¹ Kashi taku kughayibwa ku babo beli mu Yesu Kilishitu. ² Kubuno,kubo,mulembe wa Muusa wa kalamo mu Yesu ?Kilishitu,u wankandulile mu mulembe wa bwaghi nu wa lukwo. ³ Kubuno ki tanakoshibwa mu mulembe, kubuno mubili wamubikile musoshu,-Ghongo aghishe bwaghi mu mubili,mwa mukusinga Mwana waghe mu mubili wa susana na bwaghi ku bitondo bya bwaghi,. ⁴ Kubo,bulili bwa mulembe bubelelele ku tweli,beshwe bekutabanga ta mu mubili tondo mu Muusa. ⁵ Babo bite kalamo mu mubili ,bakulenganya bya mubili, tondo babite kalamo mu Muusa,bakulenganya bya Muusa. ⁶ Nu lutundo lwa mubili nti lukwo, tondo lutundo lwa Muusa, nti kalamo nu boolo; ⁷ Kubuno lutundo lwa mubili luli lusombo lwa Ghongo,kubuno talweli mu mulembe wa Ghongo,nu taluna kosha . ⁸ Ubo,bo bite kalamo mu mubili,tabana boghyaboghya Ghongo. ⁹ Kwinu, tamweli gho kuyangana na mubili,tondo na Muusa, ndi Muusa wa Ghongo uli munda benywe.Ndi muntu tite Muusa wa Yesu Kilishitu ta waghe. ¹⁰ Nu ndi Kilishitu eli munda na benywe, ,bulili akwile mu mubili ku bwaghi ,tondo muusa wite kalamo mu bilili. ¹¹ Nu ndi Muusa w'olya watuchagha Yesu ku bakuyi weli munda n'inu,olya watuchagha Kilishitu ku bakuyi akelesha mubili winu wa lukwo kalamo kutingila Muusa waghe weli munda na benywe. ¹² Agho lingo,bisakwitu,tatu bakobe ba mubili buno tube gho kuyangana na mubili. ¹³ Ndi mwaba gho mu kuyangana na mubili,nti mwakwa; tondo ndi kutingila Muusa mwita bitondo bya mubili nti mwaba gho, ¹⁴ Kubuno babo bansayi balhutwa na Muusa wa Ghongo beli bana ba Ghongo. ¹⁵ Nu tamweleshishwe Muusa wa bukobe, buno mube lingo na boba ;tondo mweleshibwe Muusa wa kuba bana,kutingila we tukumana Aaba,Tata! ¹⁶ Muusa w'inene ukutenenekela muusa witu buno tuli bana ba Ghongo. ¹⁷ Ndi tuli bana, tuli bisa mwandu:bisa mwandu ba Ghongo nu bisa mwandu ghamoyi na Kilishitu, ndi twanuba ghamoyi nawe,buno tu katatwa ghamoyi nawe. ¹⁸ Nkumana minubo sa bino bindi tasinalingikwa na lukumbu lweli kubusho kwitu lutukaloshibwa. ¹⁹ Kubuno kyabumbilwe kinsayi kikulindila na nkasa inene kulola ku bana wa Ghongo. ²⁰ Kubuno chabumbilwe kinsayi chabikilwe ghansi ku bikatinga, ta kwakushima kwacho ,tondo kutingila olya wakibikagha agho, ²¹ ghamoyi na malelamilo buno nuwe akakandulwa mu bukobe bwa lukwo,nu abe na kibhu mu lukumbu lwa bana ba Ghongo. ²² Tondo, tukunana kwikila buno busi,chabumbilwe kinsayi kikulila nu kunuba na mbabasho anga sa kubuta. ²³ Nu ta so sinene;tondo nu beshwe bite myanya sa Muusa nu beshwe tukulila ,mu kulindila tube bana,nu kughalulwa mibili situ. ²⁴ Kubuno mu ndemalilo u mutonile.Tondo,ndemalilo sikumoneka ko ta ndemalilo;bikumoneka ko binalemalilwa lingo? ²⁵ Tondo ndi twalelamila bitutakumona ko,tukubilindila na nkasa. ²⁶ Ubu nubo Muusa atukukasha mu busoshu bwitu, kubuno tatukumana bisogha bi tunasegha,tondo Muusa w'inene akutuseghela kutingila indilo litanasambalwa; ²⁷ Nu ghoso ukulonda mitima akumana mulenganya wa Muusa, kubuno akuseghela basanana anga bwashima Ghongo. ²⁸ Tukumana buno bitondo binsayi,byeli bisogha ku babo bashima Ghongo,babo bamanilwe ku mulenganya waghe. ²⁹ Kubuno, babo ba managha tanga,ababikagha tanga basusane na Mwana waghe,kubuno Mwana waghe abe Nkulha mu katighi na bilongo bingi. ³⁰ Nu babo basombolagha tanga,abamanagha nubo; nu babo bamanagha ,abasananiagha nubo;nwabo basananaghya,abeleshishe nubo lukumbu. ³¹ Tutende lingo buni ku bino bitondo? Ndi Ghongo atutendela,nayi ukatusinga ? ³² We,ntatendelelagha Mwana waghe,tondo amwesanagha ku beshwe bansayi,buni bwatakakosha kutwelesha binsayi ghamoyi nawe? ³³ Nayi ukatalikila basombolilwe na Ghongo? Ghongo u kumana bantu buno wa bulili ! ³⁴ Nayi ukabaghaya? Kilishitu akwile;bingi kwebyo, atukile ku bakuyi ,eli kw'indume kwa Ghongo nu akutuseghela ! ³⁵ Nayi akatulekanicha na lutundo lwa Kilishitu? Ndi muyungyoyungyo, ndi kabebe, ali munubo,ndi nsala, ali munkanka,ali lukwo,ali mbotela ? ³⁶ Anga bwatilwagha:Kutingila uwe uchasula tukwitwa busi bunsayi, twalolwa anga mbuli sikwenda ku ketulwa. ³⁷ Tondo mwibyo bitondo binsayi twaghimba babo basinganile, kutingila ghoso watushimile. ³⁸ Buno nkumana bulili ali lukwo aba kalamo, ali baghenshi aba bangati, ali bitondo bya buno busi aba bi kika, ³⁹ ali bwangato,bya ku ntata, aba bya munsi,ta ku champa cha bumbilwe ki katulekanucha na lutundo lwa Ghongo lwaloshishe mu Yesu Kilishitu Mukota witu.