¹ mungu ebegise nde mose gombo: ² osaa alona la bana bande ba bolome mo bolongo la tulu la baina boetsha la ngombe dje bolome po dje boeba bo lisumo la ba pate dji bolome la gekolo ge tokuma otodjange djiimbe. ³ songanesaa linginda litubu gongale gegwe ge mbele dje koyangana. ⁴ mose etonge nde ogalo alake mungu elaka ge, la linginda beyangane nde gombale dje gegwe ge mbele dje koyangana. ⁵ mose ebegise nde linginda gombo: mongale loo olope mungu gesemba gombo motongame. ⁶ mose edjee nde la alona la bana bande ba bolome la geoho aapula bo mo badje. ⁷ ge ebatise nde ge kasaka la geoho aanda ge bolii bwande la geoho aabatisa ge tulu dje sa la etende efode mo bindo byande, la eande nde ge bolii bo efode obotongame la bweli la eande nde mo golo. ⁸ ge ebatise nde ge tulu mo gegwa la goete tulu dje gegwa ge etende ulimu laa tumimu. ⁹ ge etende tulu go botshwe bo go botshwe bwande la ge etende itando dji wolo, la ikoti odjeelu, la tulu go botshwe gombale dje osio ogalo alake mungu mose. ¹⁰ la gombisa mose eose nde baina boetsha geoho aetsha mo gekeko la biya bitubu goete dje mo geoho aabulisa mo. ¹¹ ge etende ndambo dje mo go gehumbelo mbala bosambale la ge egilitshe nde gehumbelo la bitongelo bi mo gotubu la gepuelo la geemaelo ge mo po dje obulisa mo. ¹² ge ebele nde ambwale ndambo dje baina boetsha go botshwe bo alona, la egilitshe nde ge po djobulisa ge. ¹³ mose edjende la bana ba bolome ba alona la ebatise nde bo kasaka la eande nde bolii bwabo eande nde tokoti twabo ambo ogalo alake mungu ge. ¹⁴ gombisa ge edjende la ngombe dje bolome dje boeba bo lisumo, la galo alona la bana bande ba bolome belalise nde baago babo go botshwe bo ngombe dje golome dje boeba bo lisumo. ¹⁵ mose eloe nde ge la geoho aosa baila geogo aata mo goete seba dji gehumbelo mo bisee bitubu moete isangaana djande la geoho aapetola gehumbelo la ge ebelende baila se gombale geemaelo la ebulise nde mo po djofuta mbondi dje mo. ¹⁶ ge eose nde baina batubu ba goliolo li biyoo la gesege geke ge ligolome la betua bele ba baina ba mo gesee gemoa, la mose ehumbe nde mo goliolo li gehumbelo. ¹⁷ lambo mo bolome bo ngombe djaho, logogo lo mo la bonugu bo mo la tobi to mo ge epetshe nde mo mo djiimbe golusa bo geamba ogalo alake mungu ge. ¹⁸ la gombisa ge edjee nde la pate dje golome po dje boeba boohumba. alona la bana bande ba bolome belalise nde baago babo go botshwe bo bolome bo pate. ¹⁹ mose eloe nde mo la ogalo abelege baila goliolo li gehumbelo la gongonga dje dje mo. ²⁰ gwasile bolome bo pate gokokama mo bisege, mose epetshe nde botshwe la bisege la baina. ²¹ gwasile biyoo laa baolo gosogolama la badje, mose epetshe nde pate dje bolome djitubu go gehumbelo ambo boeba boohumba, liipu li lo, boeba botongame la djiimbe gongale mungu, ogalo alake mungu mose. ²² gombisa ge edjende la pate dje bolome djasina, pate dje bolome djogotsha ge goete ligwa, la alona la bana bande ba bolome belalise nde baago babo go botshwe bo pate dje bolome. ²³ mose eloe nde mo, la eose nde ndambo dje baila ba mo la etee nde mo moete songe dje litwi li bolome bo alona la isangana djilene dji djoogo djande dji bolome la isangana djilene dji iyolo djande dji bolome. ²⁴ mose eendise nde bana ba bolome ba alona la etende ndambo dje baila mo songe dje batwi ba bolome babo la basangana balene ba baolo babo ba bolome. lagalo mose etende baila goliolo li gehumbelo la go ngonga. ²⁵ la gombisa ge eose nde baina la boali bo baina la baina batubu goliolo li biyoo la gesege geke ge ligolome la betua bele be baina ba mo gesee gemoa la bilio bi golome. ²⁶ la bolumba bo tokuma otodjange djiimbe, moambe gopelo dje mungu, eose nde bokate bomoa obodjange djiimbe, la bokate bomoa oboetshame la baina, la bokate boke bomoa, la etende mo goliolo li baina la goliolo li gebelo ge golome. ²⁷ lagalo ge etende mo gotubu moete baago ba alona la mo baago ba bana bande ba bolome, la eougunye nde mo ambo boeba bopugunya gopelo mungu. ²⁸ la gombisa mose eose nde mo moete baago babo la ehumbe nde mo gehumbelo ge boeba boohumba gesee gemoa ambo boeba boogotsha mo ligwa, liipu lilo, boeba botongame la djiimbe gongale mungu. ²⁹ mose eose nde gegwa geoho aagulumisa mo po dje boeba boogulumisa gopelo mungu; mombe nde gesege ge mose ge pate dje bolome djogotsha mo ligwa, ogalo alake mungu mose. ³⁰ gombisa mose eose nde ligilima li baina boetsha la ndambo dje baila obambe mo gehumbelo la etee nde mo liolo li alona la mo tulu djaande la bana bande ba bolome laa tulu djabo. lagalo ebulise nde alona la tulu djande la bana bande ba bolome la tulu djabo laa ge molilongo. ³¹ mose ebegise nde alona la bana bande ba bolome gombo: lambaa bonugu go mbale gegwe ge mbele dje koyangana, la lelaa mo go la tokuma goete bolumba bo boeba ogotsha goete ligwa, ogalo alakei gombo, alona la bana bande ba bolome belaa nde mo. ³² bonugu obotiale lo la tokuma bopetsha nde mo moete djiimbe. ³³ bopaneni mo gegwe ge mbele dje koyangana moete bekolo bosambale, ogalo adjosila bekolo obeadjogote enu mo ligwa, po dje mbo gwadjogelana mo bekolo bosambale djeegotshende enu mo ligwa. ³⁴ gelenge gemoa ogalo atongame mo laa bwina. iongiaongia elake nde gombo motongame galo po djoesenu mbisa moete oboto. ³⁵ botialindi gombale dje gegwe ge mbele dje koyangana loha la lotigo po dje bekolo bosambale la botongindi mo moalake mungu gombo botongbi, po dje mbo emi djelakame galo. ³⁶ alona la bana bande ba bolome betonge nde mbeo djitubu odjilake mungu mo bonywa bo mose.