¹ Saa beye gii beopasa dida na Italia, baon'bisa Paulo na bafungua angboo mutaa n'chungi mochi ina'ake Julio, n'mbe ayatu n'kindi a ba soda a Augusto. ² Beokpata ka ketange toka na Adramitamu n'mbe ayatu bibi'a dida ka isege a Asia. Bene beoga ka ob'a. Aristaka n'mbe aya toki na Tesalonika ka Makedonia ayagee na besu. Mama nosi beokidia ka mosomba a Sidoni, fua Julio aya gii bonjanja mutaa Paulo na engodea ba malikwa'ake apate bonja muta'abo. ⁴ Beotoka fua beoga ka oba na dida ka kiba a Kipro, bibia kesanga, kanyongo kuka ayaso beti. ⁵ Saa ne beye didi ka oba nyena Kilikia na Pamfilia,m beokidia na Lukia. ⁶ Fua, n'chungi aodonda ketange atoki na Alekisandria n'ne ayatuoga na Italia. Aoso bisa subi. ⁷ Saa ne beye didi boke boke esa asii na mbasa'ke beo kidia akpe bibi'a Kenidisi na kanyongo a maifio bekeye pati'ake afhe, beodida kubia Krete, n'chi angboo a Salomono. ⁸ Baodida bibi'a kubi akpe, mopaka bene beyekidi oma imochi n'ne baofani Havenese, n'ne apatekani bibi'a mosomba a Lasea. ⁹ Beobed'a saa asii, saa a deketa ele a Bayaudi aya nyeni, aobika atali ka dida. Paulo aoe engefhisa, ¹⁰ na gea, "Boko, neoni gea tamba ne baokonda be bede, abae ajede ne bungisa asii, n'na tondo n'kumba na ketange, alakini goto na maisa nasu." ¹¹ Alakini n'chungi aya ubi ka uba na bokoli a ketange konyena kema nee n'ne Paulo aya gii. ¹² Kanyongo kubi n'na tuake adekee kanyenisa mbondi, baobi asii katoka fua, kabe ka namuna buli beyepasi bekidie ka mosomba a Foeniki. Kanyenisa mbondi fua. Foniki ane kubi ibo subia Krete kubia kusi na egoo. ¹³ Saa ne maifio a kusi aya kpangi nyena boke boke, baobi baowaza gea bayatu na kema ne baya kondi. Bao pima ankai na dida mopaka Krete, bibi'a kubi. ¹⁴ Alakini kisa saa aboa maifhia a kuka aoba akpe, ao toka kegoo, aokpanga beta kaod'o katoka ka kesanga. ¹⁵ Saa ne kuka aya beti ketange kanga nyena maifhio, beo nyena danga na kuka maifhi aoga na besu. ¹⁶ Beodida ka kiba a kesanga aboa n'ne baofhani Kauda, ka bokpekpe baolamisa maisa a bakpe ne bayatu subia ketange. ¹⁷ Saa ne baya ejabisi bakpa buli ka ketange, beo bisa ngoli mbusa a mokobo a ketange. Bayayuo sokanaga gea baya pasi bakidie ka isege a Surtise, baodidisa ete ka oba na koboka. ¹⁸ Maifhio ao so suga akpe ka bene mama nosi baokpanga maka n'kumba ka oba. ¹⁹ Esa a isalo baobi bao maka n'kumba a mokambo a ketange na njaga'abo. ²⁰ Saa ne mani na balelengowa bakaya loli'ake guasu esa asii, na kuka angbo aoso beta, kanga mosenda mochi n'ne beyepasi lama. ²¹ Saa ne baya gee danga kanga elea, Paulo ao mama subia baobi aogea, "Booko, boopasa bomo'oke, boko dide mbe na Krete, kagea bebungu na un. ²² Bene nenongodei boko tee mbe kanyongo ataa n'kpa mochi kabungise ku maisa nake subianu, alakini ketange tondo. ²³ Kanyongo kiifha a naama malaika a Mokonga n'mbe nene n'kpa nake, na n'mbe neo abudua, malaika nake ato mami bibi'ani ²⁴ aogea, ' Kobange mbe, Paulo. Oopasa omame mosa a Kaisala, lenga, Mokonga ka bonjanja nake okofhi bune bobu aodida naabo.' ²⁵ Ka bene, bokakamana, booko! Kanyongo neon'tumainia Mokonga gea n'ne atomongodei akidianaae. ²⁶ Alakini beopasa beemake gua kesanga." ²⁷ Kisa nyena esa komi na gena, bene betuoga namuna ne ka oba a Adriatike, bibia saa sita a kiifha, baobi baowaza gea be bibi'a kubi. ²⁸ Baoboa n'tongo baomaka kibo baotonda njaga makomi ibee a ndia; kisa saa aboa, bagotoo maka n'tongo kibo na pima u baodonda njaga komi na itano. ²⁹ Bao banga gea baopasa gbondokana ka goa, bao beda musio gena baotumia betoke oma no kabondee kan'bimba. ³⁰ Baobi baokaba namuna a deketa ketange na didisa koko a lamisa ka oba baogea bapate namuna a lingia n'tongo mosa a ketange. ³¹ Alakini Paulo aon'ngodean'chungi na ba soda, " Kabe bakpa ne bakajigi subia ketange, boko toke ku lama." ³² Ba soda baotena n'tongo a ketange baodeketa u adide. ³³ Saa ne esa aya se, Paulo ao ekakamisa bobu balee elea. Aogea, " Kesane bogii esa komi na gena boolenga na gaa kanga lelea kanga lea kema. ³⁴ Bene nenongodei bogabe elea aboa, kanyongo n'ne ane kema mochi a maana mutanu bolame. Kanyongoo tafho n'kpa mochi ne abungisaae seka moo nake." ³⁵ Saa ne aya yongi bene, aoboa n'bako aon'sukulua Mokonga mosa a n'kpa buli. Ao bune n'bako baokpanga lea. ³⁶ Bobu bao kakamana na leaga. ³⁷ Beyetu bakpa 276 subia ketange. ³⁸ Saa ne baya lei asii bao maka ngano ka oba kangonyo ketange abike kanga bodoko. ³⁹ Saa ne esa aya se, bakaya ubi'ake od'o alakini baya oni isege mochi na oma a ikisa ketange, baolaba gea kabe baenei ba bise na ketange kao. ⁴⁰ Baokoda n'tongo na deketa u ka oba. Ka saa no baokoda ngoli a n'kai n'ne ayatuo manisa maifhio, baokidia kubi. ⁴¹ Alakini ketange ao kpatekane subi isege na od'o. Moo a ketange aongia subia n'sea aojiga kanga tamba, gbutuka a mbusa ao bunuka na alinga. ⁴² Mopango a ba soda ayatu ola bafungua bobu kanyongo baenei baoge na tea. ⁴³ Alakini n'chungi aya kondi an'lamise Paulo, kabene ao mamisa mopango nabo; aogea buno bao uba oga na koboka bagee kubi mosa. ⁴⁴ bakpa ne bajigi bagaae mbusa, bakpa mochi ka mokobo, bunangboo baotoka ka ketanga. Ka namuna ne aange buno bobu bayatu na besu baya kidi kubi anja.