¹ enu bofatulameli bikeko se, enu bofaeli gea gemoa ge olonganya too gekeko olesa gio liolo, la enu bofaseli mo boi boaino itala ata djimoa dji olonganya la osio boboto, po djaino otulama se gofelo djaande; po dje mbo emi djengale ngene iongiaongia djaino. ² boleti ndi toenga toami, la enu boleti ndi besala beami. emi djengale ngene. ³ engala mbo enu bolingoli bebeko beami, la engala mbo enu bobaleli balao bami la ata beo mo bosala, ⁴ djetomele nde enu mbula mo gee geaho, nele djifaande biima la biya, la tosandu to gelanga tofande tuma toande. ⁵ la ogiogi enu buudji ndi tuma to basangu atonguudje enu mo bosala bwaino, la bio bimala biya biiga nde biidje; enu boli ndi isongu djaino la ouguto, la bongali ndi la okengelama moete boi bwaino. ⁶ djeta nde gehoi moete boi, la bota ata omoa afate lomoto mo ilo djaino; djetotola nde mo boi nama dji oili, la ilonde ifaete ale mo boi bwaino. ⁷ enu bobitshami ndi la banguna baino, la bengba nde gofelo djaino la ilonde. ⁸ tano moete djaino bebitsha nde la bokama la bokama moete djaino bebitshana nde la koto liu, la banguna baino bengba nde go felo djaino la ilonde. ⁹ emi djeletela nde enu mbisa, djefe nde enu obota la djesele nde enu la buidje, la djeesela nde boowani bwami laino. ¹⁰ boli ndi biya biaino abiloge enu la gologolo, la enu bonenisi ndi tonino po dje ofaa gesee ge ongale baito ba sika. ¹¹ djesela nde gesee geami ge ongala moete djaino, la bolimo bwami bofangbe. ¹² djeenda nde moete djaino, djengala nde mungu djaino, la enu bongali ndi liemba liami. ¹³ djengale ngene, iongiaongia djaino, aganenese enu go boi bo ejipito, agatotole enu moete onyokwama; dje bune nde biuganelo bi baeya baino, la emi dje endese nde enu botshwe liolo. ¹⁴ kasi mongala mbo enu boti moele emi, la boti motongeli bebeko beami betubu, ¹⁵ engala mbo enu boeni bebeko beami pamba, la engala mbo liofi liago lingala moena bwasi balao baami, mo gelenge ge mombo bofatongeli ale bebeko beami la mombo bofatongeli ale bebeko beami, ¹⁶ lagalo leti agangotonga djetonge enu. djetoma nde gongale enu looso, la otatabana la fefele, abongosela baiso baino bofonya la baofi baino moete looso; la bofaudji gea mo bilogo biaino: banguna baino behale nde enu. ¹⁷ djeletsha nde osio boami mbale djasina, la betobe nde enu la banguna baino; abati molambe enu bengala nde gotie djaino, la enu bokimi ndi loti ambo bebitshame laino. ¹⁸ engala mombo ata galo, enu boti moele emi, djebitsha nde enu mbala bosambale po dje basumu baino. ¹⁹ djebenda nde igeta dji ofia boago, djesela nde liolo liago ogi angala gebende, la nele djago ogi angala mbiti ifia. ²⁰ ofia bwago bosila nde famba ogalo, nele djago ifafee biima la biya, la tosandu to nele tofafee tuma twabo. ²¹ engala mbo enu boemaeli djemi la enu boti molembi oele emi, djetobe nde enu mbala bosambale oeta gelenge ge basumu baino. ²² djetoma nde po djaino nama dji gelanga, adjifalembese enu la bana baino, adjingosega bibwele biaino, la mobinogese nde enu baito bake; la ndole djaino ingala nde lisobe. ²³ engala mombo djo mbeo itilonganye enu la engala mombo enu boende emaeli djemi, ²⁴ la emi djeemaele nde enu ambwale la djetobe