¹ Ka bene, kpanga boagi a ngia ka umbia nake a tondo bei, beenei be tee, tafho n'kpa mochi subiasu aenei a cheebue asii. ² Baya songodei mbino anja ubate buno bayaloe. Alakini mbino n'no n'naake na faidha mutabo, kanyongo kaya dondi'ake belekea muta buno bayatu mono'on'bonde. ³ Kagea beye belekei ngia ka umbia n'no, beno aya gii, " Bene neye lapi ka bela, baka toke ku ngia ka umbia namo" Ata bene mokambo nake ayasi kpanga a bongisa mokonda. ⁴ Aya labi oma imochi kanyongo a esa sabha: " Mokonga ao umbia esa a sabha ka mokambo nake buli." ⁵ Agii goto ka kisitali ne, " Bakatoke ku ngia ka umbia namo." ⁶ Bene, ajigi mutaa bkpa aboa kangia ku umbia n'no, na buno baya oki kpanga kala mbino anja ne alakini bakaya gee kau kanyongo a kosa'abo esima. ⁷ Mokonga aya bisi goto esa mochi, ao ofhana u "Kesa ne", Saa ne ayangodei Davidi mala asii ka yonga bene bagii moni kegoo: " Kabe booki eso nake kesane, bokobise mbe meema nanu akpe." ⁸ Kabe Yosua aya ebofhi umbia, Mokonga kaya toki aengodee ka esa angboo. ⁹ Ajigiye tondo umbia a Sabhaato n'nde babisi mutaa bakpa a Mokonga. ¹⁰ N'mbo angi ka umbia a Mokonga ayo umbii ka mokambo nake, sa beno Mokonga aya umbii. ¹¹ Befanye ngufu bengie ka umbia no, kanyongo n'kpa ka gue kao ka bisa mofano a kosa adabo. ¹² Kanyongo Yonga a Mokonga aikiki na anja, kadhofhe ubate mbako ne ao fhea ngambo ibee n'ne aongia mopaka ka nafusi na loo na oma a dondana menge, ao ukumua siki na mawazo a meema. ¹³ Tafo kema aonafa n'ne aenei aesomee mosa a Mokonga, alakini kema buli aiki ndumbu na onekana na iso a n'mbo beopasa beyonge kema bubui mosa'ake. ¹⁴ Ka bene, tangia beno beyen'pati koani ongbongbo n'mbo aya nyeni katoka kegoo, Yeso muna Mokonga be mame anja ka belekea n'ne beya yongi. ¹⁵ Kagea, beke toke ku ben'pate koani ongbongbo n'mbe n'naotoka kua ngomi a kobhobhoko nasu. Ao, bena n'kpa ne aya pati majalibho ubate besu, tondo n'mbo n'na na jambi. ¹⁶ Bekidie bibi a mbata a ngoola na bojeme, kanyongo baso kuie ngomi na pata ngoola ka gobha siki nasu.