¹ Tamukumana buno, e bisakwitu,kubuno nkutenda na bantu bakumana mulembe_,buno mulembe wite bwangato ku muntu wicheli wisa? ² Ububo mukashi wa songwa akandwa na mulembe ku munachaghe ndi echeli gho;tondo ndi munache akwa ,nti atuka mu ubo bwangato bwamukandagha na munache. ³ Ali lingo ,ndi munache echeli gho,nu aba mukashi wa ungo mulume,nti atensha; tondo ndi munache akwa,nti ntakandwa lingo na bwangato,nta tensha lingo ndi aba mukashi wa ungo muntu. ⁴ Ubo nubo ,bisakwitu,benywe nubo mwabagha bakuyi ba mulembe, kutingila mubili wa Kilishitu watukagha ku bakuyi,kubuno tukonamye bighuma kuli Ghongo. ⁵ Buno,gha twabagha mu mubili,nkasa sa bwaghi satukagha mu mulembe sa kitagha nkashi mu bighansa bitu,buno tukonamye bighuma ku lukwo. ⁶ Tondo lelo,twakandulilwe mu mulembe,mu kukwila uso mulembe mutwabagha twakandilwe ,kubuno tukite nkashi mu mutima wa mu bino bindi,ta mu mutima wa kalayi. ⁷ Tutende lingo buni? Mulembe uli bwaghi? Tobo! Tondo namanagha bwaghi kutingila mulembe.Buno nshinamanile bubi,ndi mulembe tawatendagha:Ntuka kita mabi. ⁸ Nu bwaghi,mubo,bwindagha nkasa sabo munda nine;buno ghete mulembe taghe bwaghi. ⁹ Kwine,gha nabagha nshikandwa na mulembe ,nabagha neli gho;tondo ghikagha lukakisho,bwaghi bwabagha mwine ,nu nakwagha. ¹⁰ Ubo, lukakisho lwichagha ku kalamo , lwanichagha ku lukwo. ¹¹ Kubuno mubo bwaghi ,kutingila lukakisho lwa lukakisho lwanicha ku lukwo. ¹² Kashi lingo mulembe wa sanana,nu lukakisho luli lwa sanana,lwa bulili nu lusogha. ¹³ Bya byeli busogha binaba ku neli ndingililo lya lukwo?Tobo !Tondo bwaghi, buno buloleke ko kuba bwaghi,bwicha lukwo munda mwani kutingila bisogha,kutingila lukakisho bwaghi bube bubi bubibu. ¹⁴ Tukumana buno mulembe uli wa Muusa;tondo ine,nili wa mubili,naghushibwe mu bwaghi. ¹⁵ Kubuno nsikumana bi nkukita:nshikukita bi nkushima,nu nkukita binasomba. ¹⁶ Tondo ndi nakita bisanshima, nti namana buno mulembe uli musogha. ¹⁷ Nu lelo ntine u kubukita, tondo bwaghi buli munda n'ine. ¹⁸ Bisogha nkubimana tabili munda nine,ukutenda buno mu mubili wani;nite bunashima,tondo ta bwangato bwa kukita busogha. ¹⁹ Kubuno nshikukita busogha binkushima,nu nkukita bubi bu nshikushima. ²⁰ Nu ndi nakita binshikushima,nt'ine u ukubukita,tondo bwaghi bweli munda nine. ²¹ Nasanga kashi mulembe mw'ine: Gha nkulonda kukita busogha,bubi nti bwika gha busho. ²² Kubuno naboghela boghela mulembe wa Ghongo,kutingila muntu weli munda n'i ne. ²³ Tondo nkulola mu bighansa byani ungo mulembe,ukulwana na mulembe wa mulenganya wani, wangalucha mukobe wa bwaghi,weli mu bighansa byani. ²⁴ Mukene ine! Nayi unkatucha mu ghoso mubili wa lukwo? ²⁵ Ghongo atatwe kutingila Yesu Kilishitu Mukota witu!Agho lingo,ininene kutingila mulenganya nili mukobe wa mulembe wa Ghongo,nu kutingila mubili nili mukobe wa mulembe wa bwaghi .