¹ iongiaongia ebegise nde mose gombo: ² mwe mongala nde bobeko bo boto ga singa po dje bokolo bwande boelisama. ge eiga nde gongale kanga ³ la kanga enena nde go geamba la kanga eleta nde ge. la galo, engala mbo bwale bo singa bouha goete boto ga singa, ⁴ andi kanga elakela nde bo goosa noli dje bwelu djele obangale moete luuho po djaande ogaadjoelisama, la ndambo dje tokoko to eleje la busi dje ndelu la sope. ⁵ kanga elakela nde bo goloa noli emoa goetepeli odjatongame la nele gotie lodje olongale moa mbole. ⁶ ge eosa nde noli odjangale la luuho gesee gemoa la gesege ge ikoko dji elejele la busi dje ndelu la isope, la egotsha nde mo la noli dje luuho goete baila ba noli eloame goliolo li lodje oloenda lo. ⁷ ge etaa nde mo goliolo mbala bosambale gotie boto ogadjoelisama la singa, la ge etanga nde ge bwelu, la etia nde noli dje luuho gombo aee go gesobe moete baale. ⁸ ge ogaadjoela etita nde tulu djande la esogola nde soge djande djitubu la epula nde bindo biande la badje la ogwaela ge. la gombisa egota nde goete mbele la ogwalaa ge golusa dje likumbo lyande bekolo bosambale. ⁹ mo bokolo bo bosambale egulola nde soge djitubu dji botshwe bwande. egulola nde loole lwande, la soge dji baiso bande, ogalo la soge djande djitubu. la gombisa esogola nde tulu djande la epula nde bindo byande la badje la ogwangala ge bwelu. ¹⁰ mo bokolo bo bonaani ge eosa nde bana ba pate dji bolome baele obati babe la bona ga pate ga ogali omoa ogangale la gelanga gemoa ogaati bobe, la boeba bo biya biola la biseso gose liu la bioto bi efa gemoa la boteke obotshangame lo djeikeike indi mobwanyame la baina, la bolangi bomoa bo baina. ¹¹ kanga odjaelisha ge eemalisa nde boto ogaadjoela la biya biye gopelo mungu gombale dje gegwe ge likumbo li koyangana. ¹² kanga eosa nde bona ga pate ga golome omoa, la ekaba nde mo ambo boeba bo gekweli, la bolangi bo baina gesee gemoa la emotsha nde mo po dje boeba bo omotsha gopelo mungu. ¹³ ge eloa nde bona ga pate djaho moete gesee oginya bo goloa boeba bo lisumo la boeba boohumba, mo gesee geelu po dje mbo boeba bo gekweli ambo boeba bo lisumo, mongale mo kanga. moete la bwelu. ¹⁴ kanga eosa nde ndambo dje baila ba boeba bo gekweli, la kanga etaa nde mo go botshwe bo litwi li bolome ogadjoela, la isangana djilene dji djoogo dji bolome djande, la isangana djilene dji idjolo dji bolome djande. ¹⁵ la gombisa kanga eosa nde ndambo dje baina goete bolangi la ebela nde mo goete likata lyande pendja li ogali, ¹⁶ la egotsha nde isangana dji djogo djaande dji bolome la baina obangale mo djoogo djande dji ogali, la isangana djande ebela nde ndambo dje baina mbala bosambale gopelo mungu. ¹⁷ ndambo dje baina betiala nde mo djoogo djande kanga eta nde go botshwe bo litwi li bolome bwande ogadjoela la isangala odjilene dji djogo djande dji bolome, la isangana djilene dji idjolo djande dji bolome la goliolo li baila ba boeba bo gekweli. ¹⁸ baina batiala mo djoogo dji kanga ge etaa nde go botshwe bwande ogaadjoela. la gombisa kanga eudjela nde ge goelela mbisa goete oboto gopelo mungu. ¹⁹ kanga ekaba nde boeba bo lisumo po djuudja goelela oboto mbisa po dje ogaadjoela go lilo lyande. la gombisa ge eloa nde boeba bo ohumba, ²⁰ la kanga ekaba nde boeba boohumba la boeba bo biya biola goliolo li gehumbelo. lagalo kanga eudjela nde ge goelela mbisa goete oboto la engala nde bwelu. ²¹ engala mbo ge engale bobola la apakoke gopaa mingi gai, andi eosa nde bona ga pate omoa ga golome po dje boeba bo gekweli obwadjomotshama, po djudjela ge goesama goete oboto, la ndambo dje gemoa gose liu dje bioto bi efa gemoa la boteke obotshangame djeikeike, la bolangi bomoa bo baina. ²² eosa nde ambwale noli dji bibenga biele imbai bana ba bibenga biele ogalo akoke ge gopaa. emoa engala nde boeba bo lisumo la gasina boeba boohumba. ²³ mo bokolo bo bonaani ge edja nde lalo po djoela bwande gongale kanga go gegwe ge likumbo li koyangana gopelo mungu. ²⁴ kanga eosa nde bona ga pate la boeba bo gekweli, la bolangi bomoa bo baina, la kanga emotsha nde mo po dje boeba bo omotsha gopelo mungu. ²⁵ ge eloa nde bona ga pate la boeba bo gekweli, la kanga eosa nde ndambo dje baila ba boeba bo gekweli la