nde enu mbala bosambale oeta po dje basumu baino. ²⁵ djelesa nde gongale enu ilonde, ayingosundja po dje booani bwami; gee gengosongane enu go toula twaino, djesela nde fota moete djaino, la enu botemi ndi mo baago ba banguna baino, ²⁶ gee gengombendemi enu isandu i gehoi bogali liu belamba bekati beaino moete fulu emoa la bedja nde la bekate beaino mo gemekelo; boli ndi la bofaugutwi. ²⁷ engala mombo, ata galo, enu bofaoweli djemi, la engala mbo enu boemaeli djemi, ²⁸ djemaele nde enu ambwale la kanda tubu la djete nde enu gato mbala bosambale la oeta po dje basumu baino. ²⁹ boli ndi benugu be bana baino bolome, la enu boli ndi benugu be bana baino ba bogali. ³⁰ djesega nde bisee biaino abi liolo, djebegesa nde bikeko biaino abingale po dje loha, djetande beligo beaino gotie beligo be bikeko biaino, la liofi liami lingala la oili gongale enu. ³¹ djebinogesa nde toula twami ogi angala lisobe, djesega nde bikeko biaino, la ifaogome ale lienge lilo li malasi baino. ³² dje nda nde boi, la banguna baino bengala nde mosisi djaino. ³³ djepandje nde enu moete babota la djegona nde ilonde gombise djaino, boi bwaino bondama nde moeta la eta, la huma djaino ingala nde gesobe. ³⁴ lagalo boi bosagela nde djenga dji sabata, mo gee getubu agengo ndemo boi la mombo enu bongali ndi moete boi bo banguna laino; lagalo boi boogoma nde, la osagela toenga toaho to sabata. ³⁵ gee getubu agengo tinyemo bo boi, mongala nde la oogoma abotia mbo bombe mo toenga twaino, kasi enu bombi ndi ho. ³⁶ djesela nde booha mo baofi moete djaino enu abanguuha, moete bei be banguna baino; losele lo loasi alongale mofugunye mo lolingola nde bo; bekima nde ogi angala bendekima ilonde, la bekba nde se lotia mbo bendebitshana laabo. ³⁷ bebelama nde se bamoa gotie basina ogi angala gofelo ilonde, lotia mbo bende bitshana laabo. bofaenegi gofelo banguna baino. ³⁸ bongbi ndi moete basego, la boi bo banguna baino bo halende enu. ³⁹ obanguuha moete djaino betobama nde babanga po dje basumu babo; betobama nde ambwale mo liogi po dje obe bo baise babo. ⁴⁰ betubela nde basumu babo la basumu babaise babo, la obe obotonge bo gongale emi, la oemaela abo emaele beemaelemi. ⁴¹ basumu mo litina liami ambwale djeemaela nde bo la moesa nde bo goete boi bo banguna laabo, la baofi babo abatia mbo betinyame ifondo befoama nde baloi se, la befuta nde bolima bo basumu babo. ⁴² djekanesa nde booani bwami la yakobo, djekanesa nde booani bwami la isaka la booani bwami la abalayama, la djekanesa nde boi. ⁴³ boi bosidjama nde laabo, la beunela nde la to toenga o gee gengongala bo osegana ogola laabo; po dje mbo batitose balao baami la mombo baofi babo beudje nde bebeko beami ondjendja. ⁴⁴ kasi gee gengoiga bo goete boi bo banguna laabo, emi ifa te bogato, la ifasele bo la obe tee go gelenge ge oloa bo, tee la tina booani laa bo; po dje mbo emi djengale ngene, mungu djaabo. ⁴⁵ djekanisa nde po djaabo booani bo felo abokbegese djekbegesa bo go boi bo ejipito mo baiso bo basego, po dje ongala mungu djaabo. djengale ngene. ⁴⁶ mondangale gekeko, balao la bebeko abete iongiaongia moete ge la bana ba yisalaele, gotie ngolo dje sinai, la mose.