¹ Ei dja baito, Bongala ndi, Age aga sambisa lo, Bofa limbisame; Podje mbo, Go sambisae a bai, Boe mo kbesa bindo biago, La bwina mbo age aga sambisa lo, bo ende ela ambale mo. ² Tolube, la galo mbo, Osambisa bo Iongia-Ongia gotie abatonga djo mbeo bongale la loongene. ³ La boendena mbo, Ei dja baito, A basambesa aba tonga djo mbeo djo, Indi boende tonga djo, Mbo bofutsha nde go lisambi li Iongia-Ongia? ⁴ To mbo bwe nde lefola geage botema bolo bwande, La botema bosa bwande, Motshae mo ndima mbo botema bolo bo Iongia-Ongia boende tomae mbo bo kokoge? ⁵ Kasi, La lotoe loago la botema ofia, Bwend udja likabo li ligege po dje bokolo bo ligege la ogelana bo lisambi li loongene li Iongia-Ongia, ⁶ Agaa ngo kata ogelana la besala be boto la boto; ⁷ La oseela uha ba loongo la aba, O bito goeta dje otonga olo, Aba sila luuma, La bonanga la ofea o singa; ⁸ Indi mbo ligege la osudja go ngae aba, Go ete boenda bo ongbana, Bati molemba loongene laa olemba abe. ⁹ Looso la gotie boto botubu aga tonga obe, Obanda la la moyuda, Osuka la moele! ¹⁰ Genanga, Luuma la gehoi gongae aga tonga olo, Obanda la Moyoda osuka la Moela. ¹¹ La bwina mbo gofelo dj Iongia-Ongia gotie la bondaa. ¹² Baito batubu aba tonge lisumu ngomba la bobeko besinga nde ambale ngomba la bobeko, Laa baito batubu aba tongee lisumu la bobeko besambesama nde la bobeko. ¹³ Motimbo, La galo, Aba ooa bobeko bo bangae sembo go felo dj Iongia-Ongia, Kasi mongae aba tonga lo bo bango ngaa baito sembo. ¹⁴ Gee gengae mbo ba pakano, Abati la bebeko, Bende tonga moabeya bebeko, Bengae bo abati la bebeko, Bobeko mpo djaabo la ene. ¹⁵ Beende enesa mbo besala be bebeko be siname goete e betema biabo, Bende luba mo mobagelegia babo, Laa magelegia mabo mende kbisha bo to mende longisha bo mbala la mbala. ¹⁶ Mo nda ngoenegela bokolo bo, O gelana la liogi liai, Iongia-Ongia esambesa nde mondole ye Yesu kilisito besala be liima la baito. ¹⁷ Age aga osa lina li Moyuda, Aga ngaa gotie bebeko, Aga fefia bindo po dje Iongia-Ongia, ¹⁸ Aga luba mwalemba ge, Aga luba o kesanesa bia, moluba age bebeko; ¹⁹ Age aga ena mbo boende endesa abati moenase, Liangangi li aba ngae moliima, ²⁰ Bofalesi botofefe, La banee, mwa luba mbeo la loongene goete mebeko; ²¹ Age, Aga laisa obai, Boti mo laisa bindo biago! Age oga sakola mbo ngoiba, Boende iba! ²² Age aga sakola mbo sidjei bikobo, Boende tonga bikobo! Age aga lefola bikeko, Boende osa bia bi tempelo djabo! ²³ Age aga tshwa bonanga po dje bebeko, Boende segesa luuma lo Iongia-Ongia mokgesa bebeko! ²⁴ Po dje mbo lina li Iongia-Ongia lia enega pamba gongae ba pagano po djaino, Galo a sinyame mo. ²⁵ Otinya limbute engae la litomba, Bo salela bebeko; Boo kbesa bobeko, Limbute liago liangaa ambo bati tinye lio. ²⁶ Agaa ati tinye limbute ende batela bebeko, Afa ngale ambo aga so tinya limbute? ²⁷ Agaa ati tinye limbute, Ende kokesa bebeko, Indi bongae la bokanda bo bebeko laa be limbute? ²⁸ Moyuda, Moti aga enegela gose; Laa otinya limbute, Moti moene esu mo bindo. ²⁹ Kasi Moyuda, Engae aga ngae mo moete yande; Laa otinyama limbute, Moende adje botema, Ogelana la boenda ati la bebeko. Limengi li Moyuda mo liti modja gongae baito, Kasi gongae Iongia-Ongia.