¹ mungu ebegise nde mose la alona gombo: ² engala mbo boto engale la liulu mo bindo too tosunda too batono mo logogo lwande, la moakokoga bwale bo singa mo logogo lo bindo biande, andi aigisama nde gongale kanga alona too gongale omoa moete bana bande ba bolome obangale kanga. ³ lagalo kanga eleta nde mo gesee ge bwale mo logogo lo bindo biande, la imbaimbo bepuu be gesee ge bwale beakokoga pembe la imbaimbo bwale boaenegela ambo boagota gose logogo lo bindo, andi mwende bwale bo singa. gwadjosila kanga goleta ge etanga nde ge lilo. ⁴ imbaimbo litono liaho lingale pembe mo logogo lo bindo biande, la bepuu be goete dje mo betikokoge pembe, andi kanga ebundisa nde boto gaho bekolo bosambale. ⁵ la gombisa kanga eleta nde ge moete bokolo bo bosambale, la moete baise bande bwale bwaho bopeidjame la bwale bwaho botiende mo logogo andi kanga ebundisa nde ge bekolo bosambale beasina. ⁶ la gombisa kanga eleta nde ge mbala djasina mo bokolo bo bosambale, la engala mbo litono li bwale liti enege moete baale la bwale botiende moete logogo, andi kanga etanga nde ge mbo engale bwelu. mongale tosunda bwasi, la ge etita nde tulu djande la engala nde bwelu. ⁷ engala mbo tosunda toaho toenda mo logogo, aho aasidja ge goenesa bindo gongale kanga po dje oelisa bindo byande, andi enena nde gopelo kanga. ⁸ kanga eleta nde engala mbo tosunda toaho toenda mo logogo, andi kanga etanga nde ge lilo. mongale singa. ⁹ gee gengale boto la bwale bo singa, eleshama nde gongale kanga. ¹⁰ kanga eleta nde, engala mbo lopito lo pembe longale mo logogo ololese bepuu pembe, la engala mbo bonugu bwenegela goete liulu, ¹¹ andi mongale singa dji gologolo mo logogo lo bindo byande, la kanga etanga nde ge lilo. ge apabundise ge po dje mbo engale la lilo. ¹² engala mbo bwale bo singa bonena moete logogo mo gelenge ge mbo singa djaindja logogo lotubu lo boto ga bwale, ototoga go botshwe kino go baolo, ogalo akoka kanga goleta. ¹³ andi kanga eleta nde imbai singa djaalupa bindo byande bitubu, ge etanga nde ge peto la bwale bwaho. mo moakokoga pembe mo gotubu la ge engale bwelu. ¹⁴ la mbo aho adjoenega bonugu bwande engala nde la lilo. ¹⁵ kanga eleta nde bonugu la etanga nde mo lilo. bonugu bongale la lilo po dje mbo mongale singa. ¹⁶ engala mbo bonugu bwaho bokokoga mbala djasina la ogwangala mo pembe, andi eiga nde gongale kanga, ¹⁷ la kanga eleta nde ge , la engala mbo bwale bwaho bokokoga pembe, andi kanga etanga nde boto ga bwale gaho bwelu. engale bwelu. ¹⁸ engala mbo djuma djingale la logogo lo bindo bi boto la ogwauha mo, ¹⁹ la gesee ge djuma djisuse pembe djaanena too litono li liila, andi mwenisama nde la kanga. ²⁰ kanga eleta nde la imbaimbo mwenega nde ambo mongale gose logogo la bepuu be mo beakokoga pembe, andi kanga etanga nde ge lilo. mongale bwale bo singa. moasila gonena la djuma. ²¹ engala mbo kanga eleta mo la bepuu be mo beti pembe, la moti gose logogo, lambo moti moete baale andi kanga ebundisa nde ge po dje bekolo bosambale. ²² engala mbo moenda la logogo andi kanga eta nde ge lilo. mongale bwale. ²³ engala mbo litono liaho litiala gesee gemoa la moti ende, andi mongale lopao lo djuma, la kanga etanga nde ge bwelu. ²⁴ too, aho angale bindo la pota dje djiimbe mo logogo lo mo la bonugu bo pota djaho mwakokoga litono lielu too pembe. ²⁵ andi kanga eleta nde mo la imbaimbo bepuu la litono liaho likokoga ambo pembe la mwenega ambo gose logogo, ambo mwende singa. mwasila gonena la pota dje djiimbe, la kanga etanga nde ge lilo. mongale bwale bo singa. ²⁶ engala mbo kanga eleta mo la bepuu be litono li mo liti pembe la moti gose logogo, lambo moti moete baale andi kanga ebundisa nde ge moete bekolo bosambale, ²⁷ la kanga eleta nde ge mo bokolo bo bosambale, engala mbo mwende enda mo logogo andi kanga etanga nde ge lilo. mongale bwale bo singa. ²⁸ engala mbo litono liaho litiala gesee gemoa la moti ende mo logogo, la mbo moti moete baale, andi mo mongale liulu olitotoge mo pota dje djiimbe la kanga etanga nde ge bwelu, po dje mbo mongale lopao lo pota. ²⁹ aho angale golome too gogalila bwale mo botshwe too mo loole, ³⁰ kanga eleta nde bwale bwaho. engala mbo mwenega ambo gose logogo la bepuu goete dje mo bengale mondo too oke, andi etanga nde ge lilo. mongale lobuse, mongale singa go botshwe too mo loole. ³¹ engala mbo kanga eleta bwale bo lobuse ko mwenega ambo moti gose logogo, la bepuu biilo beti goete dje mo, andi kanga ebundisa nde boto ga bwale bo