¹ Mogaa mochi ayatu ka mosoba a Kaisala, ina'ake Kornelio, mokota a ba soda a Baitalia. ² Ayatu n'kpa ne aefhole ka mokambo na n'mbe aon'tea Mokonga na enju nake buli, ayatuo fholea egabo asii mutaa bakpa, na mema Mokonga saa buli. ³ Ka saa a isalo a sua mani ao moona malaika a mokonga ka njiki abiki mutake. Malaika an'ngodea, "Kornelio!" ⁴ Kornelio ao moenjea malaika ao sokanaga na gea, " Kema sina ne, Moko?" Malaika aon'ngodea, "Memi nako na egabo agee ubate egabo a ukumbuso mutaa Mokonga. ⁵ Ka bene eteka bakpa ka mosomba a Yopa ban'bike na mogaa mochi ina'ake Simoni n'mbo baomofhana Petele. ⁶ Aiki na n'bongisi a n'keke ina'ake simoni, n'mbe enju nake aiki bibi a ob'a." ⁷ Saa ne malaiko no ayatuo laba naye aya toki, Kornelio ao eteka bakpa a mokambo nake babee, ba soda akpe ka bakpa a mokambo nake. ⁸ Kornelio ao engodea buli n'ne aya nyeni ao eteka na Yopa. ⁹ Mama nosi bibi'a saa sita bene, bene bayatu ka tamba nabo bibi a mosomba, Petele ao dafha kenju a kegoo ka mema. ¹⁰ Nja aon'beda aoba na siki a elea, alakini saa ne bakpa botuo omba elea aongia ka loo, ¹¹ ao ona egoo aukukani ketange ao dida, kema mochi ubate n'tua angbo ao kidia ka od'o, ka n'chi buli gena. ¹² Ba nyama buli a echionji gena na kema ne aoguma ka od'o na bambuu a kegoo baiki subi. ¹³ Eso mochi aon'ngodea: " Mama, Petele, tena olea." ¹⁴ Alakini petele aogea,"N'naake, Bosomwa; kanyongo kelee mbe kema ne ana n'kiki ao aujukani." ¹⁵ Alakini eso ao bika mutaake goto mala a ibee: " N'ne Mokongo a sokosi, kotoke ku oofhane aajede." ¹⁶ N'ne aya nyeni mala isalo; mala imochi ketange no aoja aotalea kegoo. ¹⁷ Saa ne Petele ayatuo vulungana kanyongo a njiki ne ayaoni ka uba maana li, ao ona bakpa ne Kornelio aya eteki bamami mosa a iso a n'pome, kisa bao uisia afhe a gaa kenju. ¹⁸ Bao ofhana na uisia ambe Simoni n'mbe bamoofhani Petele ao ikika fua. ¹⁹ Saa ne Petele ayatuo waza kanyongo a njiki, Loo aon'ngodea, "Lenga, bakpa isalo baoko kaba. ²⁰ Mama dida na gaa naab'o. Ko kpeme mbe mono ka gaa naab'o, kanyongo eme ambe neeteki." ²¹ Petele ao dida mutaa bagaano aogea, "Eme'ambe boon'kaba. Bobiki kanyongo sina? ²² Baogea, "Mokota a ba soda ina'ake Kornelio, n'kpa a dhoni n'mbe aon'tea Mokonga, baon'yonga anja kanji bubuli a Bayaudi, malaiki motakatifo aton'ngodei bebike kenju nako, aoke mbino ne atoki mutako." ²³ Petele ao ebofhana bangie subi na jiga naye. Kan'bimba'ake ao mama na gaa na'abo, bana'amake a Yopa baoga naye. ²⁴ Mama nosi baobika na Kaisala. Kornelio ayatuo ebondea, aya ebofhani ba muna'amake buli na badake a bibi. ²⁵ Saa ne Petele aya ngi Kornelio aodondana naye na gua ka od'o ka echinji'ake ao abudua. ²⁶ Alakini