etaande mo go botshwe bo litwi li bolome bo ogaadjoela, la isangana djilene dji djoogo djande dji bolome, la isangana djilene dji idjolo djande dji bolome. ²⁶ kanga ebela nde ndambo dje baina goete kole djande dje ogali, ²⁷ la etaa nde mo gato go djoogo djande dji bolome ndambo dje baina bengale go djoogo djande dji ogali mbala bosambale gopelo mungu. ²⁸ kanga etaande ndambo dje baina obangale mo djoogo djande la botshwe bo litwi li bolome bwande obwadjoela, la isangana djilene dji idjolo djande dji bolome, la gesee ogetame baila ba boeba bo gekweli. ²⁹ ndambo dje baina obatiale mo djoogo dji kanga ge etaa nde mo go botshwe bo ogaadjoela po djuudjela oelela oboto mbisa gopelo mungu. ³⁰ ge ekaba nde mwete bibenga too bana ba bibenga, mo mokoke ande, ³¹ omoa po dje boeba bo lisumo la mwasina po dje boeba boohumba la boeba bo biya biola mo bolongo. kanga eudjela nde ge oelela mbisa moete oboto gopelo mungu. ³² mwe mongale bobeko mo litina li boto ono angale la bwale bo singa, ogakoke gokaba boeba po ati po djoela bwande. ³³ mungu ebegise nde mose la alona gombo: ³⁴ aho adjogotenu go gehuma ge kanana, mwadjopaa djeepenu gombo mongale mwaino, la aho aatei bwale bo singa moete mbele emoa go gehuma ogia djongala gino, ³⁵ andi ogangale ngene la mbele edjande goobegisa kanga gombo: mwaenega ambo gelenge ge bwale obongale go mbele djami. ³⁶ lagalo kanga elaka nde gombo banyenye biya bitubu bimbele inde kanga eegoti te goa gooleta bwale bwaho, po dje litina li gombo biya bitubu bi mbele bitotangama lilo. gombisa kanga egota nde gooleta mbele. ³⁷ ge eleta nde bwale boaho, la bwale boaho bongala ambo la baulu go mbele la batono ba langi ba beinda too la bwelu, la oenegela ambo gose mbiti dji getutu, ³⁸ andi kanga enena nde go mbele la eiga nde go gegwe ge mbele la oanda mbele bekolo bosambale. ³⁹ kanga eiga nde ale mbala djasina mo bokolo bo bosambale la eleta nde. engala mbo bwale boenda la baulu go mbele, ⁴⁰ andi kanga elaka nde gombo batotole babanga obangale la bwale la batee mo gato go gesee ge lilo golusa lo boi. ⁴¹ ge elaka nde ambwale gombo bapalee mbiti go liolo li bitutu goete mbele, bisee bitubu, la babele mbiti odjatotola bo mo gesee ge lilo golusa lo boi. ⁴² la gombisa beosa nde babanga basina etaa nde o gombisa dje babanga obatotoge lo, la ge eosa nde mbiti djasina la begilitsha nde mo mo bitutu. ⁴³ engalambo bwale bonena mbala djasina go mbele aho aasila ge gototola babanga la gopala mbiti gombele la gogilitsha mbiti dji sika, ⁴⁴ andi kanga edja nde gooleta. engala mbo bwale boenda go mbele andi mongale singa djibe go mbele. mongale lilo. ⁴⁵ ge ebuna nde mbele djaho, babanga ba mo la tokoko to mo la mbiti djitubu dji mbele. ge etola nde mo golusa bo boi go gesee ge lilo. ⁴⁶ la mwasina, ogaagota mbele mo gee ge oindja engala nde la lilo kino liolo. ⁴⁷ boto ogalala goete mbele etita nde tulu djande, la boto ono alela biya goete mbele etita nde tulu djande. ⁴⁸ engala mbo, kanga eiga la eleta, la bwale botiende ambo goete mbele, aho aasila mbiti dji sika go gilitshama mo mbele, andi kanga etanga nde mbele bwelu po dje mbo bwale boaho bwauha. ⁴⁹ la galo po dje oelisama bo mbele eosa nde noli djike djele la gesege ge ikoko dji eleje gesee gemoa la busi dje ndelu la isope, ⁵⁰ la ge eloa nde noli emoa goete peli odjatongame la nele dji goliolo li lodje oloa mbole, ⁵¹ la ge eosa nde gesege ge ikoko dji eleje la isope la busi bwelu gesee gemoa la noli odjingale la luuho, la egotsha nde mo goete baila ba noli odjaaloama, la badje obaenda lo, la ge eta nde mo gato goete mbele mbala bosambale. ⁵² la galo ge epetola nde mbele la baila ba noli, la badje obaenda lo, la noli odjingale la bomoi, la gesege geikoko dji eleje, la isope, la busi bwelu. ⁵³ ge etiande noli dji bomoi baee golusa bo boi go gesee ge gesobe la baale. la galo eudjela nde mbele goelela oboto mbisa la mongala nde gwelu. ⁵⁴ mwe mongale bobeko mo litina li bwale bo singa obongale bilenge la bilenge: po dje lobuse, ⁵⁵ la po dje bwale bo singa goete tulu too goete mbele, ⁵⁶ la po dje liulu too tosunda too la litono, ⁵⁷ po djoenegisa imbaimbo mongale lilo imbai mbo mongale gwelu. mwe mongale bobeko bo bwale bo singa.