lobuse moete bekolo bosambale, ³² la bokolo bo bosambale kanga eleta nde bwale, la engala mbo lobuse lotiende la bepuu be mondo beti mo la lobuse lotshenege gose logogo, ³³ andi epala nde bindo, andi apapale lobuse. la gombisa kanga ebundisa nde boto ga bwale bo lobuse moete bekolo bosambale beasina. ³⁴ mo bokolo bo bosambale kanga eleta nde lobuse loaho, la lobuse loaho lotiende ambo mo logogo, la motienege ambo gose logogo, andi kanga etanga nde ge bwelu, la etita nde tulu djande la engala nde bwelu. ³⁵ engala mbo lobuse loenda mo logogo gombise dje oelisama bwande, ³⁶ andi kanga eleta nde ge la engala mbo lobuse loenda mo logogo, andi kanga apasile bepuu be mondo. ge engale la lilo. ³⁷ la imbaimbo mo baiso bande lobuse lotiende la bepuu biilo beogologa goete dje mo, la kanga etanga nde ge bwelu. ³⁸ engala mbo golome too gogali engale la matono mo logogo lo bindo, matono pembe, ³⁹ andi kanga eleta nde mo la engala mbo matono ma logogo lo bindo bengale pembe la ati pee, andi mongale lobuse oloanena mo logogo. ge engale bwelu. ⁴⁰ engala mbo besoge be boto bebelega se go botshwe bwande, ge engale la libobo la engale bwelu. ⁴¹ engala mbo besoge be botshwe be boto bekba se go osio bwande, ge engale la libobo gosio la mbo engale bwelu. ⁴² engala mbo litono lielu la oli pembe lienena go botshwe bwande looma too go osio bo lomaa andi mongale bwale bo singa obongale monena go botshwe bwande bo ligango. ⁴³ la gombisa kanga eleta nde ge, la engala mbo liulu li bwale boaho bongale bwelu la pembe go botshwe bwande bo liulu, too gosio bwande bo liulu, la mwaenegela mo gelenge ge singa mo logogo lo bindo, ⁴⁴ andi ge engale boto ga singa, la engale la lilo. kanga etanga nde ge lilo. bwale bwande bongale mo botshwe bwande. ⁴⁵ boto ga singa, ogaatala bwale boaho, ebata nde tulu adjahalega la soge dji botshwe bwande djipaandame la elupa nde nywanywa djande dji liolo la ehamoga nde gombo: lilo ! lilo ! ⁴⁶ ge etiala nde la lilo bekolo betubu mongale bwale boaho bwande. ge engale lilo. engala nde geangene go mbele djaande golusa bo likumbo. ⁴⁷ aho mongale bwale bo singa goete tulu, engala mbo tulu dje bepuu be pate too tulu dji tukia, ⁴⁸ engala mbo mongale la lopito losa lo tulu, too pito djele dji mo imbai mo tulu dje tukia too mo tulu dje bepuu be pate, imbai mo logogo lonama too geloko inandi ogetongame la logogo. ⁴⁹ la bwale boaho boenega ambo gelenge gemoa la langi lo beinda too loelu, goete tulu, imbai mo busi bosa too busi bo libale, imbai la logogo, too gea ogetongame la logogo, mo mongale bwale bo singa la mwenegisama nde gongale kanga. ⁵⁰ kanga eleta nde bwale boaho la eandanisa nde mo mongale bwale po dje bekolo bosambale. ⁵¹ la gombisa ge eleta nde bwale boaho mo bokolo bo bosambale. la bwale boaho boenda ambo mo tulu, too mo lopito losa, too mo lopito lolibale too mo logogo too mo gea ogetongame la logogo, andi bwale boaho bongale singa odje mbe. mongale lilo. ⁵² ge ehumba nde tulu djaho, engala mbo bwale boaho bongale la busi dje sa too la busi dje libale, imbai la bepuu be pate too la tukia, imbai gea ge logogo, po dje mbo mo mongale singa djibe. mohumbama nde moete djiimbe. ⁵³ engala mbo kanga eleta mo la bwale botiende goete tulu, imbai ati mo busi obosa, too mo busi oboti bolibale too mo gea ogetia getongame la logogo, ⁵⁴ la kanga elaka nde gombo basogole gea geaho ge bwale ge eandanisa nde gombisa bekolo beasina bosambale. ⁵⁵ la gombisa kanga eleta nde gea geaho inde bwale bwasila gosogolama. engala mbo litono li bwale liti kokoge la langi, laa bwale boaho botiende, mongale lilo. boohumba nde mo mo djiimbe, imbai litono olingale mbala dje pelo too dje mbisa. ⁵⁶ engala mbo kanga eleta mo la bwale boti moenegela gombisa dje osogolama, ge epasola nde po dje ototola litono liaho mo tulu too mo logogo too mo lopito lo libale liaho. ⁵⁷ la gombisa engala mbo mwenegela mbala djasina mo tulu, goete lopito olosa too mo lopito lo libale, imbai mo gea ogetongame la logogo andi mo mongale la bwale. ⁵⁸ la mbo tulu, imbai dje busi djosa bo tulu, too la busi dje libale liaho, imbai gea ogetongame la logogo, oboatotoga bwale boaho aho aasidja ge gopula mo, mo mosogolama nde mbala djele la mongala nde bwelu. ⁵⁹ mwe mongale bobeko bo litina li bwale bo singa goete tulu dje bepuu be pate too la tukia, imbai la busi dje osa bo tulu too la busi dje libale liaho, imbai goete gea ogetongame la logogo, po djokabola imbai mongale peto too mbo lilo.