Malia aya iki kenju. ²¹ Malata aon'ngodea Yeso, " Bosomwa, kabe otu moni, ambe fhomeani kato ku'ake. ²² Ataa bene, neubi gea kema bubuli n'ne on'memaae Mokonga, akofhaae u." ²³ Yeso aon'ngodea, " Muna'amako ajujukaae goto. ²⁴ Malata aon'ngodea, " Neubi geae ajujukaae goto ka ofufuko a esa a muiso." ²⁵ Yeso aon'ngodea, " Eme nene ofufuko na maisa; n'mbo amo belekei ataa akue, aikikaae; ²⁶ na n'mbo aiki na belekea subiani katoke ku akue. Bobelekei n'ne? ²⁷ Aon'ngodea, nebelekei gea one Klisto, Muna Mokonga, n'mbe abiki ka mokonda." ²⁸ Saa ne ayagii bene, aoga na moofhana muna'amake Malia baatendu. Aogea, " Mwalimo amoni aokoofhana." ²⁹ Saa ne aya oki bene aoga mbango mutake. ³⁰ Kanyongo Yeso kayatuake subia nji alakini ayatu oma no Malata aya dondani naye. ³¹ Saa ne Bayaudi bune bayatu naye subia enju na buno bayatuo n'kpekpemisa, baya oni Malia amame na gaa mbango ka n'senge, baon'bhea, baubate gea agee ka bota ka gama fua. ³² Saa ne Malia aya biki oma no Yeso ayatu na ona'ake, aogua ka echinji nake na n'ngodea, " Bosomwa, " Kabe otu moni ambe muna'amani kato ku'ake." ³³ Saa ne Yeso aya mooni naogama, na Bayaudi ne baya biki naye baogama, ao suganaga asii subia loo nake na vulungana; ³⁴ aogea, " Boton'bisi oma sina?" Baon'ngodea, " Bosomwa, bika oone." ³⁵ Yeso aogama. ³⁶ Bayaudi baogea, " Onani namuna sina aya n'kondi Lazalo!" ³⁷ Alakini bunangboo baogea, " Ye n'mbo aya uku iso a kendimendime, kaenei fho akpeme n'kpa a kue?" ³⁸ Yeso aogotoo suganaga asii subi'ake, aoga ka bota. Ayatu kubu, babisi ete guui. ³⁹ Yeso aogea, " Tokisani ete." Malata, muna'amake na Lazalo, n'mbo ayaku, aon'ngodea Yeso, " Bosomwa, ka saa ne ngobo nake aujukani, kanyongoo esa gena anyeni kpanga bene oto ku." ⁴⁰ Yeso aon'ngodea, " Ketokon'ngodei gea, kabe obelekei, oonaae bodhoko a Mokonga?" ⁴¹ Baotokisa ete. Yeso aodhafhisa iso nake kegoo na gea, " Abe, neko bhetei akisante kanyongoo omooki. ⁴² Neto ubi geae oomooka tondo, alakini n'ne ane kanyongoo a n'tunduko n'ne aomama bibi'ani aange negii bene, kagea babelekee gea obhe ambo omoteki." ⁴³ Kisa yonga'ke bene, ao koga na eso angbo, " Lazalo bika!" ⁴⁴ N'ku aobika; ngombe ao lingiaga echinji na njaga'ake endondo nake ao bumbukana na ngombe. Yeso aoengodea, " N'kodhani na n'dheketani agee." ⁴⁵ Bayaudi asii buno baya biki mutaa Malia na ona n'ne Yeso ayagii, baon'belekea. ⁴⁶ Alakini buna'ngboo baoga mutaa Bafalisayo na engodea kema ne Yeso ayagii. ⁴⁷ Bakota a bakoani ana Bafalisayo baodondana ka n'tua oma imochi na gea, " Begeaae kema sina? Mogaa ne agii alama asii. ⁴⁸ Kabe ben'deketi sisake bene, bakpa buli ban'belekeaae; Baloma baya biki na uta oma nasu na n'nji nasu." ⁴⁹ Kabene, mogaa mochi subi'abo, Kayafa, n'mbo ayatu koani ongbongbo ka mwake no, aoengodea, " Bokoo uba kema. ⁵⁰ Bokoo ubaba geae ane anja akue kanyongo a bakpa asii kanga bakpa bobu ba tinde." ⁵¹ Aya yongi bene n'naake ka sisake. Alakini, bene ayatu koani ongbongbo ka mwako no, aya n'nabi gea Yeso aya pasi akue kanyongo a n'nji; ⁵² na n'na tondo kanyongo a n'nji, alakini ka gea banichi a Mokonga buno baya fhanjekani badondane oma imochi. ⁵³ Kpanga esa noo na gaa mosa bayatuo panga namuna sina bamwaae Yeso. ⁵⁴ Yeso kaya tambi'ake goto ka n'tanga subia Bayaudi, alakini aya toki fua ka n'nji a bibi a ndula subi mosomba mochi ne baofhani Efulaimu. Aya iki fua na banafunji nake. ⁵⁵ Bibi a Pasaka a Bayaudi, na bakpa asii baya dhafhi na Yelusalema toka ka n'nji mosa a Pasaka kanyongo baeseko sisab'o. ⁵⁶ Bayatuo n'kaba Yeso, na yongaga sisab'o bene baya mame ka ekalo, " Boowaza kema sina? Gea kato bikiaake ka fulaa? ⁵⁷ Bakota a bakoani na Bafalisayo baya bisi selia gea kabe n'kpa aubi oma ne Yeso aloe, aopasa aengodee ka gea bn'ndunge.