Petele aon'mamisa, aogea, "Mama! Na eme nene n'kpa ubate ob'e." ²⁷ Saa ne petelo atuoleba na yje,aonjia subhi aododa bhakpa asii bhaiki oma imochi ²⁸ Aoongodhea,bhenu sisanu gaea ka selia a bhayaudi n'naoke anja ika oma imochi ao tamba oma imochi na n'kpa n'ne kaiki kanji nesu.Ila mokonga amongodhi ketoke ku ofhana n'kpa bhui ana n'kiki ao ojedhe. ²⁹ Aaonge nebiki kanga ubisi, saa ne baya moteki mutanu. Neno uisii namuna sina bomo teki." ³⁰ Kornelio aogea, " Anyeni esa gena mopaka saa ne netuo mema kenju namo; neo moona mogaa mochi ao mama mosa'amo na ngombe anjee. ³¹ Aogea, ' Kornelio, Mokonga aoki memi nako, na egabo nako Mokonga ao kumbuka u. ³² Bene n'teka n'kpa mochi na Yopa, amoofhane n'kpa mochi ina'ake Simoni n'mbe bao moofhana Petele. Ao ika mutaa n'bongisi n'keke ina'ake Simoni bibi'a oba.' ³³ mala imochi neto eteki mutako. Ogii anja bene obiki. Beiki besu bobu mosa a Mokonga beoke kema ne baya koongodei toka mutaa Bosomwa." ³⁴ Petele aoyonga aogea, " Dhoni neubi gea Mokonga n'nao n'konda tondo n'kpa mochi. ³⁵ Alakini, muta kila n'nji ne baon'tea na gea n'ne aanja n'ne akondi. ³⁶ Oubi mbino ne aya teki mutaa bakpa a Isilaeli, saa ne aya labi mbino anja a kalamo kanyenea Yeso Klisto, n'mbe ane Bosomwa a bobu ³⁷ Benu sisanu boubi kema ne aya nyeni, n'ne aya kidiani na Yudea buli, toka na Galilaya, kisa ubatizo ne Yoani aya fundisi; ³⁸ nyongo a Yeso a Nazaleti, beno Mokonga aya n'bisi ngamba na Loo Motakatifo na bokpekpe. Ao sangekana ka gea kema anja na efhondisa bune bobu baya teseki na bayoya, kanyongo Mokonga ayatu naye. ³⁹ Bene basuud'a a kema buli n'ne Yeso aya gii, nanji a Yudea na Yelusalema. Baya mwe ka n'kpata ka mee, ⁴⁰ Alakini Mokonga ayan'fufui ka esa isalo ayamofhi aonekane, ⁴¹ n'naake mutaa bakpa bobu, alakini mutaa basuud'a bune baya esombu mosa na Mokonga, na besu bune beye lei na noa naye kisa fufuka'ake mutaa baku. ⁴² Aya songodei be labe mutaa bakpa na onisa gea n'mbe ane n'mbo Mokonga aya n'sombu abe moamuzi a bakpa na baku. ⁴³ Kanyongo'ake ban'nabi bobu baya onisi geae n'mbo an'belekei apatae osamee a jambi kanyenea ina'ake." ⁴⁴ Saa ne Petele ayatuo yonga kema ne, Loo Motakatifo ao bika guab'o bobu bune batuo oka mbino nake. ⁴⁵ Bakpa bune bayatu ka n'kindi a babelekei bagu ganja bune baya biki na Petele bao yayama, kanyongoo a egabo a Loo Motakatifo aya dukukani goto mutaa bakpa a mokonga. ⁴⁶ Bene, bayaoki bakpa a mokonda baolaba ka kesambae na n'beba Mokonga. Petele ao jibua, ⁴⁷ "N'kpa aenei a kpeme na ibo mutaa bakpa ne baka pate ubatizo, bune baya pati Loo Motakatifo ubate besu? ⁴⁸ Ao engodea ba ebatize kina a Yeso Klisto. Kisa baon'ngodea ajige naabo esa asii.