¹ Saulo aya okani naabo kaa kuku'ake. Fua teseka asii aokpanga kenju a Mokonga n'ne ayatu ka Yelusalema; na babelekei bao fhanjekana bobu ka mosomba a Yudea, na Samalia, tondo bagoigi bune baya jigi. ² Bakpa anja bao muumba Setefano baobi ngamo angbo kegoa'ke. ³ Alakini Saulo ao kengea uja enju a Mokonga. Aongia enju ka enju, ao etokisa boko na bake, na ebisa subia enju a kifungo. ⁴ Babeleki bune baya fhanjekani baoga bao ubilia yonga. ⁵ Filipi ao dida ka mosomba a Samalia ao elabea gua Klisto. ⁶ N'kindi a bakpa bao okafa bokeboke n'no Filipi ayatuo yonga, bao mookanea ka mawazo mochi, na ona alama ne ayagii. ⁷ Loo ajede ayatuo etoka bakpa asii, bao tata na eso angbo, bakebeka ba kalebe baya fondi. ⁸ Fulaa aob'a asii subia mosomba. ⁹ Alakini mogaa mochi ayatu ka mosomba ina'ake Simoni, n'mbe ayatu momba, bakpa a samalia bayatuo yayama bene atuo laba gea ane n'kpa ongbongbo. ¹⁰ Basamalia bobu, kpanga banichi mopaka bafhomi batuo mookanea; baogea, " Mogaa ne ane bokpekpe a Mokonga." ¹¹ Bao mookanea kanyongo baya yayami matu asii na elemba nake. ¹² Alakini saa ne bayan'belekei Filipi bene aya labi enjili a bwame a Mokonga na ina a Yeso Klisto, ao ebatiza boko na bakle. ¹³ Na Simoni ye sisake ao belekea, kisa apata'ake ubatizo ao ika na Filipi. Saa ne aya oni alama na mokambo akpe n'ne aya nyeni, ao yayama. ¹⁴ Saa ne bogoigi koni ka Yelusalema baya oki gea Samalia ayapati yonga a Mokonga, baon'teka Petele na Yoani. ¹⁵ Saa ne baya kidiani, bao mema guabo, kagea bapate Loo Motakatifo. ¹⁶ Kanyongoo kpanga saa no, Loo Motakatifo kaya biki'ake gua n'kpa moochi, baya ebatizi tondo ki'na a Bosomwa Yeso. ¹⁷ Petele na Yoani bao ebisia njaga, baopata Loo Motakatifo. ¹⁸ Saa ne Simoni ayaoni gea Loo Motakatifo angi subia bakpa ka bisa njaga a bagoigi, ao ebofha bangoa. ¹⁹ Aogea, " Mofhani na eme bokota ne, kagea n'mbe nen'bisiaae njaga apate Loo Motakatifo." ²⁰ Alakini Petele aon'ngodea, "Ujukana obe na bangoa nako, kanyongoo oo ubate gea egabo a mokonga ao patekana ka bangoa. ²¹ Koake na oma ao gbutuka ka mokambo ne, kanyongoo meema nako n'naake anja mutaa Mokonga. ²² Bene tubua ka bojede nako, na mema mutaa Bosomwa, saa angboo aenei ako ulumie ka mosenda a meema nako. ²³ Kanyongo neoni ona bojede ajia na mofungua a kema ajede." ²⁴ Simoni ao jibua na gea, " Memani Bosomwa ka nyongoa'ni, kagea kema ne boyongi kamo kidiane mbe mono." ²⁵ Saa ne baya onisi na laba yonga a Bosomwa, Petele na Yoani baoja na Yelusalema, bao ubilia enjili ka nji asii a Samalia. ²⁶ Malaika a Bosomwa aon'ngodea Filipi ao gea, " Mama ogee n'chi a kusi ka'afhe ne atoki na Yelusalema agee na Gaza." (Afhe ne a subia ndula.) ²⁷ Aomama aoga. Lenga bene, mogaa mochi aotaka na Etiopia, toasi a bokota angbo kusia Kandake, mwame n'ke a Baetiopia. Ye ambe ayatuo chunga imona buli. Ayabiki na Yelusalema ka aabudua. ²⁸ Ayatuo ja na aiki ka gbokogboko nake, sa soma bhuku a n'nabi Isaya. ²⁹ Loo aon'ngodea Filipi, " Gaa bibia gbokogboko ne." ³⁰ Filipi aoga mbango mutake, ao mooka aon'soma n'nabi Isaya, aogea, " Oo uba n'ne oosoma? ³¹ Aogea, " Neubaae namuna sina, na n'ka ka moongozi?" Ao moofhana Filipi angie subia gbokogboko aike naye. ³² Gbutuka a maandeko no Muetiopia ayatuo soma aange, " Bayen'gee nee ubate mogogo ban'tene kingo, ubate muna mogogo mosa a mbako na'dakani, kaya uku'ake ebombo nake. ³³ Ka soni nake kanga pata selia. Ani aenei ayonge kanyogo a ebokoti nake? Kanyongoo baya tokisi maisa nake ka od'o." ³⁴ Toasi ao muisia Filipi ao gea, " kadenga denga, mongodea fho, n'nabi aoyonga kanyongo nake sisake, ao kayongo a n'kpa ongboo?" ³⁵ Filipi aokpanga ngodea, aokpanga na maandeko na a ubilia enjili a Yeso mutake. ³⁶ Bene bayatuo ga ka afhe, baokidia kiib'o toasi aoge," Lenga, ibo aange. Kema sina aomofele nepate ubatizo?" ³⁷ Filipi aon'ngodea, " Kabe obeleki subia meema'ako aonei opate ubatizo." Mogaa no aon'ngodea, " Nebelekei gea Yeso Klisto ane Muna Mokonga." ³⁸ Muetiopia aomamisa gbokogboko nake. Bao dida kibo, bobu Filipi na toasi, Filipi aon'batiza. ³⁹ Saa ne baya toki kibo, Loo a Bosomwa aon'sakwa Filipi danga, toasi kaya mooni'ake goto, alakini aoga nake na fulaa. ⁴⁰ Alakini Filipi ao seneka ka Azoti aoga ka mosomba no na ubilia enjili ka nji buli mopaka bene aya biki na Kaisala.