¹ mwe mongale bobeko bo boeba bo gekweli. moete la bwelu. ² beloa nde boeba bo gekweli mo gesee ogeadjoloa bo boeba boohumba, la baila ba mo betama nde gato go ngonga la goliolo li gehumbelo. ³ baina ba mo batubu bekabama nde , boali bo baina la baina balupa biyoo. ⁴ la betua bele be baina ba goliolo li mo gesee gemoa la bonugu bo boongo, la gesege geke ge ligolome ogeadjototola ge mo betua gesee gemoa. ⁵ kanga ehumba nde mo goliolo li gehumbelo ambo boeba bo djimbe po dje mungu. mongale boeba bo gekweli. ⁶ golome la golome goete Djakanga ekoke gola mo. mo molama nde goete gesee geelu. moete la bwelu. ⁷ boeba bo gekweli bokokane la boeba bo lisumo. bobeko bongale bomoa po dje mo. kanga ono audja goesanela oboto mbisa engala nde la lo. ⁸ kanga ono aaganya boeba boohumba la boto ogaudja po djaande pendja logogo lo boeba boohumba obokabe ge. ⁹ boeba bo biya biola bitubu mo mohumbame goete libeba li djimbe la moalonganyame lo moete peli imbai moete lisaso mongala nde mo kanga ono aakaba mo. ¹⁰ beeba be biya biola bitubu, engala mbo mosangana la baina too gombo motisangane la baina, mongala nde po dje bana ba bolome ba alona batubu beosa nde momoa la mwasina ambwale. ¹¹ mwe mongale bobeko bo boeba bo gehoi obokoke boto gokaba gongale mungu. ¹² engala mbo ge ekaba mo po dje osembogela andi ekaba nde gesee gemoa la boeba lotshosembogela bekate mo djiimbe obesangane la baina, la bekate beke obetia bengale la fulo obeetshame la baina, la bekate be baina obetshangame djeikeike obesangane lolo la baina. ¹³ edja nde la boeba bwande la tokuma otodjange fulo gesee gemoa la boeba bo gehoi po dje osembogela. ¹⁴ ge ekaba nde bokate bomoa mo boeba bo galo po dje boeba bo mungu. mongala nde la kanga ogaapandola baila mo boeba bo gehoi. ¹⁵ bonugu bo boeba bo gehoi boakabama po dje boeba bo osembogela molama nde mo bokolo bookaba mo; eti nde ndambo dje mo lotshoigisa la nongo. ¹⁶ engala mbo boeba bwande bongale boeba boolapa too boeba bo kamo dje ndo, andi molama nde mo bokolo obwadjokaba ge boeba la bokolo bo mbisa ndambo odjadjotiala molama nde. ¹⁷ lagalo bonugu bo boeba obotiale lo kino mo bokolo bo besaso mohumbama nde moete djiimbe. ¹⁸ engala mbo bonugu bo boeba bo gehoi geande bokolo bo besaso andi geono ogaakaba mo apayambame la mopatangame. mongala nde gea ge lilo la ge ono aadjola mo etola nde lisumo liyande. ¹⁹ bonugu obotole gea ge lilo mopalame, mohumbama nde mo djiimbe. baito batubu obaelu bekoke gola bonugu. ²⁰ lambo boto ono adjola bonugu bo boeba moete gehoi ge mungu aho angale ge la loo lo lilo, boto gaho etotolama nde moete baito bande. ²¹ engala mbo boto ebunda gea ge lilo, engala mbo mongale lilo li boto too lilo li nama too gea inandi ge lilo, la gombisa ogwala ge bonugu bo boeba moete gehoi ge mungu, andi boto gaho etotolama nde moete baito bande. ²² mungu ebegise nde mose gombo, ²³ begisaa baito ba yisalaele gombo: bingoli baina ba ngombe too ba pate too ba taba. ²⁴ baina ba gebwele ogeangba bwasi, la baina obaandega moete nama mokoka nde gotongama la ligwa inandi liasina, lambo bopali mo laa djea te. ²⁵ boto la boto ogaala baina ba gebwele mo gelenge ge boeba bo djiimbe gongale iongiaongia etotolama nde goete baito bande. ²⁶ lambo bingoli baila laa djea, too baila ba noli too baila ba gebwele goete mbele djino bangene. ²⁷ engala mbo indi ogaadjola baila boto gaho etotolama nde goete baito bande ²⁸ mungu ebegise nde mose gombo: ²⁹ begisaa baito ba yisalaele gombo; ge ono ogaadjokaba boeba moete gehoi geande gongale mungu edja nde la boeba bwande gongale mungu; ototoga goete boeba bo gehoi geande. ³⁰ edja nde la boeba bo djiimbe po dje mungu mo baago bande pendja. edja nde la baina gesee gemoa la gegwa gombo gegwa getitolame ambo boeba bootitolama gopelo mungu. ³¹ kanga ehumba nde baina goliolo li gehumbelo, la gegwa gengala nde po dje alona la bana bande ba bolome. ³² boopaa nde bilio bi golome gongale kanga ambo boeba ototoga mo boeba bo gehoi. ³³ ge ono, goete bana ba alona ba bolome, ogaadjokaba boeba bo baila moete gehoi la baina, eudja nde bilio bi bolome mo gesege geande. ³⁴ po djembo emi djaasilidja gototola gegwa ge otitolama la bilio biokabama la baito ba yisalaele, ototoga go boeba bwabo bo gehoi, la djaasila gopaa mo la alona kanga la bana bande ba bolome, ambo boeba bo loongo bo baito ba yisalaele. ³⁵ mwe mongale boeba bo alona la bana bande ba bolome ototoga go boeba obotongame la djiimbe gongale mungu, oboakabama la bo mo bokolo obopame bo la ligwa li bokanga bo mungu. ³⁶ iongiaongia epee nde gesemba gombo baito ba yisalaele bapee bo mo bokolo obobulisame bo. mo mongale boeba bo loongo goete basego babo batubu. ³⁷ mwe mongale bobeko bo boeba boohumba la boeba bo biya biola la boeba bo lisumo la boeba bo gekweli la obulisa la boeba bo gehoi, ³⁸ mwe nde gesemba ogepee mungu mose goliolo li ngolo dje sinai, mo bokolo obolake ge baito ba yisalaele gombo badjee la boeba bwabo gongale iongiaongia gote go gesobe ge sinai.